[PHOTO] თავდასხმა იკარდის ცოლზე და რეალის უარი: ვანდას გამო მაუროს არ ვიყიდოთო...

მაურო იკარდის გამო ვნებათაღელვა არ ცხრება. ყურადღების ცენტრში მოექცა მისი მეუღლე ვანდა ნარაც, რომელიც ახლა ქმრის აგენტია და მის თითოეულ ნაბიჯს აკონტროლებს. თუმცა ვანდას პოპულარობა არც მანამდე აკლდა, ვიდრე იკარდის ცოლი გახდებოდა - ის გავლენიანი ქალი იყო იტალიურ შოუბიზნესში და დღესაც ასეა. იტალიაში ბევრს იცინიან იმაზე, თუ როგორ დაატარებს ის ქმარს პატარა ბავშვივით ხელჩაკიდებულს...

ასევე, ყველა დარწმუნებულია იმაში, რომ რაც იკარდის თავს ხდება, დიდწილად ვანდას ბრალია. სწორედ ვანდაა განხეთქილების მიზეზი 25 წლის არგენტინელსა და "ინტერის" ახალ გენერალურ დირექტორ ბეპე მაროტას შორის. როგორც ამბობენ, ცოლის ზეწოლით იკარდიმ უარი თქვა "ინტერთან" ახალი კონტრაქტის გაფორმებაზე, იმ იმედით, რომ ზაფხულში "რეალში" გადავიდოდა...

თუმცა "ფუტბოლ იტალია" წერს, რომ "სამეფო კლუბმა", თავის მხრივ, უარი თქვა იკარდის ყიდვაზე სწორედაც ცოლის გამო. მადრიდშიც თვლიან, რომ ფეხბურთელი ზედმეტადაა დამოკიდებული გავლენიან თანამეცხედრეზე. მათ სურთ ისეთ მოთამაშესთან ჰქონდეთ საქმე, რომელსაც სერიოზული აგენტი ჰყავს...

შეგახსენებთ, რომ "ინტერის" ხელმძღვანელობასთან" ურთიერთობის გაფუჭება იკარდის კაპიტნობის დაკარგვად დაუჯდა. ამის შემდეგ მაურომ უარი თქვა გუნდთან ერთად ავსტრიაში გამგზავრებაზე, სადაც "ინტერს" "რაპიდთან" ევროპალიგის 1/16 ფინალის პირველი მატჩი უნდა ჩაეტარებინა. "ინტერმა" ეს მატჩი იკარდის გარეშეც მოიგო - 1:0.

ამასობაში, ვანდამ დიდი შიში ჭამა გუშინ, როცა მის მანქანას უცნობმა (თუ უცნობებმა) ქვები დაუშინა. ის ბავშვებთან ერთად მგზავრობდა. პოლიციას ჯერ არაფერი დაუდგენია. ერთმნიშვნელოვნად იმის თქმა, რომ ეს თავდასხმა (თუ მართლა თავდასხმაა) ბოლოდროინდელ ამბებს უკავშირდება, ალბათ, არ შეიძლება. ვნახოთ, რას იტყვის გამოძიება.

1036
მკითხველის კომენტარები / 0 /
მსგავსი ამბები
რუბრიკის სხვა სიახლეები
;