იდუმალი მადაგასკარი: იქ ფეხბურთი 149:0 რჩება, გვარებით ენას მოიტეხთ - რაკოტოჰარიმალალა...

როდის გინახავთ ბოლოს მადაგასკარის ნაკრები დიდ საფეხბურთო ფორუმზე? ნუ დაიღლებით ფიქრით, 2019 წლის აფრიკის თასის გათამაშება ამ ნაკრებისთვის პირველი დიდი ტურნირია.

მადაგასკარის ფეხბურთის ფედერაციის დაარსებიდან (1947 წელი) 49 დიდმა ტურნირმა ჩაიარა მათ გარეშე, 50-ე (ახლა მიმდინარე აფრიკის თასი) მათთვის იღბლიანი აღმოჩნდა.

2017 წლიდან ნაკრების მთავარ მწვრთნელად ნიკოლა დიუპუი მუშაობს. ფეხბურთელობის დროს ამპლუით ცენტრალურმა მცველმა, საფეხბურთო კარიერა საფრანგეთის დაბალი ლიგის გუნდებში გაატარა, მწვრთნელად მადაგასკარში დანიშვნამდე მუშაობდა საფრანგეთის დაბალი დივიზიონის კლუბ „იზერში“. სწორედ დიუპუის სახელს უკავშირდება მადაგასკარის ნაკრების ახალ სიმაღლეზე აღზევება.

ბორჯღალოსნები. ბარბაროსების შემდეგ კაციჭამიებში! რა არის ფიჯი?

აფრიკის თასის საკვალიფიკაციო ეტაპის დაწყებამდე ნაკრები გვარიანად გადახალისდა. როდესაც ახალი მწვრთნელი მუშაობას შეუდგა, პირველი რაც გააკეთა, ჩამოაყალიბა სკაუტების საკმაოდ ფართო ჯგუფი, რომელთაც დაევალათ საფრანგეთის მასშტაბით მოეძებნათ ფებურთელები მალაგასური ფესვებით. შედეგად, მადაგასკარის ნაკრების 14 წევრი საფრანგეთში თამაშობს, 9 კი იქვეა დაბადებული.

აი, რას ამბობს ნაკრების ფორვარდი ფანევა ადრიატისმა: „მადაგასკარმა საფრანგეთისგან დამოუკიდებლობა 1960 წელს მიიღო, მაგრამ ჩვენ შორის მაინც მჭიდრო კავშირებია. ჩვენს ქვეყანაში პროფესიული ფეხბურთი არ არსებობს, ამიტომ ბევრი ჩვენიანი ფეხბურთის სათამაშოდ და ოცნების ასახდენად საფრანგეთში მიდის. 10 წლის ვიყავი, როდესაც მეც ამ გზას დავადექი. ახლა სულ უფრო ბევრ მადაგასკარელ ბავშვს უნდა ფეხბურთის თამაში და ქვეყნის ღირსების დაცვა. ეს ძალიან სასიხარულოა. ორმაგი მოქალაქეობის მქონე ფეხბურთელები ბელგიიდან, საფრანგეთიდან, გერმანიიდან და სხვა ქვეყნებიდან დაგვეხმარნენ, რომ ჩვენს ქვეყანაში ფეხბურთი ახალ სიმაღლეზე გასულიყო.

როდესაც პატარა ვიყავი, ბრაზილიის ნაკრების თამაშს ვუყურებდი, მომწონდა ბებეტო, ლეონარდო, რომარიო. იმედი მაქვს, აფრიკის თასზე ჩვენი დებიუტი ახალი ათვლის წერტილი გახდება ქვეყანაში ფეხბურთის განვითარებისა და მომავალი წარმატებისთვის. სულ უფრო მეტი პატარა მოინდომებს ფეხბურთელობას”.

აფრიკის თასის შესარჩევ ტურნირზე მადაგასკარმა ჯგუფში 10 ქულა დააგროვა ჩამორჩა მხოლოდ სენეგალის ნაკრებს, ხოლო გადაასწრო სუდანსა და ეკვატორულ გვინეას, ჯგუფში მეორე ადგილი დაიკავა და 2019 წლის აფრიკის თასზე თამაშის უფლება ამგვარად მოიპოვა.



პროფესიული ფეხბურთი პრობლემაა: აქ ჩატარდა მატჩი, რომელიც 149:0 დასრულდა

რა თქმა უნდა, ქვეყანაში ტარდება ჩემპიონატი, თასის გათამაშება და თქვენ წარმოიდგინეთ, სუპერთასიც. 22 რეგიონული დივიზიონიდან 24 საუკეთესო კლუბი, მადაგასკარის უმაღლეს ლიგაში (THB Champions League) თამაშობს. ჩემპიონატის სისტემა კი საკმაოდ საინტერესოა.

პირველობა ტარდება სამ ეტაპად და გრძელდება სამი თვე, ივნისის შუა რიცხვებიდან სექტემბრის შუა რიცხვებამდე.

