თენგიზ სულაქველიძის სახელობის საფეხბურთო აკადემია გაიხსნა [ფოტო]

ქართულ საფეხბურთო სკოლებს, უმთავრესად, საერთო პრობლემა აწუხებთ - ბავშვებს ხელოვნურსაფარიან მოედანზე ავარჯიშებენ.

თენგიზ სულაქველიძის სახელობის საფეხბურთო აკადემიაში 3 სტანდარტული მოედანია, აქედან, 2 - ბალახისსაფარიანი და ერთიც მიწის, ხალიჩა კი არ ჰქონდათ და წვიმის შემთხვევაში, ბავშვებს ვერ ავარჯიშებდნენ. ახლა ეს პრობლემა მოგვარდა.

ფეხბურთის ფედერაციის დაფინანსებით, 2018 წლის მარტში დაიწყო და რამდენიმე დღის წინ დასრულდა აკადემიაში მოედნის დაგება - ცნობილი ვეტერანი ფეხბურთელის სახელობის საფეხბურთო ცენტრში ამიერიდან ბავშვებს უეფას სტანდარტების შესაბამისი ხელოვნურსაფარიანი მოედანიც მოემსახურება.

განახლებული მოედანი ოფიციალურად გაიხსნა და აკადემიას ფეხბურთის ფედერაციისგან საჩუქრად ბურთები და საფეხბურთო ინვენტარი გადაეცა. ცერემონიას ესწრებოდნენ თბილისის მერი კახა კალაძე, ფეხბურთის ფედერაციის პრეზიდენტი ლევან კობიაშვილი, კულტურისა და სპორტის მინისტრის მოადგილე შალვა გოგოლაძე, მოწვეული სტუმრები და აკადემიის ფეხბურთელები.

"ჩვენ დავიწყეთ სპორტის, ჯანსაღი ცხოვრების წესის პოპულარიზაცია და მინდა, ამ ინიციატივაში რაც შეიძლება მეტი ადამიანი ჩაერთოს. ეს ინფრასტრუქტურა ხელს უწყობს ქვეყანაში ფეხბურთის განვითარებას, რომელიც სპორტის პოპულარული სახეობაა. მადლობა ფეხბურთის ფედერაციას ამ ინიციატივისთვის. მიხარია, რომ ქართულ ფეხბურთს ახალი მოედანი შეემატა. ქალაქის მერია ყველაფერს გააკეთებს იმისთვის, ხელი შეუწყოს ასეთი ინფრასტრუქტურის მოწყობას", - თქვა კალაძემ.

ლევან კობიაშვილი: "აკადემიის განახლება საქართველოს ფეხბურთის ფედერაციის სტრატეგიული პროექტია, რადგან ეს ცვლილებები ქვეყანაში ბავშვთა ფეხბურთის განვითარებას შეუწყობს ხელს".

თენგიზ სულაქველიძე, აკადემიის ხელმძღვანელი: "მადლობა ფეხბურთის ფედერაციას მხარდაჭერისთვის. პროექტის განხორციელება მომავალი თაობების გაზრდის წინა პირობაა. კარგი ინფრასტრუქტურა კი ამის გარანტია იქნება. ამ ეტაპზე, აკადემიაში 200-მდე ბავშვი ვარჯიშობს. განახლებულ მოედნებზე კი მათი რაოდენობის 800-მდე გაზრდაა შესაძლებელი".

429
მკითხველის კომენტარები / 0 /
მსგავსი ამბები
რუბრიკის სხვა სიახლეები