'თუ დაუნახავები ხართ, ჩემი წასვლა პრობლემა არ არის!'.. - გატუზო 'მილანს' ტოვებს?

იტალიური მედიის ცნობით, სეზონის დასრულების შემდეგ ჯენარო გატუზო “მილანის” მთავარი მწვრთნელის პოსტს დატოვებს. ეს მიუხედავად იმისა, მოხვდება თუ არა “როსონერი” ჩემპიონთა ლიგის ზონაში.

გატუზოს სახელი “მილანთან” ასოცირდება და, რა თქმა უნდა, ახალგაზრდა მწვრთნელი ამ გადაწყვეტილებას ჰაერზე არ მიიღებდა. მაშ, რამ დააფიქრა ის გუნდიდან წასვლაზე? ჩვენი წერილი სწორედ ამ თემას ეხება...

როცა მადლობელი არავინაა

ამ დროისთვის “მილანი” ჩემპიონთა ლიგის ზონაშია. მართალია, “როსონერი” არასტაბილურად თამაშობს და რამდენიმე გაუთვალისწინებელი ქულაც გაანიავა, მაგრამ ამასი მწვრთნელის დადანაშაულება ცოტა რთულია.

საქმე ისაა, რომ ლუკას პაკეტასა და კშიშტოფ პიონტეკის დამატების მიუხედავად, გუნდის შემადგენლობა აშკარად საჭიროებს გაძლიერებას. ეს პრობლემები განსაკუთრებით თვალსაჩინოა ცენტრალურ ზონაში. რაც შეეხება ფლანგებს, ტრავმის შემდეგ ვერაფრით აღიდგინა ოპტიმალური ფორმა გუნდის ერთ-ერთმა ლიდერმა - სუსომ. არადა, ეს ესპანელი “მილანისთვის” მართლაც რომ ძალიან დიდი ძალაა.

გატუზო მიიჩნევს, რომ შექმნილ სიტუაციაში მაქსიმუმს აკეთებს და ის არ არის ღირსი, გამუდმებული საყვედურები ისმინოს კლუბის ხელმძღვანელობისგან, განსაკუთრებით - დირექტორ ლეონარდოსგან.

რა მიზეზები აქვს ლეონარდოს ამ საყვედურებისთვის, ამაზე ქვემოთ დავწერთ, მანამდე კი მივხედოთ გატუზოს, რომლის ფორმულირებაც დაახლოებით ასეთია - მადლიერი მაინც არავინაა, ძალიან ბევრს ვმუშაობ და თუ დაუნახავები ხართ, ჩემი წასვლა პრობლემა ნამდვილად არააო.

რატომ არ უნდა ლეონარდოს გატუზო?

საიდუმლო არავისთვისაა, რომ ლეონარდო, ვინც დიდი “მილანის” ორგანული ნაწილი გახლდათ, კლუბში გრანდიოზული გეგმებით მივიდა. იტალიური და მსოფლიო მედიის საერთო აზრით, ბრაზილიელი ფუნქციონერი ის პიროვნებაა, ვისაც ძალიან უყვარს დამოუკიდებლად გადაწყვეტილებების მიღება.

დიდი ხანი სულაც არ არის, რაც გატუზო და ლეონარდო თანამშრომლობენ. ეს ორი ფიგურა ერთად თავს კომფორტულად ვერ გრძნობს. საქმე ისაა, რომ ლეონარდოს ძალიან უნდა ტრანსფერების ერთპიროვნულად განხორციელება, რასაც გატუზო სულაც არ მიესალმება. მოკლედ, ამ ორს შორის დიდი შავი კატა დარბის...

მილანს ტოპმწვრთნელი უნდა ჰყავდეს

კლუბის ხელმძღვანელობა მიიჩნევს, რომ გატუზო არ არის ტოპმწვრთნელი. “მილანს” კი სწორედ ასეთი მწვრთნელი სჭირდება. ერთი მხრივ, შეიძლება კლუბის ხელმძღვანელობა მართალიც იყოს, მაგრამ არ დაგვავიწყდეს - ტოპმწვრთნელს ტოპშემადგენლობაც სჭირდება. აქედან გამომდინარე, გატუზოს წასვლა მხოლოდ ერთ შემთხვევაში იქნება გამართლებული...

ჩვენი მკითხველი ძალიან კარგად მიხვდა, თუ რომელ შემთხვევაზე ვსაუბრობთ - “მილანმა” ზაფხულის სატრანსფერო ბაზარზე რამდენიმე ტოპფეხბურთელი უნდა მოიზიდოს, ამის წარმოდგენა კი ძალიან რთულია.

უფრო ზუსტნი თუ ვიქნებით, “მილანს” დღეს ამის შესაძლებლობა ნამდვილად არ აქვს. კი, შესაძლოა ერთ ვარსკვლავზე ეყოს ფული, მაგრამ სამი-ოთხი ასეთის დამატება ნამდვილად გაუჭირდება, მით უმეტეს იმ შემთხვევაში, თუ გუნდმა ჩემპიონთა ლიგაზე გასვლა ვერ მოახერხა. ამის ალბათობა კი ნამდვილად არსებობს, თანაც იმ ჩავარდნის ფონზე, რაც გუნდს ბოლო სამ კვირაში დაუდგა...

ვნახოთ, როგორი იქნება გატუზოს სამწვრთნელო მომავალი. იტალიაში მას იმხელა ავტორიტეტი აქვს, რომ უმუშევარი ნამდვილად არ დარჩება. სერია A-ში ნამდვილად არიან კლუბები, რომლებიც მის სამსახურზე უარს არ იტყვიან. ასევე საინტერესოა ის, თუ ვინ მოვა “მილანში” მთავარ მწვრთნელად...
ამაზე მომავალში ვილაპარაკოთ...

ყოველდღიური სპორტული გაზეთი "ლელო"
878
მკითხველის კომენტარები / 0 /
მსგავსი ამბები
რუბრიკის სხვა სიახლეები
;