იაპონიაში 12 წლის შემდეგ: ელჩი ტოჩინოშინი ტოიოტა სიტიში და ქართველი მორაგბეები ნაგოიაში

* იაპონია-საქართველოს მატჩის საპატიო ელჩი ოძეკი ტოჩინოშინია.
* საქართველო-იაპონია ურთიერთშეხვედრებში - 1:4.
* მატჩს მსოფლიოში ცნობილი მსაჯი, უელსელი ნაიჯელ ოუენსი განსჯის.
* რეკორდსმენი "ბორჯღალოსანი" მერაბ კვირიკაშვილი
სასტარტო შემადგენლობაში ითამაშებს.
* მეკო ნაკრებში სარეკორდო, 114-ე მატჩს ითამაშებს,
• დავით კაჭარავა - 112-ეს.
ვიტო კოლელიშვილისთვის ეს 50-ე კეპი იქნება.

23 ივნისს, საქართველოს დროით 09:45 საათზე, "ბორჯღალოსნები" 2018 წლის ზაფხულის ტესტ-სერიის დასკვნით თამაშს ტოიოტა სიტიში, იაპონიის წინააღმდეგ გამართავენ.

იაპონია "ბორჯღალოსნებისთვის" ერთ-ერთ უხერხულ მეტოქედ ჩამოყალიბდა მასთან უარყოფითი ბალანსი გვაქვს - 4:1. განვლილ 5 მატჩში იაპონიამ გაიტანა 14 ლელო, ჩვენ - 11; ხოლო ქულათა ბალანსი 96:122-ზეა.

საქართველოს ნაკრები აზიელ მეტოქეს აქამდე 5-ჯერ შეხვედრია, თუმცა ბოლო 12 წელია, რაც მათ სამშობლოში არ გვითამაშია. იაპონიას პირველად 2006 წელს ვეწვიეთ და ოსაკაში მასპინძლებმა 32:7 იმარჯვეს.

2012 წლიდან დღემდე, "საკურები" თბილისს სამჯერ სტუმრობდნენ. 6 წლის წინ, სტუმრებმა კონტრშეტევა საკუთარი 5-მეტრიანიდან წამოიღეს და გამარჯვების არეკნი გაიტანეს - 25:22.

2014 წელს იაპონიას პირველად და ჯერჯერობით ბოლოჯერ მოვუგეთ. ბორჯღალოსნებმა მეტოქეს 5 ლელო გაუტანეს და 35:24 სძლიეს.

2015 წლის მსოფლიო თასის გასახურებელ შეხვედრაში აზიელებს 5 სექტემბერს, გლოსთერში ვეთამაშეთ - 10:13. რეპეტიცია ორივე გუნდისთვის წარმატებული აღმოჩნდა და ტურნირის პირველ მატჩში საქართველომ ტონგას 17:10 სძლია, ხოლო იაპონიამ სენსაცია მოახდინა და სამხრეთ აფრიკა 34:32 დაამარცხა.
2016 წელს იაპონიას მესამედ ვუმასპინძლეთ ვაკეში და 60-წუთიანი დომინირების მიუხედავად, კონტრშეტევაზე მოთამაშე მეტოქემ 28:22 იმარჯვა.

რეპეტიცია მსოფლიო თასის წინ

"ბორჯღალოსნების" სამწვრთნელო შტაბისთვის, მენეჯმენტისა და მოთამაშეებისთვის ამ თამაშს სპორტულის გარდა სხვა დატვირთვაც აქვს. 2019 წლის მსოფლიო თასის პირველ მატჩს, საქართველო სწორედ "ტოიოტა სთედიუმზე", უელსის წინააღმდეგ გამართავს და ახლა გუნდი ზუსტად იმ პირობებში ემზადება, როგორ პირობებშიც დაახლოებით 1 წლის შემდეგ მოუწევს ყოფნა.

მილტონ ჰეიგი ამ შესაძლებლობით კმაყოფილია, რაც არაერთხელ აღნიშნა:

"მოხარული ვარ, რომ იაპონიას ტოიოტა სიტიში ვეთამაშებით, იმ სტადიონზე, რომელზეც 2019 წლის მსოფლიო თასის პირველ მატჩში უელსს დავუპირისპირდებით. იმავე ბაზაზე ვივარჯიშებთ, იმავე სასტუმროში გავჩერდებით და იმავე სატრანსპორტო სისტემას გამოვიყენებთ. მსოფლიოსთვის მოსამზადებლად ამაზე კარგი რა უნდა გინდოდეს.