I ეტაპი: გუნდები იყოფიან 4 ჯგუფად (თითოში 6-6 გუნდი), ჯგუფის 3-3 გამარჯვებული აგრძელებს ბრძოლას.

II ეტაპი: ორი 6-გუნდიანი ჯგუფიდან 2-2 გამარჯვებული აგრძელებს ბრძოლას;

III (ფინალური) ეტაპი: 4-გუნდიანი მინი-ტურნირი. გუნდები ერთმანეთში 2-2 თამაშს ატარებენ და გამარჯვებული ხდება ჩემპიონი.

სხვათა შორის მადაგასკარში ჩატარდა მატჩი, რომლის შედეგიც გინესის რეკორდების წიგნშია შესული და, სავარაუდოდ, მას ვერც ვერავინ მოხსნის. 2002 წელს „ადემასა“ და „ანტანანარივუს“ მატჩი დასრულდა, არც მეტი არც ნაკლები, 149:0 (!!!). აღსანიშნავია, რომ სტუმრებმა ყველა გოლი საკუთარ კარში გაიტანეს. საქმე ისაა, რომ ეს იყო ერთგვარი მატჩი-პერფორმანსი, რომელშიც სტუმარი ფეხბურთელები გამოხატავდნენ უკმაყოფილებას სხვა მატჩებში მსაჯების მიერ მიღებული უსამართლო გადაწყვეტილებების გამო. თითოეული გოლის შემდეგ ადგილობრივი დიქტორი აცხადებდა გოლის ავტორს, მსაჯიც წარბშეუხრელად უთითებდა ცენტრისკენ, მაყურებელი კი სალაროებთან იდგა და ბილეთის ფულის დაბრუნებას ითხოვდა.

იყო გარკვეული წარმატებებიც. მაგალითად მადაგასკარმა ორჯერ მოიგო ინდოეთის ოკეანის თამაშები (1990 და 1993 წლებში), 2007 წელს ფინალში წააგო პენალტების სერიაში. ყველაზე სერიოზულ მიღწევად კი 2008 წელს სამხრეთ აფრიკის ნაკრებების (COSAFA. COuncil of Southern Africa Football Associations) ტურნირზე დაკავებული მე-4 ადგილი მიიჩნევა



გვარები თუ ენის გასატეხი...

რანდრიანასოლა, რანდრიანარისოა, რაზაკანანტენაინა, ანდრიანანტენაინა, ანდრიანარიმანანა, რაკოტოჰარიმალალა, რაკოტონდრაზაკა - ენის გასატეხი არ გეგონოთ, ეს მადაგასკარელი ფეხბურთელების გვარებია. ასეთ გვარებს თავისი ახსნა აქვს. ტრადიციულად მალაგასურ ენაში (მადაგასკარის მაცხოვრებლების ძირითადი ენა) განცალკევებულად არ არის სახელი, მამის სახელი და გვარი. ისინი ერთ სიტყვაში არის გაერთიანებული და ამიტომაც ჟღერს მათი გვარები ასე.

ფრანგული კოლონიზაციის ეპოქაში (მადაგასკარის ანექსია მოხდა 1896 წელს) გვარები თანდათან შემოკლდა, ხოლო რთულად წარმოსათმქლი სიტყვები ენიდან გაქრა.

ჟურნალისტი და მთარგმნელი ალენ რაკოტონდანდრია აღნიშნავს, რომ ყველაზე გრძელი და რთულად წარმოსათქმელი გვარები დღესდღეობით შემორჩენილია კუნძულის ცენტრალურ რეგიონებში. კიდევ უფრო ძნელად წარმოსათქმელი ხდება გვარები ქორწინების შემდეგ: „წარმოიდგინეთ, სახონდრა რაკოტომალალა ცოლად მიჰყვება ანდრიესიფენარივოს, ქორწინების შემდეგ მისი გვარი ხდება სახონდრა ანდრიესიფენარივო-რაკოტომალალა.

ბოლო დროს ბევრი ადამიანი საკუთარ თავს მხოლოდ შემოკლებული თიკუნით მოიხსენიებს მაგალითად როგორც არის „ზაფი“, „ბოტო“ და ასე შემდეგ“...
აღსანიშნავია, რომ ბოლო დროს, რიგ შემთხვევებში, მოსახლეობა მადაგასკარის დედაქალქ ანტანანარივუსაც კი შემოკლებით ანტას უწოდებენ...

8867
მკითხველის კომენტარები / 1 /
კალიოსტრო
0
ბაბუა მყავდა ოტორინოლარინგოლოგი, მერე გაკონტრრევოლუციონერდა მაგრამ მაკომპრომეტირებელი არაფერი დაუტოვებია.
თქვენ შემაშინებთ მე მადაგასკარული გვარებით ?!
მსგავსი ამბები
რუბრიკის სხვა სიახლეები
;