თურქულ სიდეში შეკრებაზე მყოფმა თბილისის დინამომ პირველი გამარჯვება მოიპოვა

თურქულ სიდეში შეკრებაზე მყოფმა თბილისის "დინამომ" მეორე ამხანაგური მატჩი გამართა. საქართველოს ყველაზე ტიტულოვანი კლუბი პოლონური ექსტრაკლასას ბინადარ "სანდეციას" დაუპირისპირდა და 2:1 დაამარცხა.

თამაში გარდამავალი უპირატესობით წარიმართა. სპარინგის პირველ ნახევარში დინამოელები უკეთ გამოიყურებოდნენ და ორი გოლიც გაიტანეს. ანგარიში მე-20 წუთზე ლაშა თოთაძის საფირმო საჯარიმო დარტყმით გაიხსნა, ხოლო მეორე გოლი, პირველი ტაიმის მიწურულს, გიორგი კუციას ზუსტი გადაცემის შემდეგ აკაკი შულაიამ გაიტანა. შეხვედრის დებიუტში ერთი მომენტი პოლონელებსაც ჰქონდათ, თუმცა სიტუაცია მეკარე ოთარ გოშაძემ განმუხტა.

მეორე ტაიმი კახი კაჭარავამ ცვლილებებით განაახლა - გოშაძისა და 25-ე წუთზე დმიტრო ივანისენიას ნაცვლად შესული ნინუას გარდა, ყველა ფეხბურთელი გაიყვანა.

სათამაშო უპირატესობა "სანდეციას" ფეხბურთელებმა იგდეს ხელთ და 51-ე წუთზე ბარტოშმა ერთი გოლი გაქვითა, მანამდე კი ბაქარ ქარდავას ძლიერი დარტყმაა აღსანიშნავი, რომელიც მცირედით ასცდა პოლონელთა კარს.

ამის შემდეგ თამაში ძირთადად მოედნის ცენტრში მიმდინარეობდა. "სანდეციას" ფეხბურთელებმა რამდენიმე სახიფათო მომენტიც შექმნეს, მაგრამ გოშაძეს ვერ აჯობეს. ორ შემთხვევაში ლაშა ქოჩლაძემ და ქარდავამაც გაამწვავეს თამაში, მაგრამ უშედეგოდ. საბოლოოდ, 2:1.

დინამო: გოშაძე, ხარშილაძე, კობოური, თოთაძე, რუხაია, ივანისენია (25. ნინუა), კუცია, შულაია, ო. კიტეიშვილი, ერგემლიძე, ივანიშვილი; მეორე ტაიმში შევიდნენ: გაბიტაშვილი, ბ. ხარშილაძე, გადრანი, მარიანოვიჩი, ქარდავა, დარცმელია, ქოჩლაძე, პ. კიტეიშვილი, ბაბუნაძე, გაბუნია.

სანდეცია (სასტარტო): გლივა, ბარტოში, შუფრინი, ბუკო, მრაცი, გრიჩი, გალეცკი, დანეკი, ცეტნარსკი, ბრჟისკი, კოლევი.

მცირე ტრავმების გამო, თამაში დემეტრე ბულისკერიამ და ბუდუ ზივზივაძემ გამოტოვეს. მომდევნო სპარინგი 2 თებერვალსაა დაგეგმილი. "დინამოს" მეტოქე უკრაინული "ვორსკლა" იქნება.

ყოველდღიური სპორტული გაზეთი "ლელო"
1315
მკითხველის კომენტარები / 0 /
მსგავსი ამბები
რუბრიკის სხვა სიახლეები
;