ტოჩინოშინი: ბევრჯერ მიფიქრია სუმოსთვის თავის დანებება...

დაუჯერებელია, მაგრამ ფაქტია, ქართველმა სუმოისტმა ტოკიოში მონღოლი, დიდი ჩემპიონების დომინაცია დაამხო და ისტორიაში პირველად მოიგო ბაშო.

მისი გამარჯვება უდიდესი სენსაცია იყო, რადგან ბოლოს რიგითმა მაეგაშირამ ბაშო 6 წლის წინათ მოიგო.

2018 წლის პირველი სუპერტურნირის - ჰაცუ ბაშოს - დასრულებამდე ერთი დღით ადრე, 30 წლის ქართველმა ლევან გორგაძემ (ტოჩინოშინი) ჩემპიონობა და იაპონიის იმპერატორის თასი დაიბევა! შაბათს მან იორიკირის ილეთით მე-9 მაეგაშირა შოჰოზანი დაამარცხა.

ეს იყო მისი მე-13 გამარჯვება და ქართველი მეტოქეებისთვის მიუწვდომელი გახდა. ბაშოს უკანასკნელ დღეს ტოჩინოშინი შოთა ენდოს ხვდებოდა, თუმცა ამ ბრძოლას მნიშვნელობა აღარ ჰქონდა - ქართველი სუმოისტი ჩემპიონია!

ასპარეზობის ბოლო დღეს მან მძლავრი ოშიდაშით შოთა ენდო დაამარცხა და 14-1 ბალანსით დაასრულა სუპერტურნირი. ქართველმა ახლოსაც არ გაიკარა კონკურენტები - მეორე ადგილზე ოძეკი (ჩემპიონი) ტაკაიასუ 12-3 ბალანსით გავიდა, ხოლო მესამე ადგილზე დაასრულა სუპერტურნირი დიდმა ჩემპიონმა კაკურიუმ. ორი სხვა დიდი ჩემპიონი (იოკოძუნა) ჰაკუჰო და კისენოსატო ტრავმების გამო ბაშოს მიმდინარეობისას მოიხსნენ.

იმპერატორის თასის გარდა, ქართველმა სუმოისტმა ბრწყინვალე ასპარეზობის პრიზი (შუკუნ-შო) და ტექნიკური რიკიშის პრიზი (გინო-შო) მიიღო. შუკუნ-შო მან კარიერაში პირველად მიიღო, გინო-შო - მეორედ.

მეორე დივიზიონი დადებითი ბალანსით დაასრულა თეიმურაზ ჯუღელმა (გაგამარუ) - ძურიოს მე-5 ნომერმა ქართველმა ბოლო დღეს გადამწყვეტი ბრძოლა კოტოეკოს მოუგო და 8-7 ბალანსით რეიტინგში წინსვლა დაიბევა.

26 თებერვალს ახალი რეიტინგი გამოქვეყნდება, დიდი ალბათობით სეკივაკეს რანგში დაწინაურდება. წლის მეორე ბაშო ქალაქ ოსაკაში 11-25 მარტს გაიმართება.

საბოლოო მდგომარეობა

14-1: ტოჩინოშინი (მაეგაშირა 3)
12-3: ტაკაიასუ (ოძეკი)
11-4: კაკურიუ (იოკოძუნა)
10-5: იჩინოჯო (მ 1), აბი (მ 14), რიუდენი (მ 16).

ფაქტები

* ტოჩინოშინი გახდა პირველი სუმოისტი 2012 წლის მერე, რომელმაც იმპერატორის თასის მოგება რიგითი მაეგაშირას რანგით მოახერხა.

* ტოჩინოშინმა გაინაღდა კომუსუბის რანგი, თუმცა, დიდი ალბათობით, მას სეკივაკეს რანგშიც დააწინაურებენ.

* ტოჩინოშინი 2012 წლის შემდეგ პირველი ევროპელი სუმოისტია, რომელმაც იმპერატორის თასი მოიგო.

* ტოჩინოშინი სულ მესამე ევროპელია, ვინც იმპერატორის თასი მოიგო.

* ტოჩინოშინს 12 გამარჯვებაზე მეტი ელიტაში აქამდე არასოდეს მოუპოვებია.

* ეს ტოჩინოშინის პირველი გამარჯვებაა ბაშოზე (თუ ქვედა დივიზიონებს არ ჩავთვლით).

ბევრჯერ მიფიქრია დანებებაზე

ტოჩინოშინმა, შოჰოზანთან გადამწყვეტი გამარჯვების შემდეგ, Mაინიცჰი.ჯპ-ის შემდეგი განუცხადა:

"ეს არის საუკეთესო რამ ჩემს კარიერაში, ძალიან ბედნიერი ვარ. იმპერატორის თასის მოგებაზე ვერც კი ვიოცნებებდი, როცა მძიმე ტრავმის გამო მესამე დივიზიონ მაკუშიტაში დავქვეითდი. ძალიან, ძალიან ბევრჯერ ვფიქრობდი, სუმოსთვის თავის დანებებას.

მაგრამ, როცა საავადმყოფოდან გამოვედი, ფსიქოლოგიურად უკვე მზად ვიყავი და, მიუხედავად იმისა, რომ რეიტინგში ძალიან დავქვეითდი, ჩემი დამოკიდებულება დიამეტრულად შეცვლილი იყო.

ჩემმა მწვრთნელმა და მისმა მეუღლემ გამამხნევეს და მეც მსურდა, კიდევ ერთხელ მეცადა ბრძოლაში ჩაბმა".

კომენტარი მან გუშინაც გააკეთა: "ტურნირი გუშინ მოვიგე, მაგრამ ბაშოს დასრულება გამარჯვებით მსურდა და მოხარული ვარ, რომ ეს შევძელი. 12 წლის წინათ შევაბიჯე სუმოში, მაგრამ არასოდეს მიფიქრია, რომ ბაშოს მოგებას შევძლებდი.

ამ ბაშოს წინ კარგ ფიზიკურ ფორმაში ვიყავი, ვარჯიშიც შესანიშნავად მიდიოდა, მაგრამ მაინც არ მეგონა, თუ იმპერატორის თასს მოვიგებდი".

პრიზი

ბაშოს მოგებისთვის ქართველმა სუმოისტმა 10 მილიონი იენი მიიღო, რაც დაახლოებით 226 ათასი ლარია. კერძო სპონსორებით, რომლებიც კონკრეტულ ბრძოლებს ასპონსორებენ, ტოჩინოშინმა კიდევ 106 ათასი ლარი მიიღო. ამასთან, ქართველის კლუბი ბაშოს მოგებისთვის სხვადასხვა პროდუქტს მიიღებს ერთი წლის განმავლობაში.

ყოველდღიური სპორტული გაზეთი "ლელო"
9186
მკითხველის კომენტარები / 0 /
მსგავსი ამბები
რუბრიკის სხვა სიახლეები