ინგლისელების გეგმები - 443 მლნ გირვანქა რაგბის განვითარებისა და ფეხბურთის დაჩრდილვისთვის

ინგლისის რაგბის კავშირმა გადაწყვიტა მომავალი ოთხწლიანი განვითარების გეგმაში 443 მილიონი გირვანქა სტერლინგი ჩადოს, რათა რაგბი ინგლისში დომინანტი სპორტის სახეობა გახდეს და ფეხბურთი დაჩრდილოს. ეს ინფორმაცია telegrafh.co.uk-მა გაავრცელა.

ზემოთ აღნიშნული თანხა 30 პროცენტით მეტია იმ ინვესტიციაზე, რაც ინგლისის რაგბის კავშირმა გასულ ოთხწლიან ციკლში მოიზიდა. ინგლისელების მიზანია: 2019 წელს იაპონიაში გასამართი მსოფლიოს თასის მოგება და რეიტინგში პირველ ადგილზე გადასვლა; 2020 წლის ტოკიოს ოლიმპიადაზე შვიდკაცა რაგბის ტურნირის მოგება; 2021 წელს ქალთა შორის მსოფლიოს ჩემპიონატის მოგება; ასევე ექვსი ერის გათამაშების ყველა წელიწადს მოგება.

ცხადია, ფინანსები ინგლისში ფეხბურთში მეტია, რაც რაგბის გაპირველებას ამ ქვეყანაში სერიოზულ წინააღმდეგობას უქმნის. თუმცა, თუ საერთაშორისო ასპარეზზე ეროვნული და ქალთა ნაკრებები წარმატებას მიაღწევენ, ანუ დასახულ გეგმას განახორციელებენ, ეს რაგბის კიდევ უფრო მეტად პოპულარიზაციას გამოიწვევს.

ისიც არ დაგვავიწყდეს, რომ სამეფო ოჯახი სერიოზულადაა გატაცებული რაგბით. პრინცი ჰარი, სულაც ინგლისის რაგბის კავშირის "პატრონია". მისი ძმა უილიამი კი, უელსის რაგბის კავშირს უდგას მხარში.

"ჩვენთვის მეორეობა ექვსი ერის გათამაშებაში არაფერს ნიშნავს. მიზანი მხოლოდ მისი მოგებაა. გვინდა, რაგბი ყოველი ინგლისელის ცხოვრებაში შევიდეს. ყველა ეზიაროს მის ფასეულობებს." - თქვა ინგლისის რაგბის კავშირის აღმასრულებელმა დირექტორმა სტივენ ბრაუნმა.

ცხადია, ყველას ახსოვს როგორი რეაქცია გამოიწვია ინგლისელებში 2003 წელს, ავსტრალიაში მსოფლიოს თასის მოგებამ. მსგავსი მიღწევის გამეორება სერიოზულ იმპულსს მისცემს რაგბის კიდევ უფრო მეტად პოპულარიზაციას. 2021 წლამდე 253 მილიონი გირვანქა სტერლინგი პროფესიულ რაგბიზე დაიხარჯება. 190 მილიონი კი, სხვა მიმართულებებს მოხმარდება, როგორიცაა სათამაშო მოედნების მოწყობა, ინფრასტრუქტურა, განათლება და სხვა.

ყოველდღიური სპორტული გაზეთი "ლელო"
1223
მკითხველის კომენტარები / 0 /
მსგავსი ამბები
რუბრიკის სხვა სიახლეები
;