თორნიკე მუმლაძე: ჩემს სიტყვას კიდევ ვიტყვი!

წლის ფორვარდი თორნიკე მუმლაძე ქართველ გულშემატკივარს საჩხერის "ჩიხურადან" ახსოვს.

სწორედ "ჩიხურაში" გაატარა მან კარიერის საუკეთესო წლები. ეს მაშინ, როცა საჩხერულმა გუნდმა ევროპალიგაში თურქულ "ბურსასფორთან" ჭიდილში გაიმარჯვა. იმ მატჩში, პენალტების სერიაში, თორნიკე მუმლაძემ ბოლო, გადამწყვეტი 11-მეტრიანი შეასრულა ზუსტად და ქართული კლუბი შემდეგ ეტაპზე გავიდა...

შემდეგ იყო ტრავმები და 13-თვიანი იძულებითი პაუზა. ახლახან ის ისევ გამოჩნდა საფეხბურთო ასპარეზზე. მუმლაძე ლიგა 3-ის ბინადარ ჩხოროწყუს "სამეგრელოს" ღირსებას იცავს. მან მოედანზე დაბრუნება ლამაზი გოლებით აღნიშნა.

"სამეგრელოს" ახალწვეულმა 7 მატჩი ჩაატარა მეგრულ კლუბში და ოთხი ერთმანეთზე უკეთესი გოლი გაიტანა. მუმლაძე ეტაპობრივად შედის ფორმაში და თუ ასე გააგრძელა, ალბათ, მალე უფრო მაღალ ლიგაშიც ვიხილავთ, თუმცა ჯობია უშუალოდ მისგან გავიგოთ, როგორ ფორმაშია, როგორ აღმოჩნდა "სამეგრელოში" და ასე შემდეგ...

- საკმაოდ დიდხანს არ ჩანდით ასპარეზზე. რა იყო მიზეზი?

- პირველ რიგში, მადლობა, რომ შემეხმიანეთ და გახსოვვართ... პაუზა ტრავმით იყო გამოწვეული. შარშანდელი სეზონის დაწყებამდე, "ჩიხურაში" პირველი თამაშის წინა ვარჯიშზე ფეხი ვიტკინე.

თავიდან, მეგონა, რომ საგანგაშო არაფერი იყო, თუმცა, როგორც მოგვიანებით გაირკვა, ტრავმა სერიოზული ყოფილა. საშინელ ტკივილებს ვგრძნობდი მუხლში...

13 თვე დავკარგე მკურნალობაში, მაგრამ არ დავნებდი და საბედნიეროდ, დღეს ისევ მაქვს შანსი, ჩავდგე ფორმაში. ორი თვის წინ "ჩიხურაში" გავიარე მოსამზადებელი პერიოდი, ინდივიდუალურადაც ვვარჯიშობდი, თუმცა ჯერ კიდევ არ ვიყავი მზად საჩხერის გუნდში სათამაშოდ, ამიტომ, კლუბთან შეთანხმებით გადავწყვიტეთ, რომ ამ სეზონში სხვაგან ვითამაშებდი, სათამაშო პრაქტიკა რომ მქონოდა და ფორმაში ჩავმდგარიყავი. დაინტერესება იყო ჩხოროწყუს "სამეგრელოდან" და როცა ამიხსნეს, რა გეგმები ჰქონდათ, დავთანხმდი.

- რა მიზანი აქვს "სამეგრელოს" ლიგა 3-ში?

- ჩვენი მიზანი მინიმუმ ათეულში მოხვედრაა, რაც იძლევა იმის გარანტიას, რომ "სამეგრელომ" ადგილი შეინარჩუნოს ლიგა 3-ში, რაც დარწმუნებული ვარ, გამოგვივა. აქ არიან გამოცდილი და ახალგაზრდა ფეხბურთელები, რომლებიც ერთმანეთს ავსებენ და იმ ატმოსფეროს ქმნიან, რაც აუცილებელია იმისთვის, რომ გუნდმა დასახული ამოცანა შეასრულოს.

"სამეგრელოს" ჰყავს ახალგაზრდა მთავარი მწვრთნელი - ზურა ფირცხალაიშვილი, რომლის დამსახურებაცაა, რომ გუნდში ერთსულოვნება და დადებითი მუხტია. ის ამბიციური, მომთხოვნი და, რაც მთავარია, თავისი საქმის პროფესიონალია. დარწმუნებული ვარ, ასეთი მიდგომით ძალიან ბევრს მიაღწევს პროფესიულ კარიერაში.

- სხვა გუნდებიდან თუ არის დაინტერესება? და საერთოდ, რა გეგმები გაქვთ?

- არ დაგიმალავთ და, რამდენიმე გუნდისგან იყო და დღესაც არის დაინტერესება. ესენი არიან როგორც ლიგა 2-ის, ისე ეროვნული ლიგის კლუბები, მაგრამ ამ ეტაპზე აქ ვარ და მხოლოდ "სამეგრელოზე" ვფიქრობ. ამ სეზონის დასრულების შემდეგ სად ვითამაშებ, ჯერ არ ვიცი, მაგრამ ის კი ვიცი, რომ მინდა, ეროვნული ლიგის რომელიმე გუნდში ვითამაშო.

- გოლი და მატჩი თქვენს კარიერაში, რომელიც არასდროს დაგავიწყდებათ...

- გოლი, რომელიც არასდროს დამავიწყდება, ევროპის ლიგაში "ბურსასფორის" კარში გატანილი თერთმეტმეტრიანი იყო. ძნელია იმის ახსნა, თუ რას გრძნობ ასეთ დროს... ძალიან ბედნიერი ვიყავი და ჩემს ბედნიერებას აათმაგებდა ის ფაქტი, რომ ამ დიდ სიხარულს მთელი საქართველო იზიარებდა. ბევრს ვშრომობ და ვცდილობ, დავიბრუნო ძველი ფორმა, იმედი მაქვს, ყველაფერი კარგად იქნება.

- და ბოლოს, რას ეტყოდით ჩხოროწყუს "სამეგრელოს" ქომაგს?

- "სამეგრელოს" გულშემატკივრებს რაც შეეხებათ, უმაღლეს ლიგაში რამდენიმე წელი ვითამაშე და არსად არ მინახავს ასეთი ქომაგობა. ისინი "ჩიხურას" ფანებთან ერთად საუკეთესოები არიან. მათ ძალიან უყვართ თავიანთი გუნდი. ზოგადად, შეიძლება ითქვას, რომ ფეხბურთი დღესასწაულივითაა ჩხოროწყუში. საშინაო თამაში იქნება თუ გასვლითი, ყველგან დაგვყვებიან და ყოველთვის ვგრძნობთ მათ ძალას. ჩვენს ერთგულ ქომაგებს ერთ რამეს ვპირდები - "სამეგრელოსთვის" მოედანზე ყოველ შეხვედრაში ბოლომდე დავიხარჯები და ყველაფერს გავაკეთებ იმისთვის, რომ ამ კლუბმა ლიგაში ადგილი შეინარჩუნოს.

ყოველდღიური სპორტული გაზეთი "ლელო"
1283
მკითხველის კომენტარები / 0 /
რუბრიკის სხვა სიახლეები