თორნიკე შენგელიას და, სოფო: წარმოუდგენელი იყო, ვინმეს ჩემთვის თუნდაც რამე აგრესიულად ეთქვა და თოკოს ეს შეერჩინა

ესპანური კლუბის, "ბასკონიას" საიტმა კაპიტნის, თორნიკე შენგელიას შესახებ ვრცელი ფილმი მოამზადა.

საქართველოს ნაკრების ფორვარდი იხსენებს პირველ ნაბიჯებს კალათბურთში, ლაპარაკობს ოჯახზე, გუნდზე, გვაცნობს საკუთარ შეხედულებებს კალათბურთზე...

ბასკონია
ფილმი იწყება თორნიკე შენგელიასა და "ბასკონიას" სკაუტის საუბრით...

- 2012 წელს NBA-ის დრაფტის შემდეგ "ბრუკლინში" მოვხვდი. ახალგაზრდა ვიყავი და სათამაშო პრაქტიკის ნაკლებობას განვიცდიდი. სწორედ ამ სიტუაციაში გამოჩნდა "ბასკონიას" სკაუტი, რომელმაც გუნდზე ბევრი კარგი რამ მითხრა. მეც ვიცოდი, რომ პროგრესული გუნდია. მექნებოდა საშუალება გავზრდილიყავი და შემდეგ კვლავ ამერიკაში დავბრუნებულიყავი. სხვათა შორის, ველაპარაკე მირზა ტელეტოვიჩს, რომელიც NBA-ში წასვლამდე "ბასკონიაში" გამოდიოდა. მირზამაც ბევრი კარგი მითხრა.

როგორი მამა და მეუღლეა თორნიკე შენგელია? [VIDEO]

"ბასკონიას" სკაუტი:

- კარგად გიცნობდით, ამბიციური ახალგაზრდა ხარ და გაქვს მიზანი ცხოვრებაში. შენში ძლიერი ადამიანი დავინახეთ, ვისაც უყვარს მუშაობა. ერთი შეხედვით, ჩანდი წყნარი, უპრეტენზიო, თუმცა სინამდვილეში შრომისმოყვარე, ამბიციური, ენერგიული ხარ. მიღწეულზე არ ჩერდებოდი. შენში ჩანდა სურვილი გამარჯვებისა. ვაფასებ შენს სიამაყეს.



მამა
შესავალს მოსდევს საუბარი კახა შენგელიაზე, თორნიკეს მამაზე, რომელიც ასევე წარმატებული კალათბურთელი იყო, 90-იან წლებში საქართველოს ნაკრების ღირსებას იცავდა.

- მამაჩემი კალათბურთელი იყო, ჩემი იდეალი. მისი თამაშების ყურებით ვისწავლე და შემიყვარდა კალათბურთი. ავიღე მისგან ხასიათი და მენტალიტეტი. ყოველთვის ძლიერად, ენერგიულად თამაშობდა. მტკიცე ხასიათით გამოირჩეოდა, - ამბობს თორნიკე. მისი და, სოფო კი, განაგრძობს:

- ჩვენს ოჯახში ყველა კალათბურთელია, კალათბურთით ვცხოვრობთ. მამაჩემი, დედაჩემი, ჩემი ძმა, მეც ვთამაშობდი... თორნიკე პატარაობიდანვე ძალიან შეყვარებული იყო კალათბურთზე. არასოდეს დაზარებია, მუდმივად ვარჯიშობდა. პატარაობაშიც ისევე მონდომებით ვარჯიშობდა, როგორც ახლა.

კახა შენგელია:

- თოკოს პირველი ნაბიჯები იყო ისეთივე, როგორც ყველა დამწყები კალათბურთელის. ვერ ვიტყვი, რამით განსაკუთრებულად გამოირჩეოდა, ძალით ან სიმაღლით... თუმცა თამაშის სტილი ჰქონდა ისეთი, სხვაზე ძლიერიც ჩანდა და მაღალიც. მიზანდასახულობა და შრომისმოყვარეობა ბავშვობიდან ახასიათებდა.

პატარაობაში თორნიკე ისეთ სიტუაციაში ხშირად აღმოჩენილა, როგორშიც უამრავი ქართველი ბავშვი:

- 6 წლიდან კალათბურთით ვიყავი გატაცებული. ბურთის გარეშე ვერ ვჩერდებოდი, როგორც გარეთ ვთამაშობდი, ისე - სახლში. ოთახში ბევრი რამ მაქვს გატეხილი.



