თორნიკე შენგელია NBA-ში... [VIDEO highlights]

27 წლის თორნიკე შენგელიამ "ბასკონიასთან" მეგაკონტრაქტი გააფორმა. თანხა არ დასახელებულა, თუმცა ესპანელები წერენ, რომ ევროპაში ერთ-ერთი ყველაზე მაღალანაზღაურებადი კალათბურთელი იქნება.

რატომ გაფორმდა ასეთი მსუყე და ხანგრძლივი (2022 წლამდე) ხელშეკრულება? მიზეზი მომავალ სეზონში უნდა ვეძებოთ: 2019 წლის გაზაფხულზე "ბასკონია" ევროლიგის ოთხთა ფინალს მასპინძლობს.

როგორ აატრიალა შენგელიამ ავსტრია [VIDEO]

ამ შეჯიბრების ნახევარფინალში გასვლა ბასკებისთვის სასიცოცხლოდ მნიშვნელოვანია. საამისოდ ძლიერი შემადგენლობა სჭირდებათ, ამიტომაც, პირველ რიგში ლიდერი და კაპიტანი შენგელია დაიყოლიეს.

ასე რომ არ მოქცეულიყვნენ, თორნიკეს NBA-ს რომელიმე გუნდთან უკვე ექნებოდა კონტრაქტი, რადგან ის საკუთარი შესაძლებლობებითა და მომზადებით NBA-ს ეკუთვნის.

რატომ? ქვემოთ წაიკითხავთ.

ნაკრები

ვინ არის იანის ანტატოკუნმპო? - NBA-ს ვარსკვლავი.

ვინ არის თორნიკე შენგელია? - ევროპის ვარსკვლავი.

2015 წლის თებერვალში დავწერე პუბლიკაცია, რომელშიც საქართველოს ნაკრებსა და "მიოლუოკი ბაქსს" შორის გარკვეული პარალელი გავავლე. იმხანად ზაზა ფაჩულია მილუოკელთა შემადგენლობაშიც თამაშობდა და საქართველოს ნაკრებშიც.

ზაზას "მილუოკიში" ფორვარდის პოზიციიდან იანის ანტეტოკუნმპო ეხმარებოდა, ნაკრებში - თორნიკე შენგელია. სწორედ მაშინ ვთქვი თამამად: 2015 წლის ევრობასკეტზე თორნიკე შენგელია უფრო ეფექტური იქნება, ვიდრე იანის ანტეტოკუნმპო-მეთქი.

ამ სიტყვებმა ახლა შეიძლება ბევრი გააკვირვოს, იანისი ხომ NBA-ში რიგითი კალათბურთელი კი არა, უმაღლესი დონის ვარსკვლავიაო! მაგრამ მაშინ ნაციონალურ ასოციაციაში მეორე სეზონს ატარებდა, ძალიან ჭყინტი იყო. თუმცა მაშინდელი წერილის კომენტარებში ბევრი ისეთი "ეპითეტი" მივიღე, ახლაც რომ არ დამვიწყებია.

თამამად იმიტომ ვწერდი, რომ ვიცოდი: ანტეტოკუნმპო სპანულისების, ბურუსისებისა და პრინტეზისების გარემოცვაში ისევე ეფექტური ვერ იქნებოდა, როგორც თორნიკე შენგელია - ფაჩულია-სანიკიძე-შერმადინის გარემოცვაში.

გასათვალისწინებელი იყო ამერიკული და ევროპული საკალათბურთო სტილი: ოკეანის გაღმა ისეთი კალათბურთია, თავისუფალი სივრცეები ხშირდ რჩება. ამის მიზეზი შეიძლება იყოს ის, რომ მოთამაშეებს ერთმანეთის დაზღვევა არცთუ ისე უყვართ ან მწვრთნელი არ სთხოვს... კიდევ უამრავი მიზეზის ჩამოთვლა შეიძლება.

საამაყო სანახავი: თორნიკე შენგელიამ \"რეალს\" მადრიდში სძლია!

ფაქტი ერთია: NBA-ში მეურვის მოტყუების შემდეგ შესაძლოა კალათისკენ აღარავინ შეგხვდეს, ევროპაში - მეურვეს თუ მოატყუებ დაზღვევაზე მეორე წამოვა, შემდეგ მესამე, მეოთხე, მეხუთე, მეექ... ჰო, შეიძლება მეექვსედ სათადარიგოთა სკამიდან გადმოგიხტეს ვინმე! ძალიან მჭიდრო დაცვაა.
ევრობასკეტი 2015-ზე ჩემი ნათქვამის სიმართლეში დასარწმუნებლად მშვენიერი შანსი არსებობდა: საბერძნეთი ჩვენს ჯგუფში მოხვდა. შენგელია-ანტატოკუნმპოს დუელი 8 სექტემბერს "ზაგრებ არენაზე" ვიხილეთ.

