თ/ჭ. 23-წლამდელთა მსოფლიოს ჩემპიონატი: გამოცხადებული გამარჯვების ქრონიკა [VIDEO]

* გენო პეტრიაშვილმა ოთხივე შეხვედრა წმინდად, ქულებით ვადამდე მოიგო.
* მან 45 ქულა მოიპოვა და მხოლოდ 1 დაკარგა.
* პეტრიაშვილის ოქროს გარდა ქართულმა დელეგაციამ სამი ბრინჯაო მოიპოვა.

პოლონურ ბუდგოშჩში გუშინ დამთავრდა მსოფლიოს ჩემპიონატი 23-წლამდელ მოჭიდავეთა შორის, რომელშიც ბოლო დღეებში თავისუფალი სტილით მოჭიდავეები გამოდიოდნენ. წარმატებით იჭიდავა ჩვენმა ნაკრებმა, რომელმაც 4 მედალი მოიპოვა - 1 ოქრო და 3 ბრინჯაო.

ოქროს მედალი არა მარტო გუნდის, არამედ მთელი ტურნირის აშკარა ფავორიტმა, მსოფლიოს მოქმედმა და ევროპის ჩემპიონმა, გორელმა ოლიმპიურმა პრიზიორმა გენო პეტრიაშვილმა (125) მოიპოვა, ბრინჯაოს მედლებს კი ქუთაისელი მირზა სხულუხია (70), ამბროლაურელი ავთანდილ კენჭაძე (74) და თბილისელი ირაკლი მწითური (86) დაეუფლნენ.

გუნდურ ჩათვლაში ჩვენი ნაკრები 36 ქულით მესამეზე გავიდა რუსეთის (55) და ყაზახეთის (41) შემდეგ.

პეტრიაშვილი ამ შემოდგომაზე უკვე მეორედ გახდა მსოფლიოს ჩემპიონი - შეგახსენებთ, რომ ის უფროსებში პლანეტის მოქმედი ტრიუმფატორია, ამ წარმატებას კი სექტემბერში პარიზში მიაღწია, როცა თითქოსდა უძლეველი თურქი ტაჰა აკგული დაჯაბნა.

მისთვის ეს ტურნირიც "გამოცხადებული გამარჯვების ქრონიკა", პუბლიკისთვის კი საინტერესო წვრილმანი დეტალები იყო: რამდენ შეხვედრას მოიგებდა წმინდად, რამდენ დროს მოანდომებდა ჩემპიონობის მოპოვებას, რამდენ ქულას დააგროვებდა, ვის რა ანგარიშით მოუგებდა და ასე შემდეგ, თორემ საბოლოოდ მძიმე წონაში კვარცხლბეკის უმაღლეს საფეხურზე ვინ დადგებოდა, ამაზე არავინ კამათობდა. დასტურად ერთი მაგალითიც გამოდგება: ნახევარფინალში პეტრიაშვილმა 3.51 წუთში 14:1 გაანადგურა უკრაინელი დანილო კარტავი. სხვათა შორის, მასთან დაკარგა ერთადერთი ქულა მთელ ტურნირზე.

პეტრიაშვილმა არც ამჯერად გააწბილა მისი ნიჭის თაყვანისმცემლები და მორიგი ტრიუმფალური გამოსვლა ჩაიწერა აქტივში: წინასწარ შეხვედრებში აზიელებს "გაავლო მუსრი": იაპონელ ტაიკი იამამოტოს და ჩინელ ჭანხიან ჰუს ერთნაირი ანგარიშით, 10:0 მოუგო. ფინალში კი ასევე პირწმინდად გადათელა რუსთა დაღესტნელი მაგომედამინ დიბიროვი: 3.42 წუთში 11:0 აჯობა.

პეტრიაშვილმა მშვენიერი ფიზიკური, ტაქტიკური თუ ტექნიკური მომზადება გამოავლინა. ფიზიკურად არათუ მისი დაჩაგვრა და დაღლა, ოდნავი პრობლემის შექმნაც ვერავინ შეძლო. სანაცვლოდ, თავად ძალიან იოლად უმკლავდებოდა ყველას, არ უჭირდა ფეხში შესვლა და მათი ჩოქბჯენში გადაყვანა, იქ კი იოლად ატრიალებდა.

* * *
ძლიერად იჭიდავა მწითურმაც, რომელმაც მშვენიერი კისრულებით გამოიჩინა თავი. ეტყობა, ამ კომპონენტში ნაკრების მწვრთნელებთან ერთად პირად მწვრთნელ ემზარ ბედინეიშვილსაც კარგად უვარჯიშებია, ვინც ტრიბუნიდანაც ქომაგობდა შეგირდს.

თურქ მურატ ერთურქთან 4:1 და შვეიცარიელ სტეფან რაიხმუტთან 3:2 მოგების შემდეგ ის ყაზახთა მომავალ ფინალისტ აზამატ დაულეტბეკოვთან 1:7 წააგო. მოგვიანებით, სანუგეშო წრეში გადასულმა 2:1 აჯობა აზერბაიჯანელ ჰაჯიმურად მაგომედსაიდოვს, ბრინჯაოსთვის შეხვედრაში კი ისევ და ისევ კისრულებით 6:1 მოუგო კუბელ ლაზარო ერნანდესს. ჩვენებურმა საწყის 30 წამში მეტოქე სამჯერ წამოიღო კისრულზე და 6:0 დაწინაურდა.

