ინგლისი. ასოციაციის თასი. ...და ისევ მოურინიო კონტეს წინააღმდეგ

"უემბლიზე" მოგებული მატჩით "მანჩესტერ იუნაიტედი" მე-20-დ გავიდა ასოციაციის თასის ფინალში, რითიც "არსენალის" რეკორდი გაიმეორა. სამაგიეროდ, "წითელ ეშმაკებს" ბადალი არ ჰყავთ შინაური ფინალების (ლიგის თასის ჩათვლით) საერთო რაოდენობით - 29.

უშუალოდ ჟოზე მოურინიოსთვის კი ეს მე-6 ინგლისური ფინალია (2 - ასოციაციის თასის, 4 - ლიგის თასი). საინტერესოა, რომ პორტუგალიელმა ყველა(!) წინა 5 ფინალი მოიგო.

"ტოტენჰემი" კი თასის ამ სტადიაზე ზედიზედ მერვედ დამარცხდა. "მამლები" ასოციაციის თასის ფინალში 1991 წლის მერე არ ყოფილან. ეს კი იმას ნიშნავს, რომ მაურისიო პოჩეტინო, ვინც მართლაც სიმპათიური და კონკურენტუნარიანი გუნდი შექმნა, მეოთხე სეზონშიც უტიტულოდ რჩება.

კიდევ ერთი საგულისხმო მომენტი - პოჩეტინოს გუნდს მიმდინარე პრემიერლიგაში არ წაუგია ერთი მატჩიც კი, რომელშიც თავად იყო დაწინაურებული. სამაგიეროდ, სწორედ ამ ტიპის შეხვედრებში დამარცხდა ლიგის თასზე "ვესტ ჰემთან" (2:3) და ჩემპიონთა ლიგაში "იუვენტუსთან" (1:2).

გუშინ მეორე ნახევარფინალში "ჩელსიმ" 2:0 მოუგო "საუთჰემპტონს" და მე-13-დ გავიდა ფინალში. შესანიშნავი იყო ოლივიე ჟირუს გოლი, რომელიც ედენ აზარის პასს მოჰყვა, ხოლო იმავე ჟირუს შემცვლელმა ალვარო მორატამ მოედანზე შესვლიდან ორ წუთში შეაგდო (მე-9 თავური გოლი ამ სეზონში ყველა ტურნირის გათვალისწინებით, რაც უმაღლესი შედეგია პრემიერლიგის ფეხბურთლებს შორის) და ნათელი გახდა, რომ "ჩელსი" გამარჯვებას ხელიდან აღარ გაუშვებდა.

ახლა "არისტოკრატები" "მანჩესტერ იუნაიტედს" 19 მაისს, "უემბლიზე" დაეჭიდებიან. ბრძოლა საინტერესო იქნება მოურინიოსა და ანტონიო კონტეს შორის დაპირისპირების პრიზმაშიც. თუმცა ფინალი ფინალია და თამაში ყველა ვარიანტში საინტერესო იქნება.

მანჩესტერ იუნ-ტოტენჰემი 2:1
გოლები: 0:1 დელე ალი (11), 1:1 ალექსის სანჩესი (24), 2:1 ერერა (62)

ჩელსი-საუთჰემპტონი 2:0
გოლები: 1:0 ჟირუ (46), 2:0 მორატა (82)

ყოველდღიური სპორტული გაზეთი "ლელო"
739
მკითხველის კომენტარები / 0 /
მსგავსი ამბები
რუბრიკის სხვა სიახლეები
;