ილიას ზუროსი: კრიტიკული მომენტია, მაგრამ საქართველოსთვის უნდა გავერთიანდეთ

კალათბურთის ფედერაციაში მთავარი მწვრთნელის ილიას ზუროსის პრესკონფერენცია გაიმართა. ჯერ წარმოგვიდგინეს ნაკრების 24-კაციანი გაფართოებული შემადგენლობა, რის შემდეგაც მწვრთნელმა ბევრ საჭირბოროტო საკითხზე ილაპარაკა.

 - ზუროსის 24 კაციან განაცხადში ცქიტიშვილიცაა და შენგელია-შერმადინიც

"ყველამ კარგად ვიცით, რომ კრიტიკულ მომენტში ვართ. მსოფლიოს ჩემპიონატის საკვალიფიკაციო ეტაპზე ახალი სისტემაა, მატჩები მთელს წელზე ნაწილდება.

დიდი პრობლემაა ფიბა-სა და ევროლიგას შორის შეუთანხმებლობა, რომლის შედეგიც ის არის, რომ ნაკრები ისეთი ძლიერი ვერ იქნება, როგორიც უნდა იყოს. სადღეისო ინფორმაციით ვერ ჩამოდიან გიორგი შერმადინი და თორნიკე შენგელია." 

როგორც ბერძენმა სპეციალისმა აღნიშნა, ქართული მხარე ყველა ღონეს ხმარობს, რომ ევროლიგის მოთამაშეები დაგვეხმარნონ.

"კალათბურთის ფედერაცია აქტიურად მუშაობს ჩვენი ლეგიონერების კლუბებთან, დროულად დაიგზავნა წერილები, ჩვენს კალათბურთელებთანაც მუდმივი კონტაქტი გვაქვს, მაგრამ ჯერ დადებითს ვერაფერს გეტყვით.

საერთოდ, სიტუაცია ძალიან რთულია: როდესაც ევროლიგის კლუბი კალათბურთელს მილიონს უხდის, ყოველთვის ცდილობს მოთამაშე თავად გამოიყენოს სათანადოდ და მოუფრთხილდეს. საქმე კიდევ უფრო რთულდება იმიტომაც, რომ თავად კლუბს აქვს ევროლიგაზე თამაში სწორედ მაშინ, როცა სანაკრები მატჩებია. ექსტრემალურად მძიმე მდგომარეობაში არიან მოთამაშეები.

მათ უყვართ ნაკრები, საკუთარი ქვეყანა, მაგრამ ამავე დროს პროფესიონალები არიან და კლუბთან ვალდებულებებზე ფიქრობენ. მათ ხომ არ იციან, რა მოხდება გუნდში, თუ ნაკრებში სათამაშოდ ჩამოვლენ."

ილიას ზუროსმა არსებულ რესურსზეც ილაპარაკა:

"ევროლიგის კალათბურთელების არყოფნა მხოლოდ ჩვენი პრობლემა არ არის, სხვა გუნდებსაც ვერ დაეხმარებათ ევროლიგელები. ჩვენ კი ვეცდებით არსებული რესურსით მივაღწიოთ შედეგს. ფაქტობრივად, მთელი წინა ხაზი იცვლება. ნაკრები სრულად გერმანიასთან თამაშამდე ორიოდე დღით ადრე იკრიბება. ამ დროში კი სათამაშო სისტემებისა და სტრატეგიის დახვეწას ვერ მოასწრებ.

თუმცა ვიმედოვნებ, კალათბურთელების, მწვრთნელთა შტაბისა და საერთოდ, ყველას ერთმანეთის გვერდში დგომით სწორი ნაბიჯებით ვივლით, გავაკეთებთ საუკეთესოს კალათბურთისთვის და ქვეყნისთვის."

პრესკონფერენციის სრულ ვერსიას გაზეთ "ლელოს" 14 ნოემბრის ნომერში იხილავთ.

1890
მკითხველის კომენტარები / 0 /
მსგავსი ამბები
რუბრიკის სხვა სიახლეები
;