ჩვენთვის დიდი პატივია იაპონიასთან მათსავე ქვეყანაში თამაში. რაც მე "ბორჯღალოსნების" მწვრთნელი ვარ, მათ სამჯერ ვეთამაშეთ თბილისში და ერთხელ ბრიტანეთში, აქედან გამომდინარე, დიდებულია, რომ იაპონელებს თავიანთ მშობლიურ კედლებში დავუპირისპირდებით".

ოთხი ცვლილება ბორჯღალოსნებში

საქართველოსა და იაპონიის ნაკრებების შეხვედრას ცნობილი უელსელი რეფერი, ლეგენდარული ნაიჯელ ოუენსი განსჯის, რაც თამაშს დამატებით ხიბლს შესძენს.

ამ თამაშამდე იაპონია ორჯერ შეხვდა იტალიას და ორი კვირის წინ ის 34:17 დაამარცხა, ხოლო გასულ შაბათს 22:25 დამარცხდა. "ბორჯღალოსნებმა" ზაფხული სხვებზე 10 დღით ადრე დაიწყეს და თბილისში, "დინამო არენაზე" "ფრანგ ბარბაროსებს" 16:15 სძლიეს, 9 ივნისს იმავე ანგარიშით ტონგა დაამარცხეს, ხოლო ერთი კვირის წინ ფიჯის შეხვდნენ და გამარჯვება მასპინძლებს დარჩათ - 37:15.

მას შემდეგ ჰეიგმა სასტარტო 15-ში ოთხი ცვლილება განახორციელა. შერკინების მეორე და მესამე ხაზი უცვლელი დარჩა: გიორგი ნემსაძე, კოტე მიქაუტაძე, გიორგი ცუცქირიძე, ვიტო კოლელიშვილი და ოთარ გიორგაძე. ძირითადში შეინარჩუნა ადგილი მარცხენა ბურჯმა კახა ასიეშვილმა, შეიცვალა მარჯვენა ბურჯი, ლევან ჩილაჩავას ნაცვლად თამაშს ირაკლი მირცხულავა იწყებს. შეიცვალა კვაჭიც, შალვა მამუკაშვილის ნაცვლად სასტარტოში ჯაბა ბრეგვაძე გამოჩნდა, რომელიც იაპონურ "სანვულვზში" თამაშობს.

წყნარი ოკეანის ტურნეზე ზედიზედ მესამე თამაშს იწყებს ვასილ ლობჟანიძისა და ლაშა ხმალაძის წყვილი. წინა მატჩისგან განსხვავებით, ცენტრში დაბრუნდა გიორგი კვესელაძე, რომელიც დავით კაჭარავას შეუწყვილდება.

2 კვირის წინ, ამ წყვილმა ტონგასთან მატჩი დაიწყო, თუმცა კვესელაძე მე-4 წუთზე დაშავდა და შესაცვლელი შეიქმნა. ფულბეკის პოზიციაზე თამაშს იწყებს მერაბ კვირიკაშვილი, ფრთაზე გადაინაცვლა იოსებ მათიაშვილმა, ხოლო მეორე ფრთა ალექსანდრე თოდუა იქნება.

სკამზე გადაინაცვლა კვაჭმა შალვა მამუკაშვილმა. ფიჯისთან მატჩის მსგავსად, თადარიგში არიან ბურჯები ზურაბ ჟვანია და გიორგი მელიქიძე, ასევე მეორეხაზელი ნოდარ ჭეიშვილი. მესამე ხაზში შეცვლაზე მიხეილ გაჩეჩილაძე შევა, რომელმაც წინა მატჩი გამოტოვა. უკანა ხაზის თადარიგში არიან გიორგი ბეგაძე, ლაშა მალაღურაძე და ანზორ სიჭინავა.

სუმო და რაგბი

გეხსომებათ, რომ ამ შეხვედრის საპატიო ელჩად იაპონელებმა ლევან გორგაძე იგივე ტოჩინოშინი აირჩიეს. ქართველი სუმოისტი ნაგოია ბაშოზე კარიერაში პირველად იჭიდავებს ოძეკის (ჩემპიონი) რანგში.

სხვათა შორის ჩვენი ნაკრები ამ მატჩისთვის სწორედ ნაგოიაში ემზადებოდა და ნაგოიას სტადიონზე ვარჯიშობდა.
საქართველოს ნაკრები

(1-8): ასიეშვილი, ბრეგვაძე, მირცხულავა, ნემსაძე (კაპ), მიქაუტაძე, ცუცქირიძე, კოლელიშვილი, გიორგაძე; (9-15): ლობჟანიძე, ხმალაძე, მათიაშვილი, კვესელაძე, კაჭარავა, თოდუა, კვირიკაშვილი.

ყოველდღიური სპორტული გაზეთი "ლელო"
2234
მკითხველის კომენტარები / 0 /
მსგავსი ამბები
რუბრიკის სხვა სიახლეები
;