გონივრულად გამოვიყენოთ კორონავირუსის მიერ შეთავაზებული "ტაიმ- აუტი"!

ქართული სპორტი, როგორც მსოფლიო სპორტის ნაწილი, კაცობრიობის უხილავმა მტერმა - კორონავირუსმა, ცხოვრებასთან ერთად, საკუთარ ჩარჩოებში გამოკეტა. მსოფლიო ხვალინდელ დღეზე ფიქრსა და გამოსავლის ძიებაშია. სააქართველო პროცესებს არათუ კვალში უდგას, პირიქით, მეწინავეობს და მაგალითის მიმცემია სხვებისთვის. სასურველია, ეს ეხებოდეს ქართულ სპორტსაც. მოსაზრებებს გვიზიარებს ”ლელოს” საპატიო რედაქტორი, საქართველოს სპორტის დამსახურებული მოღვაწე, საქართველოს დამსახურებული ჟურნალისტი, ”სპორტის რაინდის” წოდების კავალერი - თენგიზ გაჩეჩილაძე.

არავინ გაიკვირვებს თუ ვიტყვით, რომ საქართველოს სპორტული ორგანიზაციები, მთელი ქვეყნის სპორტული სამყარო, თანამდგომთა და ქომაგთა ჩათვლით, ემოციურად განიცდიან, როგორც ქართული სპორტის, ისე მსოფლიო სპორტის იძულებით ”ტაიმ-აუტს”. რა თქმა უნდა, სპორტის ”კორონადაპაუზება” დიდი იმედგაცრუებაა ყველასთვის. ამ უბედურებამ წერტილი დაესვა სპორტსმენთა სრულფასოვან მზადებასაც და ეს მაშინ, როცა კარს იყო მომდგარი 32-ე ოლიმპიური თამაშები.

თავმოყვარე ქვეყნებმა, რომლებიც ამაყობენ თავიანთი სპორტული მიღწევებით, შესაძლებელია, სულაც უარი თქვან გადადებულ თამაშებში მონაწილეობაზე, იმ ობიექტური მზეზით, რომ ოლიმპიელთა მომზადების დონე შეუფერებელი იქნება მსოფლიოს უპირველესი სპორტული ასპარეზობის ღირსებისთვის. მაგრამ ეს ვარაუდია. ჩვენ კი, ჩვენსას უნდა ვეცადოთ - ვეძიოთ გამოსავალი, ვემზადოთ და ვიყოთ მზად!

პროცესში, რომელიც რეალობაა, სასურველი შედეგი თავისთავად არ დადგება. დიდი იმედი აქვს ყველას, რომ სახელმწიფო საკადრისად და ჩვეული პასუხისმგებლობით გაიაზრებს და გაიზიარებს ქართული სპორტის აწმყოს და მომავლის გდასარჩენად და გასაძლერებლად განათლების, მეცნიერების, კულტურისა და სპორტის სამინისტროს, საქართველოს ეროვნული ოლიმპიური კომიტეტის მართლაც, რომ თავგამოდებული ძალისხმევას.

სამთავრობო სტრუქტურებს, რომლებიც საგანგებო ვითარებისთვის ადგენენ თანაცხოვრების სოციალურ ნორმებს და წესებს, შეუძლიათ მაღალი კვალიფიკაციის სპორტის სპეციალისტებთან თანამშრომლობით, საერთო მოთხოვნების ჩარჩოდან გაუსვლელად, შეიმუშავონ სპორტსმენთა წვრთნის უსაფრთხო რეგულაციები - ინდივიდიალური, ორთაბრძოლების და გუნდური სპორტის სახეობების თავისებურებებისა და პრინციპების გათვალისწინებით. უდავოდ ანგარიშგასაწევია ისიც, რომ ტრადიციულად ჩვენ გვყავს სპორტის მედიცინის თვალსაჩინო ეროვნული კადრები, მათ შორის ისეთებიც, რომლებიც წარმოდგენილნი არიან ავტორიტეტულ საერთაშორისო ორგანიზაციებში.

ყველამ უნდა ვირწმუნოთ, რომ კრიზისულ პირობებში დინებას მიყოლა და მოლოდინის პროცესის გახანგრძლივება, აუნაზღაურებელ ზიანს მოუტანს ქართულ სპორტს, განსაკუთრებით უმაღალესი ოსტატობის სპორტს. არ გვაქვს უფლება, საამაყო ტრადიციების მემკვიდრეობა და საქართველოს, როგორც მსოფლიოში ერთ-ერთი მოწინავე სპორტული ქვეყნის იმიჯის შენარჩუნება დადგეს საფრთხის წინაშე. არადა, ნეგატიური ტენდეციები, უკვე აშკარად შეიმჩნევა, სამწუხაროდ...

გონივრულად გამოვიყენოთ ”ტაიმ-აუტი!”

თენგიზ გაჩეჩილაძე, "ლელოს" საპატიო რედაქტორი


პ.ს. სპორტი ნაცადი წესით და რიგით ვითარდებოდა ტრადიციულად, მისი მნიშვნელობის დაცვის აუცილებლობლობა არასდროს წამოწეულა დღის წესრიგში. ეს ახალი რეალობაა და, ბუნებრივია, გამოცდილებაც არ გაგვაჩნია. სპორტის სპეციალისტებმა კარგად იციან, რას ნიშნავს მიზანმიმართული მზადების რიტმიდან ამოვარდნა.

გავეცნოთ ამონარიდებს საყოველთაოდ აღიარებული სამედიცინო დასკვნებიდან:

- ვარჯიშის შეწყვეტა ”ანგრევს შედეგებს”;

- ხანგრძლივი დროით ვარჯიშის შეწყვეტას მოსდევს ორგანიზმის ადაპტირდება ცხოვრების ამ სტილის მიმართ;

- სისხლში შაქრის რაოდენობა იმატებს საკვების მიღებით და შემდეგ იკლებს ვარჯიშით, კუნთები მას ენერგიისათვის იყენებს;

- განაცდენის აღდგენა ვარჯიშის განახლებით შესაძლებელია მხოლოდ ერთი, ან ორი თვის შემდეგ;

- სუსტდება სასიცოცხლო ძალები. ვარჯიშის შეწყვეტიდან დაახლოებით ორ კვირაში ჟანგბადი, რომლის გამოყენებაც კუნთებს შეეძლოთ, 20%-ით მცირდება;

- კუნთების ძალის აღსადგენად იმაზე მეტი დროა საჭირო, ვიდრე მის დასაკარგად;

- მეტაბოლიზმი ნელდება უკვე ერთ კვირაში. კვლევების თანახმადაც, პროფესიონალი ფეხბურთელებიც კი საგრძნობლად იმატებენ წონაში ექვსკვირიანი შესვენების შემდეგ;

- ირღვევა კვების, ძილის, დასვენების რეჟიმი

- იკლებს ინტელექტუალური  შესაძლებლობები.

- მაღალ სპორტულ შედეგებზე ორიენტირებულ სპორტსმენებსა და მწვრთნელებში თავს იჩენს იმედგაცრუებაზე ფიქრით გამოწვეული სტრესი და ა.შ.

1082
მკითხველის კომენტარები / 0 /
მსგავსი ამბები
რუბრიკის სხვა სიახლეები
;