არჩილ არველაძე: ვაისის ხელმძღვანელობით ნაკრები 'ქართულ' ფეხბურთს თამაშობს!

"არის მოლოდინი, რომ ანდორას კარი გოლებით უნდა ამოვავსოთ... ასეთმა  განწყობამ, შეიძლება, ვერ იმოქმედოს კარგად"...

საქართველოს ეროვნულ ნაკრებზე სასაუბროდ "ლელო" არჩილ არველაძეს დაუკავშირდა. არჩილი შესანიშნავი რესპონდენტია, დახვეწილი საფეხბურთო გემოვნებითა და დაკვირვებული თვალით. ამიტომაც საინტერესო უნდა იყოს მისი მოსაზრებები საქართველოს ნაკრებზე...

- თავდაპირველად, ყაზახეთსა და ლატვიასთან ჩავლილი მატჩები შევაფასოთ...

- უპირველეს ყოვლისა, ჩვენ ვმონაწილეობთ ტურნირში, რომლის მოგებაც გვინდა და ამ თამაშებში ჩვენთვის პრიორიტეტული არის შედეგი. ორ თამაშში გვაქვს 6 ქულა.

ეს მაქსიმუმია და ძალიან ბედნიერები ვართ ამის გამო. ისიც ფაქტია, რომ ეს მხოლოდ დასაწყისია და წინ კიდევ დიდი ბრძოლები გველის. უფრო კონკრეტულად რომ ვთქვათ, ძალიან მნიშვნელოვანი თამაში მოვიგეთ ყაზახეთში. ყაზახეთის ნაკრები რომ ჩვენი მთავარი კონკურენტია ჯგუფში, ამაზე ყველა ვთანხმდებით.

ამიტომაც უმნიშვნელოვანესი იყო გასვლაზე მოგება... ქვეცნობიერად ყველა შედარებით იოლ გამარჯვებას ველოდით ლატვიასთან. მათ შორის მეც. ეს ალბათ იმიტომ, რომ ბალტიისპირელებთან ბოლო ამხანაგური შეხვედრა ძალიან იოლად მოვიგეთ. იმასთან შედარებით, ლატვიამ ერთობ ორგანიზებულად ითამაშა, დიდი ყურადღება მიაქცია დაცვას. ზოგადად, ძნელია ისეთი მეტოქის გატეხა, რომელიც მთელი გუნდით დგას დაცვაში. საბოლოო ჯამში მოვიგეთ. სადღაც და ოდესღაც იღბალი ჩვენკენაც ხომ უნდა ყოფილიყო?!

- არ დასრულებულა ჯგუფური ეტაპი, თუმცა ჩვენი მდგომარეობა ისეთია, საკუთარ თავს თუ არ ვავნეთ, პირველობაში ვერავინ ვერ უნდა შეგვეცილოს...

- ასეა და მჯერა, ჯგუფში მშვიდად მივიყვანთ საქმეს ბოლომდე. შინ ყველა თამაში რომ მოვიგოთ, მაინც გვეყოფა პირველობისთვის, მაგრამ რად უნდა ლაპარაკი იმას, რომ ანდორას ორივე შეხვედრა უნდა მოვუგოთ - შინაც და გარეთაც.

- ...და დადგება გადამწყვეტი მატჩების დრო ევროპის ჩემპიონატზე მოსახვედრად...

- რა თქმა უნდა, რთული იქნება, მაგრამ, ჩემი აზრით, საქართველოს ნაკრები თავისი შემადგენლობით ამ ტურნირის ფავორიტია. საინტერესოა, რომ რეგლამენტის თანახმად, როგორც მე ვიცი, ჯგუფის ის გამარჯვებული, რომელიც დააგროვებს ყველაზე მეტ ქულას, ყველაზე ნაკლებქულიან პირველადგილოსანს შეხვდება. ესეც გასათვალისწინებელია.

მეტოქეებს ვერ ავირჩევთ, უბრალოდ რაღაც ვარაუდების გამოთქმა შეიძლება. მაგალითად, პირადად მე, ნაკლებად მინდა შეხვედრა სომხეთთან ან აზერბაიჯანთან. მაინც საპლეიოფო ციებ-ცხელებაა და შეიძლება დამატებითი ტვირთი იყოს. შედარებით ძლიერი მგონია ბელარუსი.

შემადგენლობის მიხედვით კარგი ნაკრები ჰყავს მაკედონიასაც. იმედი მაქვს, ამ დროისთვის საქართველოს ნაკრების ყველა წამყვანი ფეხბურთელი ჯანმრთელად იქნება. ძალიან დიდ დანაკლისად მიმაჩნია გიორგი ქვილითაიას ტრავმა.

ჩვენ უნდა გვახსოვდეს, რომ ასეთი შანსი კარგა ხანს შეიძლება აღარ გვქონდეს. ჩვენ ხელოვნურად ვერ შევაჩერებთ პროგრესს. დიდი ალბათობით მოვიგებთ ჯგუფს და შემდეგ შესარჩევში ვიქნებით C დივიზიონში. იქიდან ევროპის ჩემპიონატზე გასვლა ძალიან რთული იქნება.

