იაპონელი ეპიდემიოლოგი: ტოკიოს ოლიმპიადის გამართვა თითქმის შეუსრულებელი ამოცანაა

ტოკიო 2020-ის საორგანიზაციო კომიტეტის თანამშრომლებმა ორგანიზაციის შტაბბინაში დაბრუნება დაიწყეს მას შემდეგ, რაც ორი თვის განმავლობაში საკუთარ მოვალეობებს საკუთარ სახლებში ასრულებდნენ.

ერთ-ერთი თანამშრომლის სიტყვებით, საორგანიზაციო კომიტეტი გეგმავს საოფისე სისტემაზე თანდათან გადასვლას. ამჟამად, ცალკეული განყოფილებები მუშაობენ როტაციის პრინციპით, რათა ოფისის დატვირთვა 50 პროცენტს არ აღემატებოდეს.

მომავალი ოლიმპიადის საორგანიზაციო კომიტეტმა თანამშრომლებისთვის კარანტინი შეამსუბუქა მას შემდეგ, რაც იაპონიის პრემიერ-მინისტრმა სინძო აბემ გასულ კვირას საგანგებო მდგომარეობა გააუქმა.

2020 წლის ოლიმპიური თამაშები კორონავირუსის პანდემიის გამო 2021 წლისთვის გადაიტანეს. არსებობს დიდი ალბათობა იმისა, რომ სპორტული ფორუმი საერთოდ არ გაიმართოს.

ამ მომენტისთვის, ტოკიოს ოლიმპიადისთვის ლიცენზიების 57 პროცენტია გათამაშებული.

nnn

პარალელურად, იაპონიის ერთ-ერთმა წამყვანმა ეპიდემიოლოგმა კენტარო ივატამ შეაფასა 2021 წელს ტოკიოში ზაფხულის ოლიმპიადის ჩატარების შანსები.

„პირადად მე პესიმისტური განწყობა მაქვს. თამაშების ჩატარებისთვის საჭიროა ორი პირობის შესრულება. პირველი - იაპონიამ კორონავირუსი ქვეყნის შიგნით უნდა დაამარცხოს. მეორე - კორონავირუსი მთელ მსოფლიოში სხვა ქვეყნებმაც უნდა დაამარცხონ. მომდევნო წლამდე პირველი პირობის შესრულება, შესაძლოა, მოხერხდეს. მეორე პირობა? აქ მე პესიმისტურად ვარ განწყობილი. ეს რომ იყოს რომელიმე შიდა ტურნირი ან შეჯიბრება მცირე რაოდენობის მონაწილეებით აზიური ქვეყნებისთვის, შესაძლოა, მოგვეხერხებინა მისი ჩატარება. ოლიმპიურ თამაშებში მონაწილეობს ბევრი სპორტსმენი იმ ქვეყნებიდან, რომლებიც არ შეესაბამებიან იმ პირობებს, რომელშიც ვიმყოფებით და რომელშიც, სავარაუდოდ, ვიქნებით მომავალ წელსაც.

მომდევნო წლის ბოლომდე ოლიმპიური თამაშების ჩატარება - თითქმის შეუსრულებელი ამოცანაა, საერთაშორისო ოლიმპიურ კომიტეტში კი თქვეს, რომ თუ მომავალი წლისთვის სიცხადე არ იქნება, ყველაფერი გაუქმდება, შემდეგი თამაშები კი 2024 წელს პარიზში გაიმართება. შეიძლება ვცდები, მაგრამ ვფიქრობ, ეს ყველაზე სავარაუდო სცენარია“, - განაცხადა ივატამ.

საერთაშორისო ოლიმპიურმა კომიტეტმა კორონავირუსის პანდემიის გამო, ტოკიოს ოლიმპიადა ერთი წლით გადაიტანა და ის 2021 წლის 23 ივლისიდან 8 აგვისტომდე გაიმართება.

2318
მკითხველის კომენტარები / 0 /
მსგავსი ამბები
რუბრიკის სხვა სიახლეები
;