აი სტატისტიკაც:

იანისი: 28 წუთი, 12 ქულა, 3 მოხსნა. 5-დან 3 ორქულიანი, 4-დან 2 სამიანი.

თოკო: 33 წუთი, 20 ქულა, 8 მოხსნა. 12-დან 8 ორქულიანი, 1-დან 1 სამიანი, 4-დან 1 საჯარიმო.

უშუალო დუელში ქართველმა აჯობა, მატჩი კი საბერძნეთმა 79:68 მოიგო.

თორნიკე შენგელიამ ელინებთან იმ სტილში ითამაშა, როგორსაც იანისი "მილუოკიშია" მიჩვეული, სწრაფი დრიბლინგი, გზიდან 2-3 კაცის ჩამოშორება და... 20 ქულა.

მახსოვს, ნამატჩევს მწვრთნელ იგორ კოკოშკოვს ვკითხე: ასეთ სტილში აქამდე რატომ არ ვთამაშობდით-მეთქი.

ეს იყო 2015 წელს. თორნიკე დღესაც ევროპაშია, ანტეტოკუნმპო კი NBA-ს "ოლ სტარია" გამოკითხვაში ლებრონ ჯეიმსზე მეტ ხმას აგროვებს. იგი მართლაც სუპერვარსკვლავია. არის იმ დონეზე, რა დონეზეც უნდა იყოს.



მილუოკი და ბრუკლინი

მე კი, ამჯერადაც თამამად დავწერ: თორნიკე შენგელია ევროპაშია, მაგრამ NBA-ს ეკუთვნის. იგი 2017 წლის ევროპელ კალათბურთელთა საპატიო ათეულში რომ მოხვდა, სწორედ მაშინ გავამახვილე ყურადღება - ზემოთნახსენები ათიდან რვა ნაციონალური საკალათბურთო ასოციაციის წევრია-თქო. თოკოც მალე წავა ოკეანის გაღმა.

თუმცა რომ არა ერთი გარემოება, შეიძლებოდა დღესაც NBA-ში ყოფილიყო. ეს ის გარემოებაა, რამაც ანტეტოკუნმპო უმოკლეს ხანში აქცია სუპერვარსკვლავად. აი, რას ვგულისხმობ:

2013 წლის დრაფტზე ბერძენი ახალგაზრდა "მილუოკიმ" აიყვანა, გუნდმა, რომელმაც იანისთან ერთად პირველ სეზონში მხოლოდ 15 მატჩი მოიგო.

- როდესაც გუნდი თამაშს თამაშზე აგებს, მწვრთნელი თავის გასამართლებლად ამბობს: მომავლის გუნდს ვაშენებ, აქცენტს ახალგაზრდებზე ვაკეთებო, - ეს რამდენიმე წლის წინ ვლადიმერ სტეფანიამ მითხრა.

სწორედ ასეთ გუნდში მოხვდა ანტეტოკუნმპო, სათამაშო დრო საკმარისად ჰქონდა, 6.8 ქულასა და 4.4 მოხსნას აგროვებდა. ზაზა ფაჩულია ვეტერანად ითვლებოდა და ყოველმხრივ ეხმარებოდა - მოედანზე პასებით თუ მოედნის მიღმა რჩევა-დარიგებებით.

2012 წელს თორნიკე შენგელიას გაცილებით მეტი ჰყავდა მრჩეველ-დამრიგებელი. ის ხომ NBA-ს დრაფტის შემდეგ ვარსკვლავებით გადაჭედილ "ბრუკლინში" მოხვდა. რომელი ერთი ჩამოვთვალოთ: კევინ გარნეტი, პოლ პირსი, დერონ უილიამსი, ჯო ჯონსონი, ანდრეი კირილენკო...
სხვათა შორის, კირილენკომ თავიდან ვერ დაიჯერა, რომ თორნიკე კახას ვაჟი იყო. 90-იან წლებში იგი კახასთანაც თამაშობდა მოსკოვში.

ასეთ თანავარსკვლავედში მოხვედრა თოკოსთვის ძალიან საპატიო გახლდათ, მაგრამ არა სასარგებლო - მწვრთნელი სათამაშო დროს ახალგაზრდა ქართველისთვის ვერ ნახულობდა, "ბრუკლინი" კი "გოლდენ სტეიტივით" მესამე პერიოდში ვერ იგებდა თამაშებს, რომ მეოთხე თორმეტწუთეულში მაინც გამოსულიყვნენ ახალბედები.

შენგელიასთვის 2013 წლის "მილუოკი" ზედგამოჭრილი იქნებოდა...

