The Guardian: დავითაშვილი და კვარაცხელია მსოფლიო ფეხბურთის ტალანტებში [VIDEO]

ფეხბურთელთა მომავალი თაობის (Next Generation) სიაში ორი ქართველი ტალანტი მოხვდა: ინგლისურმა გამოცემა "გარდიანმა" 2001 წელს დაბადებულ საუკეთესო 60 ტალანტს შორის ზურაბ დავითაშვილი ("ლოკომოტივი") და ხვიჩა კვარაცხელია ("რუსთავი") დაასახელა.
საინტერესოა, რომ ამ სიას "გარდიანი" 2014 წლიდან ადგენს. ამჯერად ბრიტანელთა ობიექტში მოხვდნენ ლილიან ტიურამის ვაჟი ჰეფრენ ტიურამ-ულიენი, ბრაზილიელი როდრიგო, "ხორვატ ნეიმარად" წოდებული ანტონიო მარინი, "ლაიპციგის" დანიელი ნახევარმცველი მატს ბიდსტრუპი, "მანჩესტერ სიტის" თავდამსხმელი მეისონ გრინვუდი...
სულ სიაში 5 ფრანგია, 4 - ესპანელი, 3-3 - ბრაზილიელი, იტალიელი და გერმანელი. საქართველოს გარდა, 2-2 მოთამაშეა ინგლისელი, არგენტინელი, ჰოლანდიელი, ურუგვაელი, ხორვატი და თურქი.
ბრიტანულმა გამოცემამ მომავალი თაობის ტალანტებში ქართველი ფეხბურთელები პირველად დაასახელა. "გარდიანმა" ორივე მათგანი ხომ დაახასიათა, იქვე ვიდეოკოლაჟიც დაურთო.

ზურაბ (ზუკა) დავითაშვილი
დაიბადა 2001 წლის 15 თებერვალს
კლუბი: ლოკომოტივი თბ
პოზიცია: შემტევი ნახევარმცველი



ერთ შეხვედრაში 4 გოლის გატანა შეუმჩნეველი არ დარჩება, თუ ამას შენი ქვეყნის მიღმა, საერთაშორისო მატჩებში ახერხებ, მით უმეტეს, თუ ნახევარმცველი ხარ. დავითაშვილმა სწორედ ეს შეძლო 2018 წელს მაკედონიაში, სადაც 17-წლამდელთა ევროპის ჩემპიონატის ელიტრაუნდის მატჩები იმართებოდა. შესარჩევ ტურნირში ჩატარებულ 6 მატჩში გოლების რაოდენობა 7-მდე გაზარდა.
ის სრულყოფილი შემტევი ნახევარმცველია, რომელიც ხშირად 10-ის პოზიციაზე თამაშობს. ტექნიკურად ძალიან კარგია, ყოველთვის მზადაა მცველებზე თამამად წავიდეს, უყვარს შორიდან დარტყმა და მოედნის შესანიშნავი ხედვა გამოარჩევს. ეს საშუალებას აძლევს, რეიდები განახორციელოს და ჭკვიანური პასები აკეთოს.
მიუხედავად იმისა, რომ 17 წლისაა და გუნდის ყველაზე ახალგაზრდა ფეხბურთელია, რეგულარულად მონაწილეობს "ლოკომოტივის" თამაშებში და სავსებით თავდაჯერებული გამოიყურება. დავითაშვილით რუსეთის დიდი კლუბები დაინტერესდნენ, მაგრამ მას სურს, ამ ეტაპზე კარიერა თავის ამჟამინდელი კლუბში გააგრძელოს.

ხვიჩა კვარაცხელია
დაიბადა 2001 წლის 12 თებერვალს
კლუბი: რუსთავი
პოზიცია: ფლანგის შემტევი



საქართველო წარსულში დიდი თავდამსხმელებით იყო ცნობილი. თუმცა დიდი ხანია, შეტევაში ამხელა მასშტაბის მქონე მოთამაშეების ნაკლებობაა. კვარაცხელია კი იმედოვნებს, რომ მრავალი წლის განმავლობაში გულშემატკივრების საყვარელი მოთამაშე იქნება. ის ტექნიკურად გამორჩეულია, როგორც ბევრი ახალგაზრდა ქართველი, მაგრამ მას სხვა თვისებებიც გამოარჩევს. თბილისის "დინამოს" საფეხბურთო აკადემიის აღზრდილი ფიზიკურადაც ძლიერია, აქვს კარგი სისწრაფე და აჩქარება, ერთი-ერთზე თამაშისას ყოველთვის არაპროგნოზირებადია.
ასევე მნიშვნელოვანია, რომ კვარაცხელია ორივე ფეხს მშვენივრად იყენებს. ის წარსულში საქართველოს რომელიმე ცნობილ ფეხბურთელთან არ შეუდარებიათ, მაგრამ სხვა ქვეყნებისკენ თუ გავიხედავთ, შედარებისთვის უცებ სამი მოთამაშე გაგვახსენდება - იულიან დრაქსლერი, იულიან ბრანდტი და ლეროი სანე. კვარაცხელია, რომელმაც ქართულ უმაღლეს ლიგაში სადებიუტო მატჩი 16 წლისამ ჩაატარა, სამი გოლი გაიტანა და ერთი საგოლე გადაცემა შეასრულა.

1385
მკითხველის კომენტარები / 0 /
მსგავსი ამბები
რუბრიკის სხვა სიახლეები