თეოდორა კახიანი ოლიმპიადის საგზურისთვის იბრძოლებს

დღეს, 27 ოქტომბერს, პარიზის ახლოს, ორლეანში დაიწყება მოხმალავე ქალთა მსოფლიოს თასის გათამაშების პირველი ეტაპი. საპრიზო ადგილებისთვის მებრძოლთა შორის იქნება 2017 წლის ევროპის ჩემპიონი თეოდორა კახიანი. იგი ამ შეჯიბრებისთვის პენსილვანიაში (აშშ) პირადი მწვრთნელის - ვეს გლონის ხელმძღვანელობით ემზადებოდა.

- ფრანგული ტურნირით ჩვენი მოხმალავეებისთვის ახალი სეზონი იწყება, - გვითხრა საქართველოს მოფარიკავეთა ნაკრების მთავარმა მწვრთნელმა მერაბ ბაზაძემ. - ვიმედოვნებ, რომ თეოდორა არაერთ შეჯიბრებაში გვასახელებს და, რაც მთავარია, ტოკიოს 2020 ოლიმპიური თამაშების საგზურის მოსაპოვებლად იბრძოლებს.

- მოფარიკავე ვაჟები ჯერ ისვენებენ?
- დასასვენებლად სად გვცალია. ერთი თვეა, თბილისში საწვრთნელი შეკრება გვაქვს. მოხმალავეებისთვის სპეციალურად ჩამოვიყვანეთ ახალგაზრდა უკრაინელი მწვრთნელი ალექსანდრ ტორჩუკი, რომელიც ოთხი წელიწადია, მწვრთნელად მუშაობს. ბოლო სამი წელიწადი თურქეთში გაატარა - წლეულს მისი ერთი შეგირდი კადეტთა შორის მსოფლიოს და ევროპის ჩემპიონი გახდა. სიამოვნებით დაგვთანხმდა საქართველოში გადმოსვლაზე.

ეს არ არის შემთხვევითი - ჩვენი მოხმალავე ვაჟთა ნაკრები ამჟამად მსოფლიოს კლასიფიკაციაში მე-10 ადგილზეა და ტოკიოს ოლიმპიადაზე მოხვედრის რეალური შანსი აქვს. ასე რომ, ამგვარი ამბიციების გუნდთან მუშაობა ახალგაზრდა სპეციალისტისთვის მნიშვნელოვანი გამოწვევაა და ისიც თავს არ ზოგავს - დღეში სამჯერად ვარჯიშებს ატარებს.

ხელშეკრულებით, იგი არა მარტო ვაჟთა ეროვნულ ნაკრებს, არამედ ყველა ასაკის მოხმალავე ქართველ გოგო-ბიჭებს დაეხმარება.

ამას წინათ დავით აღმაშენებლის გამზირზე ამერიკელებმა საერთო ფიზიკური მომზადებისთვის "ჩემპიონთა აკადემია" გახსნეს. ქართველი სპორტსმენები, მათ შორის - საქართველოს მოფარიკავეთა ნაკრები გუნდების წევრები, იქ ვარჯიშობენ. კმაყოფილი ვართ.

- შეჯიბრებებში როდის მოსინჯავთ ძალებს?
- როგორც იცით, კახიანი დღეს ჩაებმება ტურნირში.

მოხმალავე ვაჟთა ნაკრები თვის მიწურულს ჩემი უკრაინელი ასისტენტის ხელმძღვანელობით ალჟირს მიაშურებს და 2 ნოემბერს მსოფლიოს თასის ეტაპის პირად-გუნდურ შეჯიბრებაში მიიღებს მონაწილეობას. იქ სანდრო და ბექა ბაზაძეები, მიხეილ მარდალეიშვილი და საბა სულამანიძე იასპარეზებენ. 6 ნოემბერს სოჭში ახალგაზრდა მოხმალავეთა მსოფლიოს თასის ეტაპზე მეტოქეებს ნიკა შენგელია, ვაჟა რეჭია, ნიკა ჭეიშვილი და ლიკა ჯიჯეიშვილი დაუპირისპირდებიან.

ყოველდღიური სპორტული გაზეთი "ლელო"
470
მკითხველის კომენტარები / 0 /
მსგავსი ამბები
რუბრიკის სხვა სიახლეები