იკარდი ნეაპოლში მიდის? მაგრამ იუვენტუსი სერიოზული კონკურენტია...

Tuttomercatoweb ძალიან საინტერესო ინფორმაციას ავრცელებს - არგენტინის ეროვნული ნაკრებისა და "ინტერის" შემტევი მაურო იკარდი კარიერას, დიდი ალბათობით, "ნაპოლიში" გააგრძელებს, ტრანსფერი კი ზაფხულში შედგებაო...

"ნაპოლი" კი, თურმე, მზადაა, იკარდის წელიწადში ჯამაგირად 9 მილიონი ევრო დაუნიშნოს. გარდა ამისა, 26 წლის არგენტინელი ფორვარდი, წლიური ბონუსების სახით, 2 მილიონ ევროსაც მიიღებს. თუ ტრანსფერი შედგა, იკარდი იტალიის ჩემპიონატში ყველაზე მაღალანაზღაურებადი ფეხბურთელი იქნება კრიშტიანო რონალდოს შემდეგ.

არადა, "ნაპოლის" ძალიან ძლიერი კონკურენტი ჰყავს "იუვენტუსის" სახით. თავის მხრივ, "ბებერი ქალბატონი" მზადაა, იკარდის სანაცვლოდ 110 მილიონი ევრო გადაიხადოს. ესეც არ იყოს, "იუვეში" იკარდის ტიტულების მოგების გაცილებით მეტი შანსი ექნება.

ამ დროისთვის იკარდის "ინტერიდან" წასვლა გადაწყვეტილ ამბად მოსჩანს. ის, ფაქტობრივად, გაფიცულია. მას ცოტა ხნის წინ "ინტერის" კაპიტნის სამკლაური ჩამოართვეს და მას მერე უარსაა თამაშზე.

საინტერესო კომენტარი გააკეთა იკარდის ყოფილმა აგენტმა აბიან მორანომ: "მას შემდეგ, რაც ვანდა ნარა (იკარდის ცოლი და ამავე დროს აგენტიც) აქტიურად ჩაერთო იკარდის ცხოვრებაში, ვითარება შეიცვალა. ადრე იკარდი მუდამ განვითარებაზე ფიქრობდა, ახლა კი ის იზოლირებულია. არც მიკვირს, რომ ასე ხდება. მე გარკვეული დროის განმავლობაში მომიხდა ვანდასთან მუშაობა და ვიცი, ვინც არის ის", - თქვა ფეხბურთელის ყოფილმა აგენტმა.

"ინტერმა" კი ვითომდა უკვე იპოვა იკარდის შემცვლელი - დიდი ალბათობით, "ნერაძური" ზაფხულში "ფიორენტინას" იმედისმომცემ შემტევს, ფედერიკო კიეზას დაიმატებს. სახელგანთქმული მამის, ენრიკო კიეზას ვაჟი ახლა ჩინებულ ფორმაშია და ფლორენციელთა ერთ-ერთ ლიდერადაც ითვლება.

ყოველდღიური სპორტული გაზეთი "ლელო"
658
მკითხველის კომენტარები / 0 /
მსგავსი ამბები
რუბრიკის სხვა სიახლეები
;