ინტერვიუ ბათუმის 'დინამოს' ახალწვეულ რომან ჭანტურიასთან: იყო უიღბლობაც და ჩემი შეცდომებიც

რომან ჭანტურია ბათუმის „დინამოს“ ახალწვეულთაგან ერთ-ერთია. აჭარული კლუბი 22 წლის თავდამსხმელის იჯარაზე იტალიურ „ემპოლის“ შეუთანხმდა, რის თანახმადაც, ჭანტურია ბათუმელთა რიგებში 2020 წლის ბოლომდე ითამაშებს.

ჭანტურია იტალიაში 16 წლისა წავიდა და „ემპოლის“ საფეხბურთო აკადემიაში იზრდებოდა, იყო გუნდის დუბლშემადგენლობის ბომბარდირი და მთავარ გუნდშიც დააწინაურეს. მაგრამ ტრავმების გამო იქ ფეხი ვერ მოიკიდა და იჯარით წავიდა პორტუგალიურ „ოლიანენსეში“, სერია C-ს „პრატოში“, 2018 წელს თბილისის „ლოკომოტივში“ ჩაირიცხა, საიდანაც მალტურ „სინგლეა ატლეტიკში“ გადავიდა.

„ლელო“ რომან ჭანტურიას დაუკავშირდა და ინტერვიუ ჩაწერა...

- რატომ საქართველო და არა - იტალია ან ევროპა?

- ეს ბევრმა ფაქტორმა გადამაწყვეტინა. გადამწყვეტი იყო ბათუმის „დინამოში“ არსებული კარგი გარემო, ასევე ძალიან კარგი პირობები, ყველაზე მნიშვნელოვანი კი გია გეგუჩაძის ფაქტორი გახლდათ. მე მისი ხელმძღვანელობით საქართველოს ახალგაზრდულ ნაკრებში 7 მატჩი ვითამაშე, 5 გოლი გავიტანე და, ასე ვთქვათ, მის ხელში გამოვცოცხლდი.

- იტალიაში კარიერა რატომ არ აგეწყოთ?

- ეს ვრცელი თემაა. ჯამპაოლის დროს 24 თამაში სათადარიგოებში ვიჯექი, ბოლო 5 მატჩი კი უნდა მეთამაშა - ამაზე შეთანხმებული ვიყავით. მაგრამ მუხლის ოპერაციამ საშუალება წამართვა, რომ ამ შანსით მესარგებლა. ყველა პრობლემა აქედან დაიწყო. შემდეგ პორტუგალიაში წავედი, რასაც პირად შეცდომად მივიჩნევ, რადგან შემოთავაზებები სერია B-ს გუნდებიდანაც მქონდა და, რატომღაც, უარი ვთქვი. ამის შემდეგ ყველაფერი ცუდად წავიდა, იყო უიღბლობაც და ჩემი შეცდომებიც.

- თქვენი აზრით, საქართველოში შესაძლებელია ისეთ დონეზე მომზადება, რომ ისევ ევროპაში დაბრუნდე?

- რა თქმა უნდა, ამაში ბათუმის მაგალითზე დავრწმუნდი. ისეთი პირობებია, რაც ბევრ ევროპულ კლუბში არ მინახავს. კარგი გარემოა შექმნილი, ფეხბურთელმა შესაძლებლობების გამოვლენა 100 პროცენტით რომ შეძლოს. მგონია, შეუძლებელი არაფერია, მთავარია, ვიშრომოთ და საკუთარი შესაძლებლობების გვჯეროდეს. შრომით ყველაფერია შესაძლებელი.

- ყაზანის „რუბინთან“ დაკავშირებული ისტორია გამოცანად რჩება. თქვენი ტრანსფერი ხომ რუსებს ეკუთვნოდათ?

- მაშინ ამ ისტორიაზე იტალიურმა მედიამაც დაწერა. სამწუხაროდ, ასეა. ყველაფერი უკვე გადაწყვეტილი იყო, მაგრამ, ჩემდა სამწუხაროდ, ეს გარიგება მაინც ჩაიშალა.

- კონკრეტულად რა მოხდა?

- ტრანსფერი 99 პროცენტით გადაწყვეტილი იყო, მაგრამ ეს ჩემთვის ძალიან ცუდ დროს მოხდა - „რუბინს“ ტრანსფერების განხორციელება აკრძალული ჰქონდა. საბოლოოდ, ეს შეთანხმება სწორედ ამის გამო ჩაიშალა. არაფერი გამოდიოდა და „ემპოლიმ“ ყველანაირი მოლაპარაკება შეწყვიტა.

- სიმართლე ვთქვათ, იტალიიდან რუსეთში ქართველის გადასვლა დიდად არ გვიხაროდა. ახლა იტალიაში დაბრუნებას გამორიცხავთ?

- ახლა არსად წასვლაზე არ ვფიქრობ. ჯერ მინდა, ის უდიდესი ნდობა გავამართლო, რასაც გია გეგუჩაძისა და ბათუმელებისგან ვგრძნობ. მინდა, მათ ეს ნდობა დავუფასო. მერე რა იქნება, ამას დრო გვიჩვენებს.

ყოველდღიური სპორტული გაზეთი "ლელო"
978
მკითხველის კომენტარები / 0 /
მსგავსი ამბები
რუბრიკის სხვა სიახლეები
;