ინგლისი.პრემიერლიგა. XXI-XXII ტურები. რომ ინტრიგა შეუნარჩუნოს [VIDEO]

"ლივერპულმა" ძლივს მოუგო (მე-5 გამარჯვება ბოლო 6 საგარეო მატჩში) "ბარნლის", თუმცა "ტარფ მურზე" თამაში ყველას უჭირს და ნურც "წითლებს" დავძრახავთ - ცხრილში მხოლოდ ქულები ითვლება,

ეს ქულები კი იურგენ კლოპის გუნდს დამსახურებულად ერგო, იმის გათვალისწინებით, რომ ძირითად შემადგენლობაში არ ყოფილან რობერტო ფირმინო, მოჰამედ სალაჰი, რომელიც ტრავმირებული გახლდათ, ხოლო ფილიპე კოუტინიოს ვერსად მივაკვლიეთ.

ეს კი იმის ნიშანი უნდა იყოს, რომ ბრაზილიელი შემტევი "ბარსელონაში" გადადის და კლოპისთვის ის უკვე წარსულია.

"თამაშს ფანტასტიკური ფინიში ჰქონდა. ეს სტადიონი ერთ-ერთი ყველაზე რთული ადგილია სათამაშოდ ნებისმიერ პერიოდში. ცხადია, ეს არ იყო ჩვენი საუკეთესო მატჩი,

მაგრამ სამაგიეროდ, იყო საოცარი მობილიზება და მონდომება ჩემი ფეხბურთელების მხრიდან, რაც აუცილებლად დასაფასებელია და სრულიად მაკმაყოფილებს.

გოლი ძალიან ცუდ დროს გავუშვით, მაგრამ მოვახერხეთ მოკლე დროში თამაშის შეცვლა და გამარჯვებაც", - თქვა კლოპმა ნამატჩევს.

"მანჩესტერ იუნაიტედმა" დამაჯერებლად სძლია სემ ელერდაისის უკბილო "ევერტონს". რომელუ ლუკაკუსა და ზლატან იბრაჰიმოვიჩის (ორივე ტრავმირებული იყო) არყოფნაში გამოკვეთილი ფორვარდის როლში ჟოზე მოურინიომ ანტონიო მარსიალი დააყენა და ამანაც ნდობა გოლით გაამართლა.

ეს კი ის გოლი იყო, საბოლოოდ რომ "მოკლა" "გუდისონ პარკის" მკვიდრი. გარკვეული უკეთესობის შემდეგ "ევერტონს" კვლავ ვარდნა დაეწყო - ბოლო 4 მატჩში 2 წააგო და ორიც ფრედ დაასრულა. რა გასაკვირია და, ყველა როდი უძლებს გიჟურ გრაფიკს...

ზედიზედ მეორე გასვლითი მატჩი მოიგო "ნიუკასლმა" და რაფა ბენიტესის პოზიციები საგრძნობლად გაამყარა. მარკ ჰიუზის საქმე კი პირიქით - ვერ არის კარგად.

როგორც ამბობენ, "სტოკის" ხელმძღვანელობა უელსელი სპეციალისტის მომავალზე ბჭობს და უახლოეს დღეებში, შესაძლოა, რადიკალური გადაწყვეტილებაც მიიღოს. ჰიუზის გუნდი ბოლო 10 მატჩში 7-ჯერ დამარცხდა და გასავარდნ ზონას მიუახლოვდა.

"ლესტერი"-"ჰადერსფილდის" (3:0) გმირად იქცა რიად მაჰრეზი, ვინც გოლიც შეაგდო და საგოლე პასიც მიითვალა. მატჩის შემდეგ "მელიების" მწვრთნელმა კლოდ პიუელმა თქვა,

რომ ძალიან უნდა მაჰრეზის შენარჩუნება და აინტერესებს, რამდენად აქვს ამის სურვილი თავად ფეხბურთელს და ამას აუცილებლად ჰკითხავს.

ცხადია, ფორმაში შესულ ალჟირელ შემტევზე იანვრის სატრანსფერო პერიოდში დიდი მოთხოვნა იქნება...

ფაქტები

* რაგნარ კლავანი ("ლივერპული") გახდა პირველი ესტონელი ფეხბურთელი, ვინც პრემიერლიგაში გოლი გაიტანა. საერთოდ, პრემიერლიგაში გოლი (მათ შორის - ავტოგოლი) უკვე 97 ეროვნების წარმომადგენელს აქვს გატანილი.

* "ლივერპულმა" დაუმარცხებელი სერია 13 მატჩამდე გაზარდა. იურგენ კლოპის მწვრთნელობის პერიოდში ეს "წითლების" უგრძესი სერიაა, ხოლო საუკეთესო - 2014 წლის შემდეგ, როცა 16-მატჩიანმა წაუგებელმა ციკლმა "ლივერპული" ვიცეჩემპიონობამდე მიიყვანა.

* "ჰადერსფილდმა" მიმდინარე პრემიერლიგის მე-8 საგარეო მატჩში (სულ - 11) ვერ შეძლო გოლის გატანა. ამით, ტურნირის დებიუტანტი "ბრაიტონისა" და

"კრისტალ პალასის" (ამავე სეზონის) "მიღწევებს" გაუტოლდა.

* "ლესტერი" არ დამარცხებულა პრემიერლიგის ბოლო 14 მატჩში ახალაღზევებული გუნდების წინააღმდეგ. ბოლო მარცხი (0:5) "მელიებმა" 2001 წლის აგვისტოში, "ბოლტონისგან" განიცადეს.

* 22 მატჩის შემდეგ "სტოკს" 20 ქულა აქვს. ეს არის ამ გუნდის ყველაზე ცუდი მაჩვენებელი პრემიერლიგის ამ ეტაპებისთვის 1984/85 წლების სეზონის (11 ქულა 22 მატჩში) შემდეგ.

ყოველდღიური სპორტული გაზეთი "ლელო"
319
მკითხველის კომენტარები / 0 /
მსგავსი ამბები
რუბრიკის სხვა სიახლეები