ილიას ზუროსი: სანაძისა და ცინცაძის ტრავმებმა საქმე კიდევ უფრო გაართულა

საქართველოს კალათბურთელთა ნაკრები 12 ნოემბრიდან მსოფლიოს თასის მატჩებისთვის ემზადება. მწვრთნელმა ილიას ზუროსმა თავდაპირველად საქართველოს ჩემპიონატში მოთამაშე კალათბურთელები შეკრიბა, რომლებსაც უკულუბოდ მყოფი ნიკა ცქიტიშვილი დაემატა.

მას მერე ნაკრები ნელ-ნელა ივსება, თუმცა ზოგი ისეთი მოთამაშე ვერ ჩამოდის, რომელთა იმედიც მთავარ მწვრთნელს ჰქონდა.

- შეკრებაზე ველოდით გიორგი ცინცაძესა და დუდა სანაძეს. გიორგი სანაკრებოდ ჩამოვიდა კიდეც, მაგრამ აღმოჩნდა, რომ ტრავმირებულია და ვერ დაგვეხმარება. ასევე დიდი იმედი გვქონდა დუდა სანაძის, რომელიც კარგად მოერგო იტალიის ჩემპიონატს, თუმცა მას სერიოზული ტრავმა აქვს და ოპერაცია სჭირდება.

ამას დავამატოთ ისიც, რომ ვერ გვეხმარებიან ბექა ბურჯანაძე (ნაოპერაციებია) და ტრავმის გამო კარიერადასრულებული ვიქტორ სანიკიძე. მძიმე მდგომარეობაში ვართ, მაგრამ არსებული რესურსით მაქსიმუმი უნდა გავაკეთოთ, - გვითხრა ნაკრების ბერძენმა დამრიგებელმა ილიას ზუროსმა.

დანაკლისი მხოლოდ ტრავმირებულებით არ იფარგლება, გვაკლია ევროლიგის კალათბურთელებიც...

- თორნიკე შენგელიასა და გიორგი შერმადინთან მიმართებაში არაფერი შეცვლილა. ევროლიგა ისევ თავის აზრზეა და ტურის გადატანას არ აპირებს. ასეთ პირობებში კი კლიბები, რომლებიც მოთამაშეებს ხელფასს უხდიან, ყველანაირად მოერიდებიან მათი ნაკრებში გამოშვებას.

ეროვნული გუნდის ვარჯიშები თითქმის ერთი კვირაა, რაც დაიწყო, თუმცა მწვრთნელი კიდევ შვიდ კალათბურთელს ელის. მათგან ოთხი დინამოელია.

- "დინამოს" ფიბა-ევროპის თასზე ოთხშაბათს თამაში ჰქონდა, რუმინეთიდან დაბრუნების შემდეგ კი ოთხი დინამოელი (ლევან ფაცაცია, ნოდარ გოგოძე, მიხეილ ბერიშვილი და ილია ლონდარიძე) პარასკევს საღამოს შემოგვიერთდება.

რაც შეეხებათ ლეგიონერებს, მანუჩარ მარკოიშვილი და მაიკლ დიქსონი პირდაპირ გერმანიაში ჩამოვლენ. "სერბეთში მოასპარეზე გოგა ბითაძე შესაძლოა, საქართველოში გადმოფრინდეს და ნაკრებთან ერთად გამოემგზავროს გერმანიაში.

1643
მკითხველის კომენტარები / 0 /
მსგავსი ამბები
რუბრიკის სხვა სიახლეები
;