ინგლისის ნაკრებმა ერთა ლიგის მატჩში ესპანეთს უმასპინძლა 1:2 დამარცხდა. სტუმარ გუნდში მთავარი მწვრთნელის პოსტზე წარმატებული დებიუტი გამოუვიდა ლუის ენრიკეს. "ფურია როხამ" პრაგმატული ფეხბურთი ითამაშა განსაკუთრებული სანახაობის გარეშე.

უფრო უკეთ კომბინირებდნენ ინგლისელები, რომლებიც შესანიშნავი კონტრშეტევის შედეგად დაწინაურდნენ. ეს იყო მანჩესტერული გოლი ლუკ შოუს დიდებული პასითა და მარკუს რაფშორდის ზუსტი დარტყმით, ასევე მანჩესტერელი დავიდ დე ხეას კარში.

ესპანელებმა მალევე გაათანაბრეს (საულ ნიგესი) ანგარიში არანაკლებ ეფექტური კომბინაციით, ხოლო პირველ ტაიმის ბოლოს როდრიგომ ახლო მანძილიდან გაიტანა და წინ გაიყვანა "ფურია როხა".

მეორე ტაიმში ინგლისელებს ჰქონდათ მომენტები, ბოლო წუთზე გაიტანეს კიდეც (დენი უელბეკი), მაგრამ ჰოლანდიელმა არბიტრმა მეკარეზე უხეშობის გამო გოლი გააუქმა და ანგარიში უცვლელი დარჩა. ინგლისის ნაკრების მწვრთნელმა გარეთ საუთგეიტმა დაიჩივლა - გოლი ტყუილად გაგვიუქმეს, დენი (უელბეკი) თავისთვის იდგა, დე ხეამაც კი, უბრალოდ, ბურთი მოიგერია, არანაირი ჯარიმა არ ყოფილაო...

მეორე ტაიმის დასაწყისში, დანიელ კარვახალთან შეჯახების შემდეგ, თავის მძიმე ტრავმა მიიღო ლუკ შოუმ, რის გამოც თამაში მთელი 10 წუთით შეჩერდა.

გარკვეული პანიკის შემდეგ ინგლისის ნაკრებისა და "მანჩესტერ იუნაიტედის" 23 წლის მარცხენა მცველი მხოლოდ გასახდელში მოვიდა გონს.

გუნდებმა ასეთი შემადგენლობებით ითამაშეს:

ინგლისი (3-5-2): პიკფორდი - მაგუაირი, სტოუნზი, გომესი - ტრიპიერი, ჰენდერსონი (64. დაიერი), ალი, ლინგარდი, შოუ (53. როუზი) - რაშფორდი (90+4. უელბეკი), კეინი.

ესპანეთი (4-3-3): დე ხეა - კარვახალი, ნაჩო, სერხიო რამოსი, ალონსო (87. ინიგო მარტინესი) - ალკანტარა (80. სერხი რობერტო), ბუსკეტსი, საულ ნიგესი - როდრიგო, ისკო, ასპასი (68. ასენსიო).