"იაშვილი დაგველაპარაკა და საბოლოოდ დარწმუნდა, რომ ბექას პასპორტი უნდა მიეღო..."

უკრაინის ახალგაზრდული ნაკრების კაპიტანმა და "ბეტისის" სარეზერვო გუნდის ყოფილმა ნახევარმცველმა ბექა ვაჩიბერაძემ საქართველოს სახელით თამაში გადაწყვიტა. ამის შესახებ 21 წლის ნახევარმცველმა უკრაინულ გამოცემა "სპორტ-ექსპრესთან" ისაუბრა:

- ბექა ვაჩიბერაძე: საქართველოს ნაკრებში თამაში დიდი ხნის წინ გადავწყვიტე

ცნობილი გახდა, რომ ეს საკითხი ფიფაში განიხილეს და დაადასტურეს, რომ თუ ვაჩიბერაძე საქართველოს მოქალაქეობას მიიღებს, ნაკრებში მას თამაშის პრობლემა არ შეექმნება.

ბექა ვაჩიბერაძე ქუთაისში დაბადებულ-გაზრდილია. 15 წლის იყო უკრაინაში რომ წავიდა და ჯერ ოდესის "ჩერნომორეცში" თამაშობდა, შემდეგ დონეცკის "შახტარის" სარეზერვო გუნდში. ამ უკანასკნელის ფორმით 2015 წელს უეფას ახალგაზრდული ლიგის ფინალშიც ითამაშა. იყო უკრაინის 17, 19 და 21-წლამდელთა ნაკრებებში წევრი: 2015 წელს, ზესტაფონში გამართულ საქართველო-უკრაინის 21-წლამდელთა შეხვედრაში (3:3) ქართველთა კარში გოლიც გაიტანა.

ფიქრობდა, რომ ადრე თუ გვიან საქართველოსთვის ითამაშებდა
ფეხბურთელის მამა, ახლო წარსულში ქუთაისის "ტორპედოს" ყოფილი თავდამსხმელი ზაზა ვაჩიბერაძე ამბობს, რომ ამ გადაწყვეტილებას ოჯახი დიდი ხანი ელოდა:

- უკრაინაში წასვლის მთავარი მოტივი რა იყო? კარგ პირობებში ევარჯიშა. მაგრამ ამ დროს და ის ყოველთვის საქართველოს ნაკრებში თამაშზე ფიქრობდა. ამიტომ გამოდიოდა უკრაინის ასაკობრივ და ახალგაზრდულ ნაკრებში და "შახტარის" დუბლშემადგენლობაში, რომ კარიერა აეწყო, რაც საქართველოში რთული იქნებოდა. მერე მართლაც ასე მოხდა და ესპანეთში გადავიდა.

მაგრამ ბექა ყველგან ფიქრობდა, რომ ადრე თუ გვიან საქართველოსთვის ითამაშებდა. საბოლოოდ, საქართველოს პასპორტის დაბრუნება გადაწყვიტა, რითაც მთელი ოჯახი ბედნიერები ვართ.

უმადურობა ძალიან არ მიყვარს, უკრაინელებს ძლიერ ვემადლიერებით, მაგრამ შვილს ქართველად და საქართველოსთვის ვზრდიდით. როდესაც საქართველოს ახალგაზრდულ ნაკრებს ზესტაფონში უკრაინა შეხვდა, ძნელი იყო იმის მოსმენა, რომ, თურმე, სამშობლო დაივიწყა და ასე შემდეგ. მაგრამ ვინ იცოდა, ბექას რა უნდოდა?! რაც უნდოდა, ის გააკეთა კიდეც.

- ეს გადაწყვეტილება როდის მიიღო?
- ერთი კვირის წინ. უგუნდოდ რომ იყო, საქართველოში იმყოფებოდა და ფეხბურთის ფედერაციის ვიცე-პრეზიდენტი, სანაკრებო საქმეების კურატორი ალექსანდრე იაშვილი შეგვხვდა, დაგველაპარაკა და საბოლოოდ დარწმუნდა, რომ ქართული პასპორტი უნდა მიეღო.

* * *

ვაჩიბერაძის გადაწყვეტილება უკრაინელებისთვის მოულოდნელი და რეზონანსული გამოდგა. გუშინ იქაურმა "სპორტ-ექსპრესმა" მას რამდენიმე წერილი უძღვნა.
ბექასთან დაკავშირებულ ვითარებაზე კომენტარი მისმა მენეჯერმა ანდრეი გოლოვაშმა გააკეთა.

"ამ გადაწყვეტილების მიღება იოლი არ იყო. ის უკრაინის ნაკრების გამო ყოველთვის განიცდიდა. მაგრამ არის სხვადასხვა გარემოებები. როდესაც გარედან უყურებ, რას უკეთებენ უკრაინულ ფეხბურთს, ძალაუნებურად დაფიქრდები და დასკვნები გამოგაქვს. ასე ვიტყვი - არცერთი თავმოყვარე მოთამაშე არ ისურვებს, რომ ვინმეს კერძო პროექტების მძევალი გახდეს", - ამბობს გოლოვაში.

