თორნიკე შენგელია მოედანზე ვერ იქნება, ზუროსმა სიტუაცია ახსნა -'ვგავარ ჯადოქარს'?

30.11 ესტონეთი vs საქართველო
03.12 საქართველო vs ისრაელი

საქართველოს კალათბურთელთა ეროვნული ნაკრები მსოფლიოს 2019 წლის ჩემპიონატის შესარჩევი ტურნირის მეორე ეტაპზე ასპარეზობას განაგრძობს. ილიას ზუროსის გაწვრთნილი ნაკრები 30 ნოემბერს ტალინში ესტონეთს, ხოლო 3 დეკემბერს - თბილისში ისრაელის ნაკრებს ეთამაშება.

საქართველოს ნაკრები 23 ნოემბრიდან გაფართოებული შემადგენლობით თბილისის ოლიმპიურ სასახლეში ემზადება. ილიას ზუროსმა ნაკრებში გამოიძახა სუპერლიგის მოთამაშეები და ლეგიონერები, რომელთაგან საბოლოოდ 12 მოთამაშეს შეარჩევს.

ლეგიონერები ნაკრებს დღითი-დღე უერთდებიან და 27 ნოემბერს ზუროსის განკარგულებაში ყველა ის მოთამაშე იქნება, რომელთაგანაც ესტონეთსა და ისრაელის ნაკრებებთან სათამაშოდ შემადგენლობას დააკომპლექტებს.

სადღეისოდ 23 კალათბურთელია გამოძახებული, რომელთაგან ევროლიგის წარმომადგენლები ვერ დაგვეხმარებიან. თორნიკე შენგელიასა და მეტ ჯენინგს "ბასკონია" არ უშვებს, რადგან ევროლიგის მატჩი აქვს სანაკრებო ფანჯრის დროს. სამწუხაროა, მაგრამ ფიბა და ევროლიგა ჯერაც ვერ მორიგებულან. იმედი დავიტოვოთ, რომ ეს დაპირისპირება ტროას ომივით 10 წელიწადს არ გაგრძელდება.

ასევე ვერ ჩამოდის სანდრო მამუკელაშვილი, რომელიც ამერიკის კოლეჯების ლიგაშია, "სეტონ ჰოლის" ერთ-ერთი ლიდერია და შუა სეზონში ამერიკელები მას ვერ შეელევიან.

გემახსოვრებათ, შარშან ამ დროს გუნდში ტრავმების ეპიდემია იყო, გვაკლდა სანაძე, ცინცაძე, ბურჯანაძე... ამჯერად ტრავმამ მხოლოდ ერთი კალათბურთელი გამოგვაკლო - მანუჩარ მარკოიშვილი, რომელმაც ოპერაცია გაიკეთა და სანაკრებო მატჩებამდე რეაბილიტაცია ვერ მოასწრო. მანუთი და მის გარეშე საქართველოს ნაკრები სხვადასხვაა, თუმცა იმედი დავიტოვოთ, რომ თებერვლამდე მანუჩარი მომჯობინდება კიდეც, ფორმაშიც შევა და სათამაშო პრაქტიკასაც აიღებს.

სასიამოვნო და სასიხარულოა გუნდში ბექა ბურჯანაძის დაბრუნება, რომელმაც ეროვნულ ნაკრებში ბოლო ოფიციალური მატჩი 2016 წლის 17 სექტემბერს მონტენეგროში გამართა. ბექა უკვე ფორმაშია, რასაც ესპანეთის ჩემპიონატში მისი გამოსვლა ადასტურებს - ბოლო მატჩში ორმაგი დუბლი შეასრულა.

თუ შემადგენლობას კარგად გადავხედავთ, ერთ დებიუტანტსაც აღმოვაჩენთ. ეს გახლავთ დუდა სანაძის ძმა სანდრო სანაძე, რომელიც ძმისა და მამის მსგავსად მშვენიერი სნაიპერია.