- ყველაზე მეტად რა მოგეწონათ ამ თამაშებში საქართველოს ნაკრებში?

- დავიწყებ იმით, რომ მოსაგები თამაშები მოვიგეთ. როცა საქართველოს ნაკრებზე ვლაპარაკობთ, ეს არის ძალიან მნიშვნელოვანი მომენტი. გაიხსენეთ, ჩვენი თაობის ნაკრებს უჭირდა ამის გაკეთება. ორი გადამწყვეტი თამაში გვქონდა რუმინეთთან და დანიასთან - ერთიც ვერ მოვიგეთ.

ყაზახეთში გავიტანეთ ორი გოლი და შევძელით უპირატესობის ბოლომდე შენარჩუნება. ლატვიასთან კი თამაშის უკანასკნელ წუთამდე იგრძნობოდა, რომ გუნდს ძალიან უნდოდა მოგება.

- ფეხბურთში გემოვნებაზე არ დავობენ. როგორც რიგით გულშემატკივარს, ისე უნდა გკითხოთ: რამდენად ჯდება თქვენს გემოვნებაში ვლადიმირ ვაისი, როგორც მწვრთნელი?

- თუ იშვიათ გამონაკლისს არ ჩავთვლით, ვლადიმირ ვაისის ხელმძღვანელობით საქართველოს ნაკრები ისეთ ფეხბურთს თამაშობს, როგორსაც ქართველები ვთამაშობდით. ეს გეზი საქართველოს ნაკრებში კახა ცხადაძემ შემოიტანა და ის გულისხმობს "პირველ ნომრად" თამაშს. იმას, რომ არ უნდა იყო მხოლოდ ჩასაფრებული და არ უნდა დაელოდო მოწინააღმდეგის შეცდომას.

ცხადაძის შემდეგ ნაკრებში არ იყო რევოლუციური ცვლილებების მოწყობის დრო და ვაისმა ეს არ გააკეთა, რასაც მას დიდ პლუსად ვუთვლი. ცხადაძის შემდეგ შემადგენლობაში დიდი ცვლილებები არ მომხდარა.

ვაისის სასარგებლოდ მეტყველებს ის, რომ მან დიდი ნდობა გამოუცხადა გიორგი ჩაკვეტაძეს. რა როლიც შეასრულა ჩაკვეტაძემ საქართველოს ნაკრების წარმატებაში, ყველამ ერთად ვნახეთ. როცა საქმე ახალგაზრდა ფეხბურთელის ნაკრების ძირითადში დაყენებას ეხება, ამით მწვრთნელი რისკავს. სხვა რომ დაეყენებინა ვაისს ჩაკვეტაძის მაგივრად, ვერავინ ვერაფერს ეტყოდა.

მოკლედ, ვაისი ენდო ჩაკვეტაძეს და გიორგიმაც გაამართლა. ეს ფაქტია. ის ერთ-ერთი საუკეთესო იყო. ჩემი აზრით, თავისი ასაკის კვალობაზე მან უკვე ომახიანი სიტყვა თქვა. პირდაპირ ვიტყვი - გიორგი ჩაკვეტაძეს შეუძლია დიდი ფეხბურთის თამაში და ის, რომ ყველა ერთად გაგვახაროს. ნუ დაგვავიწყდება, რომ გიორგი ბელგიაში თამაშობს. ეს ის ქვეყანაა, რომლის ჩემპიონატსაც უამრავი სელექციონერი ადევნებს თვალს. მთავარია, კარგად ითამაშო და აუცილებლად მოხვდები ძლიერ კლუბში.

- და ბოლოს, ანდორასთან მომავალ საშინაო მატჩზე გკითხავთ. რა თქმა უნდა, მეტოქეზე მაღლა ვდგავართ ყველა მაჩვენებლით, მაგრამ ისიც ფაქტია, რომ ბოლო დროს ანდორელები წაგებას გადაეჩვივნენ...

- რა თქმა უნდა, საქართველოს ნაკრებმა ეს შეხვედრა აუცილებლად უნდა მოიგოს. ამ თამაშზე რომ ვფიქრობ, გულში შიში მხოლოდ ერთადერთი რამის გამო მაქვს - ანდორაა და მოლოდინი არის, რომ უნდა გადავუაროთ, გოლებით ამოვავსოთ მისი კარი... ასეთ დროს ამგვარმა განწყობამ, შეიძლება, ვერ იმოქმედოს კარგად. ამიტომ ანდორას, როგორც ყველა მეტოქეს, დაფასება სჭირდება.

ყოველდღიური სპორტული გაზეთი "ლელო"
2925
მკითხველის კომენტარები / 0 /
მსგავსი ამბები
რუბრიკის სხვა სიახლეები