- როდესაც მატჩებისას მოედანზე გასვლა არ გიწევს, ძნელია განვითარდე. ინდივიდუალურად რამდენიც უნდა ივარჯიშო, სათამაშო პრაქტიკა სულ სხვაა. ნაციონალურ საკალათბურთო ასოციაციაში კი, გუნდური ვარჯიშებიც არ არის ხშირი, რადგან თითქმის ყოველ ორ დღეში ერთხელ თამაშია, - მითხრა თორნიკე შენგელიამ 2014 წელს და ევროპაში დაბრუნდა.

დაბრუნდა იმიტომ რომ დაბრუნებულიყო... ევროპიდან ამერიკაში.



ბასკონია

ბასკებმა ევროპაში, ალბათ, ყველაზე უკეთ იციან, როგორ მოამზადონ კალათბურთელი NBA-სთვის. გამოცდილების ამბავია: სხვადასხვა დროს "ბასკონიიდან" ნაციონალურ საკალათბურთო ლიგაში წავიდნენ სპლიტერი, სკოლა, ტელეტოვიჩი, პრიჯიონი...

თორნიკე შენგელია შეუდგა NBA-სთვის მზადებას ქალაქ ვიტორიაში. საამისოდ სჭირდებოდა დიდი გუდა, რომელშიც უნდა ჩაელაგებინა საგზალი: ღონე, საშუალო ტყორცნები, სამიანები, საჯარიმოები, სისწრაფე, დრიბლინგი, დაცვა...

2014 წელს იგი ევროპული საზომებით სისწრაფითაც გამორჩეული იყო, დრიბლინგითაც, დაცვაშიც და ღონე ხომ ბუნებრივად ჰქონდა. თუმცა ისიც ესმოდა, რომ ამერიკაში "ტურბო რეჟიმი" სჭირდებოდა და კიდევ ბევრი უნდა ეშრომა.

ყველაზე მეტი სამუშაო სამქულიანებსა და საშუალო ტყორცნებზე ჰქონდა. იმუშავა იმდენი, რომ ევროპის 2017 წლის ევრობასკეტზე მისი საშუალო დისტანციიდან ჩაგდებული ორიანი (თანაც ტრიალში) რომ ვნახე, პირველი, რაც გავიფიქრე ეს იყო - აი, რა სჭირდება ამერიკაში-მეთქი. მეორეც ასეთი ჩააგდო, მესამეც... ეს უკვე იმას ნიშნავდა, რომ ძალიან ბევრი დრო ჰქონდა დახარჯული ამ კომპონენტის გამოსწორებაზე.

შესაძლოა, ევროლიგის მატჩში ბურთს რომ მიიღებს, საშუალოს ტყორცნას ფარქვეშ შესვლა ამჯობინოს (იმიტომ, რომ რთულია ასეთი ღონისა და მოქნილობის კაცს წინ აღუდგე), მაგრამ როდესაც შენს წინაშე ლებრონ ჯეიმსი აღიმართება, "მეფემ" არ უნდა იცოდეს რომ მხოლოდ ფარქვეშ შესვლა შეგიძლია, საშუალო ორქულიანისაც უნდა ეშინოდეს და სამქულიანის რკალთან თუ ახვალ, იქ უნდა აგყვეს.

თოკო ევროლიგაზე საშუალოდ 15.3 ქულას, 6 მოხსნასა და 1.8 პასს აგროვებს. იგი "ბასკონიას" კაპიტანი და ხერხემალია. შრომაც დაფასდა: 2018 წელს ევროლიგის სიმბოლურ ხუთეულში მოხვდა...

ასეთ კალათბურთელზე დასაკვირვებლად ამერიკიდან სკაუტი სკაუტზე მოდის, მაგრამ მას ჯერ ევროლიგის ფინალური ოთხეული აქვს სათამაშო "ბასკონიასთან" ერთად, მოედანზე, რომელიც დიდუბის მანეჟის და სპორტის სასახლის დარბაზებთან ერთად მისთვის უკვე მშობლიურია.

2019 წელს კი, ამერიკაში წავა. ამის საშუალებას ახალ კონტრაქტში ჩადებული ერთი პუნქტი აძლევს.



T.S. გახსოვთ, რა დავწერე დასაწყისში? - ნაციონალურ საკალათბურთო ასოციაციასთან შედარებით ევროლიგაზე მეტი სიმჭიდროვეა-მეთქი. ასეთ პირობებში თორნიკეს სისწრაფის ასაკრეფად ევროპაში სივრცე არ ჰყოფნის. ამიერიკაში ეყოფა...
ამიტომაც უნდა თამაშობდეს NBA-ში.

2696
მკითხველის კომენტარები / 0 /
მსგავსი ამბები
რუბრიკის სხვა სიახლეები
;