საქართველოს ნაკრებმა მეორე საკვალიფიკაციო ეტაპზე უკვე გამართა 2 შეხვედრა: 13 სექტემბერს თელ ავივში ისრაელს 85:80 სძლია, ხოლო 16 სექტემბერს თბილისში, ბოლო წამზე - 85:86 დამარცხდა საბერძნეთთან.

შეგახსენებთ, რომ პირველი საკვალიფიკაციო ეტაპის შემდეგ მოხდა ჯგუფების გაერთიანება. ანუ ჩვენი ჯგუფიდან გასული 3 გუნდი (გერმანია, სერბეთი, საქართველო) სხვა ჯგუფის 3 საუკეთესოსთან (საბერძნეთი, ისრაელი, ესტონეთი) გაერთიანდა. პირველ ეტაპზე დაგროვილი ქულები ყველა გუნდს მეორე ეტაპზე გადმოჰყვა. შესაბამისად, აქამდე ერთ ჯგუფში მყოფი გუნდები ერთმანეთს არ დაუპირისპირდებიან. მეორე საკვალიფიკაციო ეტაპზე ჩვენი ჯგუფის ფავორიტები არიან გერმანია და საბერძნეთი, რომლებსაც პირველი ეტაპიდან 6-6 გამარჯვება გადმოჰყვათ.

საქართველოს ეროვნული ნაკრების გაფართოებული შემადგენლობა

მოთამაშე პოზიცია ნომრით სიმაღლე გუნდი
გიორგი ცინცაძე 1 192 ალ-შამალი (ყატარი)
თედ მაკფადენი 1/2 188 გრან კანარია (ესპანეთი, ACB)
ლუკა ბულაშვილი 1/2 192 კულერედო (ესპანეთი, EBA)
რატი ანდრონიკაშვილი 1 192 ბასკონია (ესპანეთი, ACB)
დუდა სანაძე 2 196 თავისუფალი აგენტი
მეტ ჯენინგი 2/3 196 ბასკონია (ესპანეთი, ACB)
მიხაელ ჭოჭუა 2/3 194 დინამო
მერაბ ბოქოლიშვილი 2/3 194 დინამო
რევაზ როგავა 2 193 ოლიმპი
ლევან ფაცაცია 2/3 197 ქუთაისი
სანდრო სანაძე 2 190 თსუ-ჰიუნდაი
მიხეილ ბერიშვილი 3/4 203 ალ-შამალი (ყატარი)
ნიკა დარბაიძე 3/4 201 ოლიმპი
თორნიკე შენგელია 4 208 ბასკონია (ესპანეთი, ACB)
ბექა ბურჯანაძე 4 203 გიპუზკოა ბასკეტ(ესპანეთი,ACB)
სანდრო მამუკელაშვილი 3/4 208 სეტონ ჰოლი (აშშ, NCAA)
ილია ლონდარიძე 4/5 205 თავისუფალი აგენტი
გიორგი შერმადინი 5 216 უნიკახა (ესპანეთი, ACB)
გოგა ბითაძე 5 211 მეგა ბიმაქსი (სერბეთი)
აკაკი დვალიშვილი 4/5 206 ქუთაისი
ბექა ბექაური 4/5 208 მარნეული
გიორგი ტურძილაძე 5 208 კაკტუსი
გეგი ბაქრაძე 5 203 მარნეული

მთავარი მწვრთნელი: ილიას ზუროსი
ასისტენტები: გიორგიოს ლინმაიტისი, მილოშ გლიგორიევიჩი, ტიხომირ ბუიანი, თემურ კანკია, დიმიტრი ჟაკობოვი.
ფიზმომზადების მწვრთნელი: ირაკლი შიოშვილი.

ყოველდღიური სპორტული გაზეთი "ლელო"
1539
მკითხველის კომენტარები / 0 /
მსგავსი ამბები
რუბრიკის სხვა სიახლეები
;