და
- თორნიკე ყოველთვის გვერდში მიდგას. პატარაობაშიც, წარმოუდგენელი იყო, ვინმეს ჩემთვის თუნდაც რამე აგრესიულად ეთქვა და ეს შეერჩინა. მნიშვნელობა არ ჰქონდა ახლოს იყო თუ შორს, - იხსენებს სოფო შენგელია.

თორნიკე სიტუაციას თავისებურად განმარტავს:

- არსებობს ლიმიტი, რომელსაც ვერ გადახვალ. გინდა რაღაცა თქვა, მაგრამ ცუდად ესმით შენი. შეგიძლია თქვა, გააკეთო, ზღვარს კი არ უნდა გადახვიდე.

დედა, ქეთევან შენგელია:

- თოკოს ერთი სიტყვით ვერ აღვწერ და ვერ დავახასიათებ, მაგრამ ერთი რამ შემიძლია ვთქვა - იგი კაცთმოყვარე ადამიანი, კარგი შვილი, კარგი ძმა, კარგი მეუღლე, მამა და ერთგული მეგობარია.



მეუღლე
- ჩემი მეუღლე, სალომე ჯუღელი მეგობრის დღესასწაულზე გავიცანი. გაცნობის მერე, მიმოწერა მქონდა. იგი მოდელი იყო, პარიზში მიდიოდა, მე კი ბელგიაში მივემგზავრებოდი სათამაშოდ. ვაგრძელებდით მიმოწერას "ფეისბუქით". ბევრი ლაპარაკი არ მიყვარს, ქალებს კი ბევრი მოვლა უყვართ, სიამოვნებთ, რომ ელაპარაკები. ამიტომ ჩვენი საქმე წინ ნელა მიდიოდა, - ესეც თორნიკე შენგელიას სიტყვებია. მისი მეუღლე სალომე ჯუღელი კი ევროპის გამორჩეულ ფორვარდს ასე ახასიათებს:

- თორნიკე ძალიან ყურადღებიანია, ფანტასტიკური მამაა. ბავშვები გიჟდებიან, ისე უყვართ. როგორც მეუღლე, თბილია და მხიარული. მოედანზე რომ ჩანს, ისეთი სერიოზული არ არის.

აი, რას ამბობს შენგელია შვილებზე:

- ოჯახი ჩემთვის ყველაფერია. ბავშვები აქტიურები არიან, ენერგიულები. არ ვუშლი თუ აფუჭებენ, მაგრამ არსებობს ზღვარი, აქტიურობასა და უზრდელობას შორის, რასაც არ უნდა გადავიდნენ. ვცდილობ, ეს წონასწორობა დავიცვა. ასეთ დროს საკმარისად მკაცრი ვარ.

...და ოჯახის როლზე:

- კალათბურთი ჩემი ცხოვრების დიდი ნაწილია, მაგრამ არ არის პირველი. ჩემთვის ოჯახი მთავარია. ოჯახი ცხოვრებაში მნიშვნელოვანი ადგილი უჭირავს. მტკივნეულია ჩემთვის, როცა ვკარგავ დროს, რაც შეიძლება ოჯახს მოვახმარო. არის მომენტები, რომლებსაც ვერ დააბრუნებ: პირველი სიტყვა, პირველი ნაბიჯი. ვნერვიულობ ამის გამო.



მეგობარი
უნგრელი კალათბურთელი ადამ ჰანგა "ბასკონიაში" თამაშობდა. ახლა "ბარსელონას" ღირსებას იცავს. ფილმის რეჟისორმა მას თორნიკეს შესახებ ჰკითხა.

- შენგელია ძალიან კარგი მეგობარია, მისთვის გუნდი დიდი ოჯახია. ეს ძალიან დასაფასებელია, რადგან ვიცით, რას ნიშნავს მისთვის ოჯახი.

მეგობრობის თემაზე თოკო მოკლედ საუბრობს:

- მეგობარი ჩემთვის ბევრს ნიშნავს. ეს ის ადამიანია, რომელსაც ენდობი როგორც კარგ, ასევე შენთვის მძიმე დროს.

15417
მკითხველის კომენტარები / 2 /
888
2
არა ცსკ-ს!!!
ნანი გაწერელუა
2
მართლაც საამაყო ადამიანია თოკო.თბილი ყურადღებიანი ყველას მიმართ.გაცნობისთანავე იგრძნობთ მის ამ თვისებას.გისურვებ შემდეგ წარმატებებს
მსგავსი ამბები
რუბრიკის სხვა სიახლეები
;