თორმეტწლიანი პაუზის შემდეგ ბათუმის 'დინამო' საკუთარ არენაზე დაბრუნდება

ასლან ბალაძე: საკუთარ არენაზე დაბრუნება უმნიშვნელოვანესი მოვლენაა 

დღეს ეროვნული ლიგა 2-ის ცენტრალურ მატჩში ბათუმის "დინამო" მარტვილის "მერანს" უმასპინძლებს. ამ ამბავში მნიშვნელოვანი ის არის, რომ 12-წლიანი პაუზის შემდეგ აჭარლები საკუთარ მოედანზე პირველად ითამაშებენ. მატჩი ანგისას ბაზაზე გაიმართება.

"ბულვარში სტადიონის დანგრევის შემდეგ, გუნდი ბათუმის "ადელის" სტადიონზე თამაშობდა, 2012 წლიდან კი ქობულეთში გადავედით, ევროპალიგის თამაშები კი ზესტაფონსა და ქუთაისში ჩავატარეთ. მოკლედ, გუნდი მოხეტიალე ცხოვრებას ეწეოდა, რაც, ცხადია, შედეგებზე მოქმედებდა.

ბათუმში 2017 წელს დავბრუნდით. აუცილებლად უნდა გამოვხატო მადლიერება მორაგბეების მიმართ - ეს ხალხი ძმურად დაგვიდგა გვერდში და მშობლიურ ქალაქში თამაშის სიხარული დაგვიბრუნა.

მაგრამ საკუთარ სტადიონსა და ბაზაზე 12 წელი ვოცნებობდით და ეს მხოლოდ ახლა გვეღირსა. ამიტომაა ანგისაში თამაში მნიშვნელოვანი და სასიხარულო ამბავი - არა მხოლოდ გუნდისა და მისი გულშემატკივრებისთვის, არამედ, მთლიანად ბათუმისთვის", - ამბობს ბათუმის "დინამოს" სპორტული დირექტორი ასლან ბალაძე.

მართლაც ქვეყნის სირცხვილი იყო, რომ საქართველოს ერთ-ერთი უძველესი კლუბი სტადიონის გარეშე იყო დარჩენილი. ბათუმის ბულვარში ცენტრალური სტადიონი 2006 წელს დაანგრიეს და იმ დღიდან მოყოლებული, ახლის აშენებაზე ათასი დაპირება გაიცა, თუმცა მშენებლობა მხოლოდ წელს დაიწყო...

ამ 12 წლის განმავლობაში, ბათუმის "დინამო" სხვადასხვა სტადიონზე თამაშობდა - ჯერ ადგილობრივ "ადელის" სტადიონზე, მაგრამ ახალი არენის აშენებას ვინ ჩივის, მალე ქალაქიდანაც გააძევეს, რადგან "ადელის" ტერიტორიაც გასხვისდა და 2012 წლიდან გუნდმა მომთაბარე ცხოვრებას მიჰყო ხელი...

ეროვნული ლიგა 2-ის თამაშებს ბათუმის "დინამო" წელსაც ქუთაისში ატარებდა. ახალი სტადიონის გახსნამდე, გუნდს ანგისას ბაზა აუშენეს, რომლის მშენებლობაც დეკემბერში დასრულდა. მაგრამ ბაზაზე მოედნის საფარი იყო მოსაწესრიგებელი და ამის გამო გუნდის საშინაო არენაზე დაბრუნება ორი კვირით გადაიდო.

აგრონომები "დინამოს" მოედანზე შესვლას არ ურჩევდნენ, რადგან საფარის ნიადაგთან "შეხორცებას" დრო სჭირდებოდა და კიდევ 2 კვირა დაცდა სჯობდა, აჭარაში ერთადერთი ბალახის საფარი უმაღლესი ხარისხის რომ ყოფილიყო...

ბალაძე დარწმუნებულია, რომ შინ დაბრუნება "დინამოს" შედეგებსაც დაეტყობა: "შარშან, ბათუმში რომ დავბრუნდით, უცნაური რამ მოხდა - გუნდი სახლში თამაშს ვეღარ იგებდა, მაგრამ ახლა "დინამო" საკუთარ ბაზაზე მეტოქეებს ბევრად უკეთეს პირობებშიც უმასპინძლებს და, რაც მთავარია, უკეთეს შედეგებსაც აჩვენებს.

ანგისაში ბალახის საფარი იყო მოსაწესრიგებელი და ახლა ის უკვე ძალიან კარგ მდგომარეობაშია. არის კომფორტული გასახდელები და საშხაპეები, დელეგატების, მსაჯთა და ექიმების ოთახები. მაგრამ საქმე მხოლოდ კომფორტში არ არის. გუნდისთვის საკუთარი მოედნის ფაქტორი უმნიშვნელოვანესია. ამისთვის ბათუმი საგანგებოდ ემზადება - ბაზა საზეიმოდ გაიხსნება, იქნება ფოიერვერკები და სიურპრიზები".

ბალაძისავე თქმით, სტადიონის მშენებლობა კარგი ტემპით მიმდინარეობს: "ახალი არენა ჩემი სახლის წინ შენდება და ყოველდღე ვუყურებ - კომპანია "ანაგი" დღე და ღამე მუშაობს და ისეთი შთაბეჭდილება მრჩება, ობიექტს დაპირებულ ვადაზე ადრე ჩააბარებს. ტრიბუნების პირველი იარუსის კონსტრუქციები, ფაქტობრივად, ამოყვანილია".

ბათუმის "დინამოსა" და მარტვილის "მერანის" შეხვედრის პირდაპირ ტელეტრანსლაციას აჭარის საზოგადოებრივი მაუწყებელი 1 მაისს, 20 საათზე შემოგთავაზებთ.

ყოველდღიური სპორტული გაზეთი "ლელო"
1100
მკითხველის კომენტარები / 0 /
მსგავსი ამბები
რუბრიკის სხვა სიახლეები
;