თუშიშვილმა სეზონი დაასრულა

ხვალ ოსაკაში ამ სეზონის „დიდი მუზარადის“ ბოლო ტურნირი იწყება ძიუდოში, რომელშიც, წინასწარი მონაცემებით, 94 ქვეყნის 534 სპორტსმენი მიიღებს მონაწილეობას: 307 ვაჟი და 227 ქალი. მათ შორის ოთხი ქართველიც იქნება: ოლიმპიური და ევროპის ჩემპიონი ლაშა შავდათუაშვილი (73), ევროპის სამგზის და მსოფლიოს ჩემპიონი ავთანდილ ჭრიკიშვილი, ევროპის მესამე პრიზიორი ბექა ღვინიაშვილი (ორივე - 90) და ევროპის სამგზის ჩემპიონი, მსოფლიოს სამგზის ფინალისტი და ოლიმპიადის ვიცე-ჩემპიონი ვალერი ლიპარტელიანი (100). ეს კვარტეტი შეჯიბრების შემდეგ იქვე დარჩება ტურნირის შემდეგ გასამართავ ერთობლივ კემპზე, მერე კი ცალკე შეკრებასაც გაივლის. ამ ღონისძიებებზე ზემოხსენებულ კვარტეტს თბილისიდან მსოფლიოსა და ევროპული თამაშების ჩემპიონი ლუხუმ ჩხვიმიანი (60) და ევროპის ჩემპიონი, მსოფლიოს მესამე პრიზიორი ვაჟა მარგველაშვილიც (66) შეუერთდებიან. ისინი კემპშიც მიიღებენ მონაწილეობას და შემდეგ - შეკრებაშიც.

ერთობლივი კემპი ყველა ასეთი დიდი შეჯიბრების შემდეგ ტარდება და 4-5 დღეს მოიცავს. როგორც წესი, მასში ტურნირის მონაწილე ქვეყნების უმეტესობა გამოდის და, იმედია, ამჯერადაც ასე იქნება. ოსაკას კემპი 5-დღიანი იქნება - 30 ნოემბერს დასრულდება, მერე კი ჩვენები 10-დღიან საწვრთნელ შეკრებას გაივლიან - ნაწილი ოსაკაში ივარჯიშებს ადგილობრივ კლუბებთან, ნაწილი კი ტოკიოში გადავა იქაურ უნივერსიტეტში სავარჯიშოდ. როგორც გითხარით, ეს შეკრება 10 დეკემბერს დასრულდება, ჩვენები კი იქიდან ჩინეთში გადავლენ, სადაც 12-14 დეკემბერს ქალაქ ქინგდაოში მსოფლიოს მასტერსის ტურნირში გამოვლენ.

თავიდან ითქვა, რომ იაპონიაში შეკრებებზე ტურნირის მონაწილე კვარტეტს ყველა წონის პირველი ნომრები უნდა შეერთებოდნენ ანუ საუბარი იყო დარჩენილი ოთხი წონის პირველ ნომრებზე. თუმცა იმათგან ერთის - ევროპული თამაშებისა და მსოფლიოს მესამე პრიზიორ ლუკა მაისურაძის (81) ამბავი სწრაფადვე გაირკვა: ის 23-წლიანთა ნაკრებთან ერთად ემზადება და მისი წასვლა გამოირიცხა. სამაგიეროდ, მაისურაძე აუცილებლად გამოვა მასტერსზე, აი, მსოფლიოსა და ევროპის ჩემპიონის, აგრეთვე ევროპული თამაშების გამარჯვებულ გურამ თუშიშვილისთვის (+100) წლევანდელი სეზონი უკვე დასრულდა: მას ხელის ტრავმა აწუხებს და ამჯობინა, შინ დარჩეს  სამკურნალოდ. ის არც იაპონიაში წავა შეკრებებზე და მასტერსსაც გამოტოვებს.

მის გარდა, მასტერსს საქართველოს ჩემპიონი თემურ ნოზაძეც (60) დააკლდება: მან ამჯობინა, საქართველოში დარჩეს და აქ ივარჯიშოს ქვეყნის ჩემპიონატისთვის, რომელიც 28-29 დეკემბერს ჩატარდება, თუმცა, დიდი ალბათობით, არა ბათუმში, როგორც ეს თავიდანვე ითქვა, არამედ - თბილისში.

სადღეისო მდგომარეობით, მასტერსზე ჩვენი 16 ძიუდოისტი ხვდება - 15 ვაჟი და 1 ქალი, თუმცა უკვე დაბეჯითებით შეიძლება იმის თქმა, რომ ვაჟებში 13 მონაწილე გვეყოლება - როგორც გითხარით, ჩინეთში ნოზაძე და თუშიშვილი არ გამოვლენ. ოღონდ ჯერ დაველოდოთ ოსაკას „დიდ მუზარადს“ - ის ნამდვილად შეიტანს კორექტივებს სადღეისო რეიტინგში და ვნახოთ, იხეირებენ თუ ვერა ამით ჩვენები.

1782
მკითხველის კომენტარები / 0 /
მსგავსი ამბები
რუბრიკის სხვა სიახლეები
;