თუ ბოთლის სროლა მინდა, სტადიონზე ნაყიდს ვერ ვისვრი?!

საქართველო-ყაზახეთის საფეხბურთო მატჩი ახლოვდებოდა, როდესაც შვილები შემომიჩნდნენ - სულ კალათბურთსა და რაგბზე რომ დაგვატარებ, ფეხბურთს ბუები თამაშობენ, თუ რა ხდებაო? არა ბავშვებო, ფეხბურთსაც კაცები თამაშობენ და თან ამ ბოლო ხანს ძალიან კარგადაც თქო.

მოკლედ, ბილეთების შესაძენად დავტრიალდი. ონლაინ გაყიდვა ახალი დაწყებული იყო და ტკტ.გე-ს ყიზილბაშებივით შესეული ჰყავდა გულშემატკივარი. შესაბამისად, საიტი ისე ჭედავდა, რომ მისი გახსნა, ფაქტობრივად შეუძლებელი იყო. ორდღიანი უშედეგო მცდელობის შემდეგ, "დინამო არენაზე" გავვარდი გაცოფებული, მაგრამ იქაც კოვზი ნაცარში ჩამივარდა - რაღაც პროგრამული თუ ვირუსული შეფერხების გამო, სალაროებშიც არ იყიდებოდა ბილეთები.

დავბრუნდი სახლში უკვე ჯაჭვით დასაბმელი და ისევ კომპიუტერს ვეცი. ამჯერად, საიტზე შევედი, მაგრამ ბილეთები ისევ ვერ ვიყიდე - პროგრამა მეუბნებოდა, რაღაც ხარვეზი მაქვს და შემეშვიო.

სასწაულებრივად შემორჩენილი ორიოდე ღერი თმაც რომ დავიპუტე, ოჯახში ფეხბურთის ხსენება ავკრძალე, მაგრამ ბავშვების ცრემლიან თვალებს რომ შევხედე, მეორე დილას, 10 საათისთვის ისევ "დინამო არენაზე" გავვარდი. რა ვიცოდი, თუ მოლარეებს დილის ძილი ჰყვარებიათ და სალაროები მხოლოდ 11 საათზე იღებოდა. ვიცადე ერთი საათი დილის სუსხში და ის იყო, სალაროს დარაბები გახსნეს, რომ მეგობარმა დამირეკა - აუ, სულ დამავიწყდა, ბილეთები აღებული მაქვს, არ იყიდოო. აი იქ უკვე რაღაც საოცრება დამემართა - თან შვებით ამოვისუნთქე, თან გავჭედე...

მოკლედ, დადგა მატჩის დღე, მოვკიდე ბავშვებს ხელი და წავედით სტადიონზე. ფეხბურთის ყურებას ბატიბუტისა და მზესუმზირის გარეშე რა მუღამი აქვს! ჰოდა, სასუსნავთან ერთად, ჩანთაში წყალიც ჩავდე, მაგრამ დაცვამ წყალი სტადიონის შესასვლელში ჩამომართვა. პირველი ტაიმის შემდეგ, ბავშვებს წყურვილით ხახა რომ გაუშრათ, გავედი და სტადიონის ტერიტორიაზევე უპრობლემოდ ვიყიდე. თქვე კაი ხალხო, თუ ტრიბუნიდან ბოთლის სროლა მინდა, სტადიონზე ნაყიდს ვერ ვისვრი თუ ეგ უსაფრთხო ბოთლებია?

