იანისი - MVP-ის ფავორიტი და კვირის მოთამაშე

ახალი სეზონის პირველი კვირის შემდეგ, MVP-ის პრიზის ფავორიტი შეიცვალა. ავტორიტეტული საბუკმეკერო კანტორა Westgate SuperBook-ის აზრით, სეზონის საუკეთესო მოთამაშის ჯილდოს მოპოვებაზე ყველაზე კარგი შანსი "მილუოკი ბაქსის" მცველს იანის ანტენტოკუნმპოს აქვს. მისი კოეფიციენტია - 2.25.

შემდეგ მოდიან - ლებრონ ჯეიმსი (4.0), კავაი ლენარდი (6.0) და კევინ დურანტი (6.5). სეზონის სტარტის წინ, ფავორიტად რასელ უესტბრუკი მიიჩნეოდა.

ანტენტოკუნმპოს ფანტასტიკური სტატისტიკა აქვს რეგულარულის პირველ ოთხ მატჩში. მან ოთხივე შეხვედრაში გადალახა 30-ქულიანი ზღვარი და ჯამში დააგროვა 147 ქულა. ამ მაჩვენებლით მან დაამხო საკლუბო რეკორდი, რომელიც ლეგენდარულ ქარიმ-აბდულ ჯაბარს ეკუთვნოდა (146 ქულა).

შემთხვევითი არ არის, რომ ანტენტოკუნმპო გასული კვირის საუკეთესო მოთამაშედ დასახელდა აღმოსავლეთ კონფერენციაში. მისმა საშუალო სტატისტიკამ 38.8 ქულა შეადგინა (თამაშიდან ტყორცნების რეალიზაციის პროცენტი 67.3-ს უდრიდა!). გარდა ამისა, ბერძენი 9.7 მოხსნას, 5.0 შედეგიან გადაცემასა და 2.7 ჩაჭრას აგროვებდა.

ყველაზე შთამბეჭდავი გამოსვლა მას "პორტლენდის" წინააღმდეგ ჰქონდა, როცა 44 ქულა ჩააგდო და ეს გამოსვლა მამას მიუძღვნა, რომელიც სეზონის წინ გარდაიცვალა.

რაც შეეხება დასავლეთ კონფერენციას, აქ საუკეთესო გახდა "ჰიუსტონის" ლიდერი ჯეიმს ჰარდენი. მისი საშუალო სტატისტიკა 27.7 ქულას, 9.0 შედეგიან გადაცემას, 4.0 მოხსნასა და 1.7 ჩაჭრას უდრიდა.

ყოველდღიური სპორტული გაზეთი "ლელო"
350
მკითხველის კომენტარები / 0 /
მსგავსი ამბები
რუბრიკის სხვა სიახლეები