თორნიკე შენგელია ესპანეთში საუკეთესოდ აღიარეს!

"ტვიტერზე" ბევრი საინტერესო ინფორმაცია ელვის სისწრაფით მოდის. უჩვეულო რამ მოხდა ესპანეთის ჩემპიონატის მე-17 ტურის შემდეგ. "უნიკახას" "ტვიტერმა" გიორგი შერმადინის პოსტრი გამოაქვეყნა. მასზე ჩვენიანის სტატისტიკა იყო გამოფენილი: 23 ქულა, 5 მოხსნა, 9-დან 9 საჯარიმო, 26 მქკ. იქვე ეწერა - MVP.

პარალელურად ესპანეთის ჩემპიონატის ოფიციალურ "ტვიტერზე" თორნიკე შენგელიას პოსტერი გამოქვეყნდა, მასაც MVP ეწერა და მოხმობილი იყო ასევე ეფექტური მონაგარი: 22 ქულა, 8 მოხსნა, 34 მქკ.

მოკლედ, უნიკალური შემთხვევის მომსწრენი გავხდით: ისტორიაში პირველად ესპანეთის ჩემპიონატში ტურის საუკეთესოობას ორი ქართველი ეცილებოდა. "უნიკახას" "ტვიტერმა" შერმადინი "გრან კანარიასთან" მატჩის საუკეთესოდ დაასახელა და ტურის MVP-ად წარადგინა.

თუმცა ესპანეთის ჩემპიონატის ოფიციალურმა საიტმა საუკეთესოობა თორნიკე შენგელიას არგუნა, რომელსაც ყველაზე მაღალი სარგებლიანობის კოეფიციენტი ჰქონდა.

ეს გახლავთ შენგელიას ტურის საუკეთესოდ აღიარების მეორე შემთხვევა ამ სეზონში. შეგახსენებთ, რომ იგი ერთხელ ევროლიგაზეც გამოარჩიეს.
ესპანეთის ლიგის საიტზე თოკოს კომენტარიც გამოქვეყნდა:

- საუკეთესოდ დასახელებაც სასიამოვნოა, მაგრამ, პირველ რიგში "ბეტისთან" გამარჯვება მახარებს. სწორედ ამ მოგებით მივაღწიეთ ესპანეთის სამეფო თასს. მადლობა ღმერთს, ამ წარმატებაში მეც შევიტანე წვლილი. დიდად დამეხმარნენ ჩემი თანაგუნდელები და მწვრთნელები.

შენგელიამ მომავალზეც ილაპარაკა:

- კარგი მომენტია, გუნდი აღმავლობის გზაზეა, მაგრამ თუ წარმატებული სეზონი გვინდა კიდევ უკეთეს კონდიციებში უნდა შევხვდეთ ესპანეთის ჩემპიონატის პლეი ოფსა და სამეფო თასს. მჯერა, რომ შეგვიძლია ესპანეთის ჩემპიონატის ფინალში გასვლაც და ევროლიგის ფინალურ ოთხეულში თამაშიც.

2320
მკითხველის კომენტარები / 0 /
მსგავსი ამბები
რუბრიკის სხვა სიახლეები