თორნიკე ნაგლიაშვილმა გერმანია დააპიონა და ჩემპიონობა წამოიღო

თორნიკე ნაგლიაშვილი (66) გერმანიის ტურნირის ჩემპიონი, გიორგი პაპუნაშვილი (90) კი ვიცე-ჩემპიონი გახდა.

ჩვენებურებმა აღნიშნულ წარმატებას ამ უქმეებზე საარბრიუკენში გამართულ ევროპის ღია თასზე მიაღწიეს, სადაც მინდია ბოდაველის ხელმძღვანელობით 6 სპორტსმენი გაემგზავრა, თუმცა ორი მათგანი ტურნირზე "დაგვეკარგა".

ევროპის ჩემპიონი და მსოფლიოს მესამე პრიზიორი ვაჟა მარგველაშვილი, ვისაც ამჯერად ზედა წონაში - 73 კილოგრამში უნდა ეჭიდავა, არც აიწონა და, შესაბამისად, არ უასპარეზია, ევროპის ბრინჯაოს მედალოსანი ბექა ღვინიაშვილი, ვინც ასევე ზედა წონაში - 100 კილოგრამში უნდა გამოსულიყო, კი აიწონა, მაგრამ არც მას უჭიდავია.

თავად ჩვენი ნაკრების ამ ტურნირზე გამოსვლა ხომ იყო მოულოდნელი და კონტექსტიდან ამოვარდნილი, რადგან ადრე ჩვენები ამ რანგის შეჯიბრებებში არ გამოდიოდნენ და მით უფრო - წარმატებული სპორტსმენებით, ნაკრების ლიდერებით, მეორე უცნაურობა კი ის იყო, რომ ამ ექვსეულიდან ნახევარს ზედა წონაში უნდა ეჭიდავა - მარგველაშვილისა და ღვინიაშვილის მსგავსად, ამჯერად 81-ში უნდა დამდგარიყო ოლიმპიური და ევროპის ჩემპიონი ლაშა შავდათუაშვილიც, ვინც მართლაც ვიხილეთ ამ წონაში. თუმცა - დროებით, რადგან მსოფლიოს ჩემპიონატისთვის მზადების პროგრამის ფარგლებში, მწვრთნელებმა არც მას და არც ზემოაღნიშნულ დუეტს ამჯერად წონა არ დააკლებინეს, თორემ ოლიმპიური ჩემპიონიც და ისინიც ისევ თავიანთ ძველ წონებში რჩებიან.

აქვე იმასაც შეგახსენებთ, რომ ეს ექვსეული გერმანიაში ადრევე გაემგზავრა და კიოლნში ერთობლივი შეკრებაც გაიარა, ახლა კი რამდენიმე დღით საარბრიუკენში დარჩებიან, სადაც საწვრთნელი კემპი იმართება.

შეიძლება ითქვას, ნაგლიაშვილმა ეს ტურნირი ერთი ამოსუნთქვით მოიგო, რადგან უკლებლივ ყველა - ექვსივე შეხვედრა იპონით მოიგო. მის ტექნიკურ სანახაობასა და ილეთებზე ორიენტირებულ ლამაზ ჭიდაობას ამჯერად ჰოლანდიელი ოუენ კორზილიუსი, ფრანგი ტანჟუ ჟერარდი, რუსი ალექსანდრ კულიკოვსკიხი, ბელგიელი სენე ვინსი, ნახევარფინალში ისევ ფრანგი დანიელ ჟეანი და ფინალში ყაზახი გუსმან კირგიზბაიევი "შეეწირნენ". საინტერესოა, რომ ჩვენებურმა არათუ ქულა არ დაკარგა, ამ ექვს ორთაბრძოლაში გაფრთხილებაც კი არ მიიღო.

კარგად გამოვიდა პაპუნაშვილიც, ვინც ადაპტაციას გადის ახალ წონაში - წლეულს გადმოვიდა 90-ში, ამ გზაზე კი მსგავსი შეჯიბრებები მისწრებაა. თუმცა მსგავსი ეძახეთ და გერმანული ტურნირი არც ისე სუსტი გამოდგა, რადგან წარმატებული ძიუდოისტები სხვა ქვეყნებიდანაც საკმაოდ ბლომად გამოდიოდნენ.

პაპუნაშვილიც ტექნიკური, ქართულ ილეთებზე ორიენტირებული სპორტსმენია. მას ნაგლიაშვილივით წმინდად არ მოუგია ყველა შეხვედრა, თუმცა ეს სულაც არ აკნინებს მის გამოსვლას თბილისთან დაძმობილებულ ქალაქში.

მან ჯგუფური ეტაპი დამაჯერებლად გაიარა: პირველ პაექრობაში მასპინძელი დარიო გარსია კურბივაიტი დააიპონა, მერე რუს რომან დონცოვს ვაზარით მოუგო, საკმაოდ გამოცდილ ყაზახ აზიზ კალკამანულუს ჯერ ვაზარი აართვა, მერე კი იპონზეც დასცა, ნახევარფინალში კი ასეთივე დამაჯერებელი უპირატესობით კიდევ ერთ ანგარიშგასაწევ ათლეტს, აზერბაიჯანელ ტურალ შაფგულიევს აჯობა. სამაგიეროდ, ფინალში რევანში აუღო სხვა აზერბაიჯანელმა - მამადალი მეჰდიევმა, ვინც იქაურთა ლიდერია ამ წონაში. თუმცა მასაც უგებდა ვაზარით.

ახალ წონაში ორი შეხვედრა მოიგო შავდათუაშვილმაც. პირველად მანაც ყაზახთა უკვე გვარიანად გამოცდილი დიდარ ხამზა დააგდო ბეჭებზე, მერე კი მას ტაჯიკი აკმალ მუროდოვიც მიაყოლა ასევე სუფთა გდებით. ამას გერმანელთა მომავალ ფინალისტ ტიმო კაველიუსთან მარცხი მოჰყვა და ჩვენებური სანუგეშოშიც გადაერთო, მაგრამ იქ პირველივე პაექრობა დათმო ფრანგ გორან იანკოვიჩთან.

ლაშა ჩადუნელი (60) პირველივე წრეში დამარცხდა გერმანელ ფლორიან პაჩელთან.

ყოველდღიური სპორტული გაზეთი "ლელო"
1182
მკითხველის კომენტარები / 0 /
მსგავსი ამბები
რუბრიკის სხვა სიახლეები