თურქიც სომეხად ეჩვენება: ჰაჯი ალიევმა მსოფლიოს ჩემპიონატზე თავის წარუმატებელ გამოსვლას საინტერესო ახსნა მოუძებნა

აზერბაიჯანელმა მოჭიდავემ, ვლადიმერ ხინჩეგაშვილის (65) ერთ-ერთმა მთავარმა კონკურენტმა, თავისუფალ ჭიდაობაში მსოფლიოსა და ევროპის სამ-სამგზის ჩემპიონმა, ოლიმპიურმა პრიზიორმა ჰაჯი ალიევმა, ვინც თავისი მარცხი მსაჯს გადააბრალა.

შეგახსენებთ, რომ ალიევი ყაზახეთში პირველივე წრეში დამარცხდა რუსთა მომავალ ჩემპიონ ჰაჯიმურად რაშიდოვთან, მერე კი დამამშვიდებელშიც დამარცხდა იაპონელ ტაკუტო ოტოგუროსთან და მედალს ვინღა დაეძებს, ულიცენზიოდაც დარჩა.

თუმცა მის ირგვლივ საინტერესო ამბები რაშიდოვთან მარცხს მოჰყვა. როგორც თავად ალიევი ჰყვება, მსაჯებმა რუსთა დაღესტანელს 4 ქულა მისცეს, ის კი მარცხისთვის გაწირეს. ამ შეხვედრას თურქი არბიტრი სჯიდა, თუმცა, ალიევის აზრით, ის თურქი კი არა, არამედ სომეხია და ამიტომაც მოექცა მას ასე უსამართლოდ. „ჩემს გვერდით ჩემი მეგობრები იყვნენ, რომლებიც შეხვედრის შემდეგ მთელი საღამო მამშვიდებდნენ, მაგრამ ფსიქოლოგიურად ვერ შევძელი იმ შეხვედრის დავიწყება. მთელი საღამო ასევე მწერდნენ მეგობრები, რომელთა შორისაც არიან ფეხბურთელები, კარატისტები, მომღერლები თუ სხვები. ისინი დარწმუნებულნი იყვნენ, რომ მე მოვიგე.

მომავალში კიდევ თუ დავინახავ ამ მსაჯს, მას აუცილებლად ვცემ, თუნდაც ამისთვის სამუდამო დისკვალიფიკაცია მომცენ - ყველაფერი ხდება და ერთ Dრეს ისედაც წავალთ სპორტიდან“ - განუცხადა აზერბაიჯანულ მედიას ალიევმა.

დამამშვიდებელში იაპონელთან წაგება მან იმით ახსნა, რომ წინა დღეს გადატანილი ამ უსიამოვნო ამბის დავიწყება ვერ შეძლო და ფსიქოლოგიურად არ იყო მზად იაპონელთან საჭიდაოდ. თან ის ფიზიკურად ძლიერია და გაუჭირდა, თორემ მანამდე შედარებით უფრო სუსტ ეგვიპტელს კი მოუგო.

შეგახსენებთ, რომ ალიევმა მსაჯზე რაშიდოვთან შეხვედრის დროსვე გაიწია, რისთვისაც მას წითელი ბარათი და დისკვალიფიკაციაც მისცეს, თუმცა შემდეგ ეს ბარათი გაუუქმეს, რითაც სანუგეშო წრეში გადასვლის და მედალ-ლიცენზიისთვის ბრძოლის უფლება მისცეს. ბუნებრივია, ამხელა შეღავათს ლამაზი თვალების გამო არავინ გაუკეთებდა - სავარაუდოდ, მსოფლიოს ფედერაციაში ჩაბუდებული აზერბაიჯანული ლობი აქტიურად ამოქმედდა და ზემგომთაც იმიტომ დაიხიეს უკან, მაგრამ ამით ალიევმა ვერ ისარგებლა.

თუმცა ჩვენთვის იქნებ კიდევ სჯობდა, რომ ესარგებლა და მედალი თუ არა, მინიმუმ, ლიცენზია მაინც მოეპოვებინა. მოგეხსენებათ, ამ წონაში ხინჩეგაშვილიც უმედლოდ დარჩა და მას სამომავლოდ სალიცენზიო შეჯიბრებებში ერთი ძლიერი კონკურენტი მოაკლდებოდა.

არადა, ალიევის გარდა, კიდევ რამდენიმე ძლიერი ფალავანი დარჩა ულიცენზიოდ. მაგალითად, თურქი სალაჰეტინ კილიჩსალაიანი, კუბელი ალეხანდრო ენრიკე ვალდეს ტობიერი, ირანელი ამირმოჰამად ბაბაკ იაზდანიჩერატი, „ძველი გვარდიის“ წევრები - რუმინელი ივან გუიდეა და მოლდოველი ანდრეი პერპელიტა...

ამასთან,  გასათვალისწინებელია მთელ ევროპაში მიმოფანტული ჩრდილოკავკასიური დისაპორა, რომელთა წარმომადგენლები ხშირად ფრიად არასაჭიდაო ქვეყნებიდან გამოდიან და წაფრმატებითაც ასპარეზობენ. ასევე ანგარიშგასაწევია სომხეთის, უკრაინის, ბელარუსის და სხვა მეტ-ნაკლებად ძლიერი საჭიდაო ქვეყნების ფალავნები - ყველა მათგანი იბრძოლებს ლიცენზიებისთვის, დარჩენილ სამიოდე სალიცენზიო ტურნირში კი საგზურს 2-3 სპორტსმენი თუ მიიღებს. ამიტომ მათი მოპოვება არ იქნება მთლად იოლი იმის მიუხედავად, რომ უკვე ლიცენზირებულები ანუ წონის ლიდერები არ იჭიდავებენ. ყოველ შემთხვევაში, ალიევი ამბობს, რომ ის ხელებს არ ჩამოუშვებს და იბრძოლებს არა მხოლოდ ლიცენზიის მოსაპოვებლად, არამედ იმისთვის, რომ გაისად ტოკიოში აზერბაიჯანს მედალიც მოუტანოს.

დაბოლოს კიდევ ერთი ინფორმაცია აზერბაიჯანის თავისუფალი სტილით მოჭიდავეთა ბანაკიდან: როგორც იქაური მედიისთვის გაკეთებული კომენტარებიდან ირკვევა, შესაძლოა, სამწვრთნელო შტაბიდან გაათავისუფლონ დაღესტანელი მწვრთნელი, მოსკოვის ოლიმპიადის ჩემპიონი საიპულა აბსაიდოვი. თურმე ის გუნდთან ერთად არ ყოფილა მსოფლიოს ჩემპიონატზე და თავად განაცხადა, რომ აპირებს შეხვდეს აზერბაიჯანის ჭიდაობის ფედერაციას და გაიგოს ამის მიზეზი. თუმცა მან ისიც დასძინა, რომ 10 წელიწადი იმუშავა აზერბაიჯანში, ჰქონდა წარმატებებიც და მზადაა, ფედერაციის ნებისმიერ გადაწყვეტილებას დაემორჩილოს. ჩვენ კი შეგახსენებთ, რომ აზერბაიჯანი მსოფლიოს ჩემპიონატზე ოქროს გარეშე დარჩა და მხოლოდ ორი ლიცენზია მოიპოვა.

ყოველდღიური სპორტული გაზეთი "ლელო"
949
მკითხველის კომენტარები / 0 /
რუბრიკის სხვა სიახლეები
;