თითქმის ოფიციალურად: საქართველო 2017 წლის ჩემპიონია!

* მსოფლიო რაგბის ორგანიზაციამ რაგბი ევროპის სკანდალზე
განაჩენი გამოიტანა.
* დისკვალიფიკაცია რუმინეთს, ესპანეთსა და ბელგიას.
* საქართველოს 2017 წლის ჩემპიონის სტატუსს მიანიჭებენ.

მსოფლიო რაგბის დამოუკიდებელმა კომისიამ, რომელიც რუსეთის რაგბის კავშირის სარჩელს იხილავდა, როგორც იქნა, გადაწყვეტილება მიიღო.

რუსეთი მსოფლიოს თასზე პირდაპირ ითამაშებს! გერმანიას კი, პლეი ოფში მოუწევს ურთიერთობის გარკვევა ჯერ პორტუგალიასთან და თუ მოუგო, მერე სამოას ნაკრებთან.

ახლა უფრო დაწვრილებით - რაგბი ევროპის წლევანდელი გათამაშება, რომელიც იმავდროულად 2019 წელს გასამართი მსოფლიოს თასის გათამაშების შესარჩევი ტურნირი იყო, სკანდალურად დასრულდა. ბოლო ტურში, ესპანეთის ნაკრებმა სტუმრად წააგო ბელგიასთან, რომელსაც რუმინელი არბიტრი სჯიდა. შედეგად, მსოფლიოს ჩემპიონატის საგზური რუმინეთის ნაკრებს ერგო და დღემდე ასე იყო ცნობილი.

თუმცა, რუსეთის რაგბის კავშირმა, რომლის ნაკრებიც მსოფლიოს თასის მიღმა დარჩა, სარჩელი შეიტანა რუმინელი მორაგბის, წარმოშობით ტონგელის სამართლიან ნატურალიზაციაზე. ეჭვსქვეშ დადგა ასევე ესპანეთისა და ბელგიის ნაკრებში ნატურალიზებული მოთამაშეების მართებულებაც.

აღნიშნული ქვეყნების რაგბის კავშირებმა კომისიას ვერ წარუდგინეს მათი ქმედების გამამართლებელი საბუთები და შედეგად, თითოეულ მატჩში, რომლებშიც ამ მორაგბეებმა ითამაშეს, გუნდს წაგება ჩაეთვალა და ხუთ-ხუთი ქულა დააკლდა.

ბელგიის ნაკრებში ერთმა ან მეტმა არალეგიტიმურმა მორაგბემ 2017-2018 წლების სეზონში ითამაშა 7 მატჩში.

რუმინეთის ეროვნულ გუნდში ერთმა არალეგიტიმურმა მორაგბემ ითამაშა 8 მატჩში.

ესპანეთის ნაკრებში ერთმა ან მეტმა არალეგიტიმურმა მორაგბემ ითამაშა 9 მატჩში.

დადგინდა, რომ რუსეთის ნაკრები ითამაშებს მსოფლიოს ჩემპიონატზე A ჯგუფში რუმინეთის ნაცვლად. გერმანია კი ესპანეთის ადგილს დაიკავებს და პორტუგალიას დაუპირისპირდება პლეი ოფში. ამ წყვილში გამარჯვებულის მომდევნო მეტოქე სამოას ნაკრები იქნება. გამარჯვებული ასევე A ჯგუფში დაიკავებს ადგილს, სადაც რუსეთის გარდა ირლანდიის, შოტლანდიისა და იაპონიის ნაკრებებია.

ყოველივე ამასთან ერთად, დამნაშავე ქვეყნების რაგბის კავშირებს დაეკისრათ ფინანსური სანქციები.

ბელგიამ უნდა გადაიხადოს 125 ათასი გირვანქა სტერლინგი, ესპანეთმა 50 ათასი გირვანქა სტერლინგი და რუმინეთმა 100 ათასი გირვანქა სტერლინგი.

სამწუხაროდ, ჯერჯერობით არაფერი უთქვამთ იმის თაობაზე, გამოცხადდება თუ არა საქართველოს ნაკრები რაგბი ევროპის 2017 წლის გათამაშების ჩემპიონად, თუმცა ოფიციალურ საიტზე უკვე ჩასწორდა ცხრილი, სადაც რუმინეთის ნაცვლად საქართველოა ჩემპიონად გამოცხადებული.

მსოფლიოს თასის მონაწილეები ამ გადაწყვეტილების შემდეგ

A ჯგუფი: ირლანდია, შოტლანდია, იაპონია, რუსეთი, პლეი ოფი
B ჯგუფი: ახ.ზელანდია, სამ.აფრიკა, იტალია, აფრიკა1, რეპეშაჟი
ჩ ჯგუფი: ინგლისი, საფრანგეთი, არგენტინა, აშშ, ტონგა
D ჯგუფი: ავსტრალია, უელსი, საქართველო, ფიჯი, ურუგვაი

ყოველდღიური სპორტული გაზეთი "ლელო"
835
მკითხველის კომენტარები / 0 /
მსგავსი ამბები
რუბრიკის სხვა სიახლეები