თორნიკე შენგელია ფინიქსს სურს, მაგრამ...

ბილბაოში გამომავალი El Correro  ამტკიცებს, რომ "ფინიქს სანსს", რომლის მწვრთნელიც საქართველოს ნაკრების ყოფილი თავკაცი იგორ კოკოშკოვია, "ბასკონიას" ქართველი კაპიტანი თორნიკე შენგელია სურს.

ამისთვის საჭიროა, ამერიკულმა კლუბმა მილიონი დოლარი გადაუხადოს ესპანურს შენგელიას გამოსასყიდად. ეროვნული საკალათბურთო ასოციაციის წესების თანახმად, ფინიქსს მხოლოდ 725 ათასი დოლარის გადახდა შეუძლია, დანარჩენი თავად კალათბურთელმა უნდა დაამატოს.

თუმცა ვიტორიულ კლუბში თავს მშვიდად გრძნობენ - "ბასკონიაში" დარწმუნებულები არიან, რომ ისინი ლიდერსა და კაპიტანს შეინარჩუნებენ.

2018/19 წლების სეზონი ბასკონიასთვის უმნიშვნელოვანესია, რადგან ევროლიგის ოთხთა ფინალი ბასკთა ქვეყნის დედაქალაქში გაიმართება.

მიუხედავად ამ პერსპექტივისა, გუნდმა უკვე დაკარგა ორი მოწინავე კალათბურთელი - ფრანგი როდრიგ ბობუა თურქულ "ეფესში" გადაბარგდა, ხოლო ლატვიელი იანი ტიმა - ბერძნულ "ოლიმპიაკოსში".

შეგახსენებთ, რომ მედიაში არაერთხელ გაჟღერდა, რომ "ოლიმპიაკოსი" და მოსკოვის ცსკა თორნიკე შენგელიათი დაინტერესდა. ბობუასა და ტიმას ნაცვლად "ბასკონიამ" სენეგალელი იუსუფა ფოლი და დანიის ნაკრების ამერიკელი ფორვარდი შევონ შილდსი დაიმატა.

ორი მიზეზი, რის გამოც "ბასკონიაში" ეიმედებათ, რომ თორნიკე მინიმუმ ამ სეზონს ისევ ბასკონიაში გაატარებს - პირველი, NBA-ის კლუბებისთვის დაწესებულ გამოსასყიდ თანხას (მილიონი დოლარი) კონტრაქტით ვადა ამ დღეებში გაუვიდა და მეორეც, "ფინიქსის" დაინტერესებას სერიოზულობა აკლია, თორნიკე "ბასკონიას" ლიდერი და ევროლიგის საუკეთესო მძიმე ფორვარდია, ასეთ კალათბურთელს კი ამერიკულმა კლუბმა სერიოზული წინადადებით უნდა მიმართოს და არ უნდა აიძულოს კონტრაქტის ნაწილი თავად გამოისყიდოს.

ყოველდღიური სპორტული გაზეთი "ლელო"
1672
მკითხველის კომენტარები / 0 /
მსგავსი ამბები
რუბრიკის სხვა სიახლეები