ამ შეხვედრაში მან კარგი ფიზიკური მომზადებაც გამოავლინა და სწორედ ამიტომ ვერ მოუხერხა ვერაფერი კუბელმა (6:2).

* * *
მშვენივრად იჭიდავა კენჭაძემაც, ვინც თავდაპირველად, მონღოლი ბატსუხ ბოლდხუუ წმინდად, 13:2 დაამარცხა. ამ პაექრობაშიც და მთელ ტურნირზე კენჭაძეს არ უჭირდა ფეხში შესვლა და მეტოქის გადაგდება, მაგრამ უჭირდა ჩოქბჯენში მათი დატრიალება.

მომდევნო ორ შეხვედრაში თავიდან ჩამორჩა: ბელარუს ანდრეი კარპაჩთან - 3:5, იაპონელ იაჯურო იამასაკისთან კი - 1:4, თუმცა შემტევი სტილით და ტექნიკური ჭიდაობით ორივეს დამაჯერებლად აჯობა. შესაბამისად, 15:5 და 7:4. სამწუხაროდ, ჩვენებური ნახევარფინალში 3:7 დამარცხდა რუსთა მომავალ ჩემპიონ გაჯი ნაბიევთან, ბრინჯაოსთვის პაექრობაში კი ამერიკელი ისაია ალექსანდერ მარტინესი ასევე წმინდად, 11:0 დაამარცხა.

* * *
სხულუხია პირველივე წრეში დამარცხდა ინდოელთა მომავალ ფინალისტ ვინოდ კუმართან - 0:3, სანუგეშოში კი უკრაინელ ალი ზაქარიევს 7:3, ხოლო ბრინჯაოსთვის პაექრობაში 3:0 აჯობა იაპონელ ნობუიოში ტაკოჯიმას.

პოლონეთში ჩვენგან ჭიდაობდნენ, მაგრამ უმედლოდ დარჩნენ რამაზ თურმანიძე (57), შოთა ფარტენაძე (61), ივერიკო ჯულაყიძე (65) და გივი მაჭარაშვილი (97).

თ/ჭ. 23-წლამდელთა მსოფლიოს ჩემპიონატი

57 კგ.
1. რაინერ ანდრეუ ორტეგა (კუბა); 2. მიკაილ სალიმ ნაიმი (ბულგარეთი); 3. სულეიმან ათლი (თურქეთი), პარვიზ იბრაჰიმოვი (აზერბაიჯანი); 12. რამაზ თურმანიძე (საქართველო).

61 კგ.
1. რინია ნაკამურა (იაპონია); 2. კუატ ამირტაევი (ყაზახეთი); 3. ისლამ დუდაევი (რუსეთი), სედატ ოზდემირი (თურქეთი); 12. შოთა ფარტენაძე (საქართველო).

65 კგ.
1. ნაჩინ კუულარი (რუსეთი); 2. ბაჯრანგ ბაჯრანგი (ინდოეთი); 3. იონეს ალიაკბარ ემამიჩოგაე (ირანი), იოსეფ კრისტოფერ მაკ კენა (აშშ); 12. ივერიკო ჯულაყიძე (საქართველო).

70 კგ.
1, რიჩარდ ანტონი ლუისი (აშშ); 2. ვინოდ კუმარი (ინდოეთი); 3. მირზა სხულუხია (საქართველო), მუჰამეტ აკდენიზი (თურქეთი).

74 კგ.
1. გაჯი ნაბიევი (რუსეთი); 2. ახსარბეკ გულაევი (სლოვაკეთი); 3. ავთანდილ კენჭაძე (საქართველო), ვასილ მიხაილოვი (უკრაინა).

86 კგ.
1. ალიხან ჟაბრაილოვი (რუსეთი); 2. აზამატ დაულეტბეკოვი (ყაზახეთი); 3. ირაკლი მწითური (საქართველო), იური კალაშნიკოვი (ისრაელი).

97 კგ.
1. მოჯტაბა მოჰამედშაფიე გოლეი (ირანი); 2. ძიანის კრამიანკოუ (ბელარუსი); 3. მურაზ მჭედლიძე (უკრაინა); რაიან ჯეკ უოლზი (აშშ); 9. გივი მაჭარაშვილი (საქართველო).

125 კგ.
1. გენო პეტრიაშვილი (საქართველო); 2. მაგომედამინ დიბიროვი (რუსეთი); 3. დანილო კარტავი (უკრაინა), ამინ ჰოსეინ ტაჰერი (ირანი).

ყოველდღიური სპორტული გაზეთი "ლელო"
1547
მკითხველის კომენტარები / 0 /
მსგავსი ამბები
რუბრიკის სხვა სიახლეები
;