თორნიკე შენგელია: ფენერბაჰჩესთან საბრძოლველად მზად ვართ!

დღეს თორნიკე შენგელიას "ბასკონია" ევროლიგაზე პლეი ოფს იწყებს - პირველ წრეში ტურნირის შარშანდელ ჩემპიონ "ფენერბაჰჩეს" ეთამაშება. პირველი მატჩი სტამბოლშია.

გუნდის ქართველი კაპიტანი თურქეთში გაფრენამდე მედიის ყურადღების ცენტრში მოექცა, მან მომავალ თამაშზე პრესკონფერენციაზე ილაპარაკა:

"ჩვენ მხოლოდ მომდევნო მატჩზე ვფიქრობთ და არა მთელ სერიაზე, ნაბიჯ-ნაბიჯ უნდა წავიწიოთ წინ, ხოლო პირველი დაპირისპირებისთვის სათანადოდ ვართ მომზადებულები.

ალბათ იმის ახსნა საჭირო არ არის, რომ "ფენერბაჰჩე" ბრწყინვალე გუნდია, ის ერთ-ერთი საუკეთესოა ევროპაში. ჩვენს მეტოქეს ყველაფერი კარგად გამოსდის - დაცვა, ფარზე თამაში, შორიდან სროლა, დრიბლინგი, მაგრამ ჩვენც კარგი გუნდი ვართ, როცა დაცვაში ფარზე ბურთს ვიგებთ და ვუტევთ, ძალიან საშიში ვართ ნებისმიერი მეტოქისთვის.

თურქებთან რეგულარული სეზონის მატჩები ახლა არ ითვლება, პლეი ოფი სულ სხვა ტიპის დაპირისპირებაა. ჩვენ ერთნაირად კარგად უნდა ვითამაშოთ დაცვასა და შეტევაში და უნდა გვახსოვდეს, რომ სერია არ წყდება ერთი მატჩის მოგებით ან წაგებით".

შეგახსენებთ, რომ ევროლიგის პლეი ოფის პირველი წრის სერია სამ მოგებამდე გრძელდება, მე-2 ადგილზე გასულ "ფენერბაჰჩეს" საშინაო დაპირისპირების უპირატესობა აქვს ბასკებთან.

პირველი 2 შეხვედრა სტამბოლში გაიმართება, შემდეგი 2 (თუ საჭირო გახდა ორი) - ვიტორიაში. თუ მეხუთე დაპირისპირებაც საჭირო გახდება, ის უკვე სტამბოლში გაიმართება.

ყოველდღიური სპორტული გაზეთი "ლელო"
640
მკითხველის კომენტარები / 0 /
მსგავსი ამბები
რუბრიკის სხვა სიახლეები
;