რომელ კლუბში ითამაშებს ვაჩიბერაძე?
დონეცკიდან ვაჩიბერაძე ესპანურ "ბეტისში" გადავიდა და სარეზერვოს გუნდის შემადგენლობაში ასპარეზობდა. თუმცა, წლეულს ზაფხულში გუნდი დატოვა და ზამთრის სატრანსფერო პერიოდში ახალ კლუბში ჩარიცხვას იმედოვნებს.

ბექას მენეჯერის, ანდრეი გოლოვაშის თქმით, ესპანურ "ბეტისში" ადგილის დამკვიდრებაში ქართველს ხელი არა კლასმა, არამედ არაევროკავშირელის სტატუსმა შეუშალა:

"ეს იყო მთავარი მიზეზი და ფეხბურთელი აგვისტოდან უგუნდოდაა. მაგრამ წინადადებების ნაკლებობას არ განვიცდით. ამიტომ მკაფიო ერთობლივი პოზიცია გაგვაჩნია - მხოლოდ იმიტომ, რომ გუნდში იყოს, კონტრაქტს არ გააფორმებს. ის არასტანდარტული ფეხბურთელია და ისეთი გუნდი და მწვრთნელი სჭირდება, რომლებიც მისი სტილის მოთამაშეს დააფასებენ და სადაც გაიზრდება.

"ბეტისთან" კონტრაქტი 30 ივლისს დაუსრულდა. გადაწყვეტილი იყო, რომ ერთ-ერთ სოლიდურ ევროპულ კლუბში ჩაირიცხებოდა. თუმცა ეს ტრანსფერი მწვრთნელის მოულოდნელი შეცვლის გამო ჩაიშალა, თანაც, ბექას შეკრებაზე გამგზავრებამდე. უპირველესად, კლუბში ვითარება ახალგაზრდებთან მიმართებაში შეიცვალეს და გადასვლამ აზრი დაკარგა.

შემდეგ ორი საინტერესო ვარიანტი გვქონდა ჰოლანდიიდან, რომელსაც ბექა სათამაშო სტილით ცალსახად მოერგებოდა. ერთ-ერთ კლუბში ვაჩიბერაძეს გუნდის ლიდერი უნდა შეეცვალა, რომელიც თურქეთში გამგზავრებას აპირებდა. მაგრამ საბოლოოდ კლუბები ვერ შეთანხმდნენ.

მეორე ჰოლანდიურ გუნდში ტრანსფერი კი კლუბის ფინანსურმა მდგომარეობამ დააბრკოლა. ამ ქვეყანაში კი არაევროკავშირელი ფეხბურთელებისთვის დაწესებულია ხელფასის მინიმალური ზღვარი, მაგრამ მისი გადახდა ყველა კლუბს არ შეუძლია.

ნებისმიერ შემთხვევაში, ბექა შესანიშნავი ფეხბურთელია და დარწმუნებული ვარ, ყველაფერი მალე დალაგდება. ერთ თვეზე მეტია, ველოდებით, რომ ერთ-ერთ ევროპულ ქვეყანაში სამუშაო ვიზა მისცენ. არსებობს მოთხოვნები და ჩვენ ის უნდა შევასრულოთ. ვიმედოვნებ, საკითხი მალე მოგვარდება".

ზაზა ვაჩიბერაძე ამ დაინტერესებულ ბერძნულ კლუბს გვიმხელს: "რადგან თავისუფალი აგენტია, კლუბში ჩარიცხვის მეტი იმედი და შანსი აქვს. ბერძნული კლუბი კი "ოლიმპიაკოსი" გახლდათ. თუმცა მალე ახალ კლუბში ჩაირიცხება".

დაბრუნებულები
ბექა ვაჩიბერაძე პირველი ფეხბურთელი არაა, რომელმაც ისტორიულ სამშობლოში თამაში ამჯობინა. 1995 წელს, ვლადიმერ გუცაევის მოწადინებით, დონეცკის "შახტარისა" და უკრაინის ახალგაზრდული ნაკრების თავდამსხმელმა მიხეილ ფოცხვერიამ საქართველოს პასპორტი აიღო და ახალგაზრდულ და ეროვნულ ნაკრებში ითამაშა.

სოჭის "ჟემჩუჟინას" მეკარე დავით ხმელიძე 1999 წელს საქართველოს ახალგაზრდული ნაკრების მიწვევას დათანხმდა.

რუსეთის ახალგაზრდული ნაკრების მცველი იყო გია გრიგალავა, რომელმაც საქართველოს პასპორტი 2010 წელს დაიბრუნა. იგივე ნაბიჯი გადადგა 2016 წელს უკრაინის ახალგაზრდული ნაკრების წევრმა ვაკო გვილიამ, რომელიც ახლა საქართველოს ეროვნული გუნდის ნახევარმცველია.

გაჭირვებისა და პრობლემების გამო ქვეყნიდან მილიონზე მეტი ადამიანია წასული, საქართველოს კი დასაკარგავი შვილი არ ჰყავს. ამიტომ, ჩვენს სამშობლოში დაბრუნებულ ყოველ ახალ ფეხბურთელს ისე შევხვდებით, როგორც მის წინამორბედებს - ვინც მოვიდა, გაუმარჯოს!

ყოველდღიური სპორტული გაზეთი "ლელო"
1384
მკითხველის კომენტარები / 0 /
მსგავსი ამბები
რუბრიკის სხვა სიახლეები