ინგლისის ნაკრების მწვრთნელი: ქართველებს ფანტასტიკური შერკინება ჰყავთ!

საქართველოს ნაკრები, "რაგბი ევროპის ჩემპიონატის" პირველ ტურში ბელგიასთან გამარჯვების (47:0) შემდეგ, ინგლისში გაემგზავრა.

ჩვენი ეროვნული გუნდი მსოფლიოს ერთ-ერთ საუკეთესო ნაკრებთან, ინგლისის ეროვნულ გუნდთან სამდღიან ერთობლივ წვრთნებს გამართავს.

ინიციატივა ინგლისელთა მთავარ მწვრთნელ ედი ჯონსს ეკუთვნის. ჯერ კიდევ ნოემბრის ტესტების დაწყებამდე მან თქვა, რომ სურდა მის მორკინალებს "მსოფლიოში საუკეთესო", საქართველოს ნაკრების შერკინებასთან ევარჯიშათ და მოგვიანებით ეს სიტყვები კიდევ არაერთხელ გაიმეორა.

აი, რა უამბო საქართველოს ნაკრების მთავარმა მწვრთნელმა მილტონ ჰეიგმა რაგბის კავშირის ოფიციალურ ვებ გვერდს:

"ნოემბრის ტესტების წინასაშეკრებო პერიოდში, ედი ჯონსის მიპატიჟებით მე და "ბორჯღალოსნების" სხვა მწვრთნელები პორტუგალიაში ჩავედით, სადაც ინგლისის ნაკრები ვარჯიშობდა და მოლაპარაკების პროცესიც მაშინ დაიწყო.

ედის სურვილი იყო, ინგლისის შერკინებას ჩვენთან, როგორც თავად ამბობს, მსოფლიოს საუკეთესო შერკინებასთან ევარჯიშა. ერთობლივი ვარჯიშები ფიჯისა და კანადის ნაკრებებთან გვქონდა.

მაშინ ეს მსოფლიოს თასისთვის მზადებაში დაგვეხმარა. თუმცა, ფაქტია, რომ ინგლისის ნაკრების დონის გუნდთან, ერთობლივი ვარჯიშის შანსი ჯერ არ გვქონია.

მსოფლიოს მეორე გუნდთან წვრთნები იქნება პროდუქტიული არა მხოლოდ ჩვენი მოთამაშეებისთვის, არამედ მწვრთნელებისთვისაც. ვნახავთ იქ ვინ, რას და როგორ აკეთებს.

დავინახავთ, რა შეიძლება გაკეთდეს უკეთ, ერთმანეთს გავუზიარებთ გამოცდილებას. პროცესში ჩართული იქნება სამედიცინო პერსონალი, დავაკვირდებით მათი მენეჯმენტის მუშაობას.

იმ გუნდების შერკინება, რომლებთანაც აქამდე გვივარჯიშია, ყოველთვის იღებდა რაღაც დადებითს. მათი შერკინების თამაშში ჩნდებოდა ახალი დეტალები. ჩვენ ვნახეთ, რომ ინგლისის შერკინებას უელსთან გაუჭირდა.

დარწმუნებული ვარ, მათი შერკინების მწვრთნელი მოუთმენლად ელის ამ ვარჯიშს. მას სურს საკუთარი თვალით იხილოს, რას აკეთებს საქართველოს ნაკრების შერკინება, როგორია შესვლის კუთხე, ტაქტიკა და ზუსტად ვიცი, რომ "ქართული გაკვეთილები" მათ აუცილებლად გამოადგებათ. ისევე, როგორც ჩვენ წაგვადგება მათთან ვარჯიში".

ცხადია, ეს მოვლენა უყურადღებოდ არც ინგლისის რაგბის კავშირის ოფიციალურ ვებგვერდს ენგლანდრუგბყ.ცომ-ს დაუტოვებია.

ედი ჯონსი, ინგლისის ნაკრების მთავარი მწვრთნელი:

"საქართველოს ნაკრების ორ მწვრთნელს - მილტონ ჰეიგს და რიჩარდ გრემს - კარგად ვიცნობთ. ჩვენი სურვილია, რომ მსოფლიოში საუკეთესო შერკინება გვყავდეს, ქართველებს კი ყველაზე მძლავრი, ღონიერი და ფანტასტიკური შერკინება ჰყავს.

მათთან ერთად ვარჯიში იდეალური იქნება არა მხოლოდ ექვსი ერის მოსაგებად, არამედ მსოფლიოს თასისთვის მოსამზადებლად. ჩვენ შესანიშნავ პრაქტიკას მივიღებთ".

დილან ჰართლი, ინგლისის ნაკრების კაპიტანი:

"მუდამ ვცდილობთ ჩვენი შერკინების გაუმჯობესებას და ვფიქრობ, ერთობლივი ვარჯიშით ბევრ სიახლეს ავითვისებთ. ეს იქნება ნაყოფიერი ვარჯიში, რომელიც ამოცანების უკეთ შესრულებაში დაგვეხმარება. მოუთმენლად ველით ქართველებთან შეხვედრას".

ინგლისიდან "ბორჯღალოსნები" გერმანიაში გაემგზავრებიან, სადაც ფრანკფურტთან ახლოს, პატარა ქალაქ ოფენბახში გერმანიის ნაკრებს დაუპირისპირდებიან. მატჩი 17 თებერვალს გაიმართება და თბილისის დროით 17 საათსა და 30 წუთზე დაიწყება.

საქართველოს ნაკრები

პირველი ხაზი: მიხეილ ნარიაშვილი (მონპელიე), ზურაბ ჟვანია (სტად ფრანსე), ანტონ ფეიქრიშვილი (კარდიფ ბლუზი), ლევან ჩილაჩავა (ტულონი), გიორგი მელიქიძე (სტად ფრანსე), შალვა მამუკაშვილი (ლოკომოტივი), ბადრი ალხაზაშვილი (ტულონი);

მეორე ხაზი: კონსტანტინე მიქაუტაძე (მონპელიე), გიორგი ნემსაძე (ბრისტოლი), ნოდარ ჭეიშვილი (შამბერი);

მესამე ხაზი: Lვიქტორ კოლელიშვილი (კლერმონი), გიორგი თხილაიშვილი (ბათუმი), ლაშა ლომიძე (ლონდონ აირიში), ოთარ გიორგაძე (კლერმონი), გიორგი ცუცქირიძე (ორიაკი), მიხეილ გაჩეჩილაძე (ენისეი);

#9: ვასილ ლობჟანიძე (ბრივი), გელა აფრასიძე (მონპელიე);
#10: ლაშა ხმალაძე (ბათუმი), რეზო ჯინჭველაშვილი (არმაზი) ლაშა მალაღურაძე (კრასნი იარი);
#12-13: მერაბ შარიქაძე (ორიაკი), დავით კაჭარავა (ენისეი), გიორგი კვესელაძე (არმაზი);
#11-14: ალექსანდრე თოდუა (ლელო), ანზორ სიჭინავა (აკადემია), გიორგი ფრუიძე (კრასნი იარი);
#15: ბექა წიკლაური (ლოკომოტივი), მერაბ კვირიკაშვილი (ლელო).

ყოველდღიური სპორტული გაზეთი "ლელო"
3048
მკითხველის კომენტარები / 0 /
მსგავსი ამბები
რუბრიკის სხვა სიახლეები