...თურმე, რას შეეწირა მიშელ პლატინი! ქართული ფეხბურთის ხაფანგი, ანუ უფასო ყველი მხოლოდ სათაგურშია

თითქოს, ესღა აკლდა და, ქართული ფეხბურთი ახალ სკანდალში გაეხვა. ამბავია ახალი, ახალი პერსონაჟებით, თორემ სქემა ძველი და ნაცადი...

მაფია უკვდავია

2016 წელს უკრაინის ფეხბურთის ფედერაციის საპატიო პრეზიდენტმა, დღეს კი უეფას ვიცე-პრეზიდენტმა გრიგორი სურკისმა სენსაციური განცხადება გააკეთა - მიშელ პლატინი უეფას პრეზიდენტის პოსტიდან, სინამდვილეში, არა კორუფციის, არამედ, სხვა მიზეზით გადააყენესო და დააკონკრეტა კიდეც.

"მიშელ პლატინი სულ სხვა რამის გამო დასაჯეს. რეალურად, ის შეთქმულების მსხვერპლი გახდა. პლატინი მიუღებელი აღმოჩნდა საკუთარი იდეების გამო, რაც ფეხბურთში კორუფციის აღმოფხვრას შეუწყობდა ხელს. დეტალურად მომზადებული ინტრიგების შედეგად, ლეგენდარული ფრანგი პოსტიდან გადააყენეს. განსაკუთრებით აღსანიშნავია პლატინის და მისი პერიოდის უეფას კოლოსალური მცდელობა, რომელიც მიმართული იყო ფეხბურთიდან უსამართლო თამაშისა და მანიპულირებული შედეგების წინააღმდეგ, მათ შოირს, ბრძოლა იატაკქვეშა ტოტალიზატორებთანაც", - თქვა მაშინ "ფუტბოლკლუბთან" გრიგორი სურკისმა.

როგორც ამ შემთხვევაში იტყვიან - მაფია უკვდავია! ის პლატინის მოერია და რა გასაკვირია, რომ საქართველოსაც უდიდეს პრობლემებს უქმნის. მაფია უკვდავია, მაგრამ ზოგჯერ ძლიერია, ზოგჯერ კი - სუსტი. გააჩნია, ვინ და როგორ ებრძვის.

"მსოფლიოში საფეხბურთო თამაშებზე თანხების 80 პროცენტი აზიაში კეთდება", - ასეთი იყო სპორტულ აზარტულ თამაშებზე დამკვირვებელი ორგანიზაციების ინფორმაცია. მათი ცნობით, აქცენტი პატარა საფეხბურთო ქვეყნების დაბალი რანგის და დაფინანსებით უკმაყოფილო გუნდებზე კეთდება.

საქართველოში ამ ქსელს დასაყრდენი გუნდებისა და მოთამაშეების უმრავლესობის გაჭირვების გამო გაუჩნდათ. თუმცა გაჭირვება ამას ნამდვილად ვერ ამართლებს. გამორჩეულად სკანდალური იყო 2014 წლის აპრილი, როცა გარიგებებში ლამის ყველა ქართული კლუბი მონაწილეობდა.

უეფას ინფორმაციებზე დაყრდნობით, 2010-13 წლებში ჩაწყობილ თამაშებში მონაწილეობისთვის უმაღლესი და პირველი ლიგების 5 კლუბი ამხილეს, მაგრამ... საქართველოს ფეხბურთის ფედერაციის სადისციპლინო კომიტეტის სხდომაზე მათ მხოლოდ ფინანსური სასჯელები აკმარეს.

საეჭვო მატჩების კატეგორიაში ბოლნისის "სიონი" 5-ჯერ მოხვდა, გორის "დილა" და მარტვილის "მერანი" - 4-4-ჯერ, ხოლო ფოთის "კოლხეთი" და რუსთავის "მეტალურგი" - 3-3-ჯერ. სასჯელი კი მეტად არაადეკვატური იყო: "სიონი" 25 ათასი ლარით დაჯარიმდა, "მერანი" და "დილა" - 23-23 ათასით, ხოლო "მეტალურგი" და "კოლხეთი" - 20-20 ათასით.

ამ თემაზე მაშინ "ლელოსთან" სფფ-ის სადისციპლინო კომიტეტის წევრმა ზვიად ქორიძემ ილაპარაკა და ასეთი მსუბუქი სასჯელები შემდეგნაირად ახსნა:

"ჩვენ უეფას ინფორმაციას ვეყრდნობოდით, რომელიც, თავის მხრივ, თაღლითური ფსონების ამოცნობის სისტემის მოხსენებით ბარათებს ენდობა. ძალიან ბევრი ფაქტი გამოვლინდა. საქართველოს ჩემპიონატის მატჩებზე ფსონებს აზიის სხვადასხვა ქვეყანაში იღებდნენ, სადაც ტოტალიზატორებს უეფა მუდმივად აკონტროლებს...

როგორც ჩანს, საკმაოდ აწყობილი სისტემა მუშაობდა - ფსონებს იღებდნენ არა მხოლოდ შედეგებზე, არამედ ეგრეთ წოდებულ "ცოცხალზეც" და ასე შემდეგ. ამ სიაში თითოჯერ საქართველოს ჩემპიონატის უმაღლესი და პირველი ლიგის ლამის ყველა კლუბი ფიგურირებდა...

უეფას რეკომენდაციაა, რომ მხოლოდ 3-ჯერ და მეტჯერ მოხვედრილი კლუბები დაისაჯონ. ასე რომ, გარიგებულ მატჩებში შემჩნეული კლუბები უეფას უნდა უმადლოდნენ, ყველა რომ არ დავსაჯეთ. მაგრამ არიან კლუბები, რომლებიც უეფას ამ სიაში არ მოხვდნენ".

როგორც ჩერჩილი იტყოდა...

ზოგადად, გარიგებულ მატჩებთან ბრძოლა მხოლოდ ფაქტების გამოვლენითა და დამნაშავეების დასჯით არ უნდა შემოიფარგლებოდეს. ყველაზე კარგი პრევენცია შემოსავლების ზრდაა. მაგრამ ჩვენს შემთხვევაში, ეს სადღეგრძელოსავით ისმის, რეალურად კი ამის განხორციელება ძალიან ძნელია.

2016 წლის შემდეგ ქართულ ფეხბურთში მსგავსი სკანდალი არ გვახსენდება. მაგრამ მაფია უკვდავია, ის მოდის და ცდილობს, გარყვნას ყველა, ოღონდ კი დიდი შემოსავალი ჩაიჯიბოს.

ცნობისთვის - უმრავლეს შემთხვევაში, მოთამაშეებს გარიგებას შეგზავნილი პირი სთავაზობდა და დროა, ფეხბურთელები მიხვდნენ, რომ მათ ფულის ნაცვლად ხაფანგს უმზადებენ - ეს უინსტონ ჩერჩილის სიტყვების კლასიკური დასტურია, რომ "უფასო ყველი მხოლოდ სათაგურშია".

ყოველდღიური სპორტული გაზეთი "ლელო"
1570
მკითხველის კომენტარები / 0 /
მსგავსი ამბები
რუბრიკის სხვა სიახლეები
;