ინგლისის ლიგის თასი. შერცხვენილი იუნაიტედი

"მანჩესტერ იუნაიტედი" ინგლისის ლიგის თასის მეოთხედფინალში შერცხვა. ჟოზე მოურინიოს გაწვრთნილმა გუნდმა 1:2 წააგო ჩემპიონშიფის (რანგით მეორე ლიგა) მესამეადგილოსან "ბრისტოლ სიტისთან", რამაც ინგლისურ მედიას გვარიანი სალაპარაკო მისცა.

გუნდებს შორის ხომ, ყველაფერს რომ თავი დავანებოთ, უდიდესი სხვაობაა ფინანსური კუთხით. აკი დაწერა კიდეც "დეილი მეილმა" - გუნდი, რომლის ფეხბურთელების საერთო ღირებულება 410 მილიონი ფუნტია, 10-მილიონიან "ბრისტოლთან" დამარცხდაო...

მომხდართან დაკავშირებით კომენტარი გააკეთა მოურინიომ:

"დღეს დიდებული დღეა ფეხბურთისთვის. დაბალი დივიზიონის გუნდმა გაიმარჯვა. ისინი მთელი შეხვედრის განმავლობაში ღირსეულად თამაშობდნენ. არის ხოლმე ფეხბურთში მომენტები, როცა არ გიმართლებს.

მთელი მატჩის განმავლობაში არაერთი შანსი გვქონდა. ისინი მთელი შემართებით იბრძოდნენ. ეს ძალიან კარგია. ისე თამაშობდნენ, თითქოს მათთვის ეს იყო სიკვდილ-სიცოცხლის მატჩი.

პრინციპში, ალბათ, ეს ასეც იყო. ჩვენი ფეხბურთელებისთვის კი, თითქოს, ეს იყო რიგითი სამუშაო დღე. მათ ოფისში წასვლა დაეზარათ და როცა იქ მივიდნენ, უგულოდ შეასრულეს სამუშაო. დღეს ფეხბურთში იგებს ის გუნდი, რომელიც ბოლომდე იხარჯება. ჩვენ არ გვეყო ფიზიკური მომზადება და მენტალური სიძლიერე".

სიტყვა მივცეთ "ბრისტოლის" დამრიგებელ ლი ჯონსონსაც:

"რაც მო-ხდა, დაუჯერებელია. მე ვიტყოდი, რომ ყოველივე ეს ჰგავს ლამაზ, კეთილ ზღაპარს. ეს არის სასწაული! ეს არის ჩვენი ოცნების ასრულება! თავის დროზე, მამაჩემი "ბრისტოლის" მთავარი მწვრთნელი იყო.

ის ყოველთვის ამტკიცებდა, რომ გუნდის ისტორიაში საუკეთესო დამრიგებელია. არ ვიცი... ამიერიდან, შეიძლება, მას ეს ტიტული ჩამოვართვი კიდეც. ძალიან არ გვინდოდა, რომ ჩვენი ბევრი გულშემატკივარი გამოსულიყო მინდორზე, მაგრამ... ეს იყო იმხელა სიხარული, რომ სიტყვებით ვერ გადმოსცემ.

ასე რომ, ამ ხალხს უნდა გავუწიოთ ანგარიში და ვაპატიოთ. დარწმუნებული ვარ, ხვალ ჩვენი გულშემატკივრების დიდი ნაწილი ისევ იზეიმებს და არ წავა სამუშაოზე.

მე მათი მესმის და ბოლომდე ვიზიარებ ამ აღტკინებას. დღეს კიდევ ერთხელ დამტკიცდა, რომ ფეხბურთი სასწაული თამაშია.

აქ ყველაფერია შესაძლებელი. ჩვენი გუნდისთვის ეს დიდი სტიმულია და გვაძლევს იმის რწმენას, რომ თუ საქმეს ბოლომდე სერიოზულად, გულით მიუდგები, შეუძლებელი არაფერია. დღეს ჩვენ მსოფლიოში ყველაზე ბედნიერი ადამიანები გავხდით".

ყოველდღიური სპორტული გაზეთი "ლელო"
1321
მკითხველის კომენტარები / 1 /
zuka
0
funti ki ara, girvanqa.
მსგავსი ამბები
რუბრიკის სხვა სიახლეები
;