გავიდა ცოტა ხანი და საქართველო-ისრაელის საკალათბურთო მატჩზე წაყვანა მთხოვეს შვილებმა. ამჯერად, ბილეთების პრობლემა გაცილებით მარტივად გადავჭერი. მივადექით სპორტის სასახლეს, ოღონდ წყალი აღარ წაგვიღია - ვიფიქრე, აქაც შიგნით ექნებათ თქო. სამაგიეროდ, სპორტის სასახლის წინ, სახელდახელო დახლებზე გამწკრივებულ ბებოებს ჩამოვუარე და ხუთი ლარის ბატიბუტი და მიწის თხილი ვუყიდე ბავშვებს. თუმცა, დაცვამ ფეხები გაფშიკა - ეგენი ან გარეთვე მიირთვით, ან აგერ ნაგვის ურნებია და გადაყარეთო. რათა კაცო, ბომბებს ვმალავთ ბატიბუტში თუ რა უბედურებაა მეთქი? არ ვიცი ძმაო, არ შეიძლება და მორჩაო! რაკიღა მატჩის დაწყებამდე სულ რაღაც 10 წუთი რჩებოდა, ნავაჭრი ნაგვის ურნაში ჩავყარეთ. შევედით სპორტის სასახლეში და აღმოვაჩინეთ, რომ ფოიეში მდგარ ერთადერთ დახლზე ბატიბუტიც იყიდებოდა, წყალიც და გამაგრილებელი სასმელებიც. თუმცა, გარეთ ნაყიდზე გაცილებით ძვირი ღირდა და თან იმდენი ხალხი ეხვია ზედ, რომ სანამ რამეს იყიდიდი, ალბათ თამაშიც მორჩებოდა...

თქვე ოჯახაშენებულებო, თუ გარედან არაფრის შეტანა არ შეიძლება, რატომ აძლევთ უფლებას გარემოვაჭრეებს, რომ თქვენს ტერიტორიაზე ივაჭრონ? ყველა კართან დიდი სანაგვე ურნა იდგა და საცოდაობა იყო იმის ყურება, როგორ გაივსო ეს ურნები შეუჭმელი ბატიბუტით თუ მიწისთხილით, გაუხსნელი წყლის თუ წვენების ბოთლებით... შიდამოვაჭრეებმა და სპორტის სასახლის დახლმა გვარიანი ხეირი ნახეს, გულშემატკივარი კი დაზარალდა...

მე კი პრობლემა იმით გადავჭერი, რომ დიდი შესვენების დროს, როდესაც დაცვამ ყურადღება მოადუნა, გავედი გარეთ და ახლიდან ვიყიდე წყალიც და ბატიბუტიც. ოღონდ ამისთვის ორი გზობის გაკეთება მომიხდა, რათა ქურთუკი ძალიან არ გამბერვოდა და დაცვას არ შეემჩნია. გარემოვაჭრეებმა ორმაგად იხეირეს, რადგან ბევრმა ჩემსავით მეორედ იყიდა მათგან პროდუქტი...

და ბოლოს, კალათბურთზეც ვიტყვი: ესტონეთთან და ისრაელთან წყვილმა მოგებამ ორმაგი გრძნობა დამიტოვა: ერთი მხრივ, გამარჯვება მიხაროდა და თან გულიც მწყდებოდა, რომ ფიბა - ევროლიგის უთავობის გამო, მსოფლიო ჩემპიონატზე გასვლის შანსი თითქმის აღარ გვაქვს. ამის გამო, მხოლოდ ჩვენ კი არა, მთლად გრანდები რჩებიან მსოფლიოს ჩემპიონატს მიღმა - ხორვატია და ევროპის მოქმედი ჩემპიონი სლოვენია! აი, ნათელი მაგალითი, როგორ არ სცემს პატივს მსოფლიო ჩემპიონატს მისივე ორგანიზატორი. ელემენტარულად, ოპტიმალურ კალენდარს რომ ვერ დაგეგმავ, ფიბა კი არა მთხლე ხარ! ჰოდა, დაჯექი და შენ თვითონვე უყურე მაგ გაუფერულებულ ტურნირს, მე ბოიკოტს ვუცხადებ და ერთ მატჩსაც კი არ ვნახავ!

1148
მკითხველის კომენტარები / 0 /
მსგავსი ამბები
რუბრიკის სხვა სიახლეები