ინდოეთში ლადო ხინჩეგაშვილიც დაუმარცხებელია

გენო პეტრიაშვილის (125) დარად, ინდურ პრო ლიგაში მოჭიდავე მეორე ქართველი, ოლიმპიური და მსოფლიოს ჩემპიონი, ევროპის სამგზის გამარჯვებული ვლადიმერ ხინჩეგაშვილიც (57) დაუმარცხებელია, როგორც მისი კლუბი - "ჰარიანა ჰამერსი". მეოთხე ტურში მათ "მუმბაი მაჰარატხი" 4:3 დაამარცხეს.

რაღა თქმა უნდა, მოიგო ხინჩეგაშვილმაც, თუმცა უძნელეს ბრძოლაში: მონღოლ ბეკბაიარ ეედენებატიანთან პირველი პერიოდი 0:4 წააგო, თუმცა მსგავსი ჩამორჩენა მას ევროპირველობის ფინალში ამოუქაჩავს და არც მონღოლთან გასჭირვებია: მეორეში 8:0 აჯობა.

ხინჩეგაშვილი დაუმარცხებელია იმის მიუხედავად, რომ ისევ 57 კილოგრამში მოუწია დადგომა. არადა, უკვე 65-ში გამოდის. მის ანგარიშზე სამი მოგებაა, რადგან ერთი შეხვედრით ნაკლები ჩაატარა, ვინაიდან ერთ-ერთ პაექრობაში მეტოქის მწვრთნელმა დაბლოკა. ჩვენებურები პრო ლიგის ტოპ ხუთეულშიც შედიან.

ოთხი ტურის შემდეგ სატურნირო ცხრილს კვლავაც დაუმარცხებელი "უპ დანგალი" ლიდერობს 8 ქულით. 6-6 ქულა აქვთ ჩვენებურთა კლუბებს - "პენჯაბსა" და "ჰარიანას", ხოლო სომხეთის სახელით მოჭიდავე ლევან ბერიანიძისა (125) და გიორგი კეტოევის (97) "ვეერ მარათასი" 4 ქულით მეოთხე ადგილზეა. მათ უკვე დაასრულეს წინასწარი ეტაპის პაექრობები და პლეი ოფში გასვლის საკმაოდ კარგ შანსს ინარჩუნებენ.

ამასობაში პრო ლიგის შესარჩევი ეტაპიც დასასრულს მიუახლოვდა. დღეს, 22 დეკემბერს ბოლო ტურია და გავიგებთ პლეი ოფში გასულ კვარტეტს. დღეს "პენჯაბი" "მუმბაი მაჰარატხის" ხვდება, ხვალ კი "ჰარიანა ჰამერსი" ჩაატარებს მეტად მნიშვნელოვან შეხვედრას ლიდერთან: თუ მოუგებს, მასაც და პენჯაბელებსაც მიეცემათ "უპ დანგალთან" დაწევის შანსი.

თუმცა ამ სამეულმა უკვე გაინაღდა პლეი ოფი და დაკავებულ ადგილს იქ შედარებით სუსტ მეტოქეზე გასვლის თვალსაზრისით თუ ექნება მნიშვნელობა. "ვეერ მარათასის ბედი ახლა "პენჯაბი"-მუმბაის" პაექრობაზეა დამოკიდებული, რადგან მათი დაწევა მუმბაელებს შეუძლიათ.

1495
მკითხველის კომენტარები / 0 /
მსგავსი ამბები
რუბრიკის სხვა სიახლეები
;