ინტერვიუ გია ცეცაძესთან: ცაში ფრენა არაფერს გვარგებს... ჯერ უნდა გაიზარდონ

საქართველოს ახალგაზრდულმა ნაკრებმა ბაქოს "დალგა არენაზე" აზერბაიჯანთან დამაჯერებლად მოიგო (0:3), ევრო 2021-ის შესარჩევი ციკლის ორ შეხვედრაში 6 ქულა დააგროვა და მეორე შესარჩევ ჯგუფში დაწინაურდა.

გია ცეცაძე "ლელოსთან" ინტერვიუში შესარჩევი ციკლის სტარტს აფასებს, მომავალ შეხვედრებზე, ფავორიტებსა და გუნდის ამოცანებზე ლაპარაკობს...

- უპირველესად, ევროშესარჩევის სტარტი შევაფასოთ...

- შეიძლება ითქვას, იდეალური სტარტი იყო. არც საკლუბო და არც სანაკრებო დონეზე ჩემს გუნდებს გამოსვლა ასე კარგად არასოდეს დაუწყიათ. არა მხოლოდ ქულებს, არამედ თამაშს და გოლებსაც ვგულისხმობ. კალენდარშიც გაგვიმართლა. მადლობა ფეხბურთელებს, მაგრამ ცაში ფრენაც არაფერს გვარგებს. გუნდში ვთანხმდებით, რომ ეს დასაწყისია და ეს არის საერთო განწყობა. სამუშაო და დასახვეწი ძალიან ბევრი გვაქვს. მაგრამ პროგრესი არის. ვნახოთ, რა იქნება მომავალში... ერთადერთი ჩავარდნა საბერძნეთთან ამხანაგურ შეხვედრაში გვქონდა. მაგრამ ამ წაგებასაც თავისი ახსნა აქვს. წინასწარი შეთანხმების მიუხედავად, იქ ოთხი დღის განმავლობაში მოედანზე მხოლოდ ერთხელ შეგვიშვეს...

- ...წინ კი საფრანგეთთან, შვეიცარიასა და სლოვაკეთთან მატჩები გველის...

- რა თქმა უნდა, მთავარი მატჩები ახლა იწყება, ჩვენ ჯერ მოთელვა გვქონდა.

- პირველ ორ შეხვედრაში 6 ქულა მოვიპოვეთ, რაც თავისთავად გვაახლოვებს ევროპის ჩემპიონატთან, მაგრამ ასეთ ჯგუფში შეგიძლიათ თქვათ, რომ საქართველო ფავორიტებშია?

- ფავორიტები ნამდვილად არ ვართ. თუმცა ამასაც თავისი პლუს-მინუსები აქვს. მაგრამ ფავორიტების არ გვეშინია და მათთან ბრძოლას ვაპირებთ, რადგან ჩვენი პროგრამა-მაქსიმუმი ევროპის ჩემპიონატზე მოხვედრაა, პროგრამა-მინიმუმი კი - ჯგუფში მეორე ადგილის დაკავება.

- ჯგუფის ფავორიტად რომელ ნაკრებს მიიჩნევთ?

- გამოკვეთილი ფავორიტი, უდავოდ, საფრანგეთია, მაგრამ ფავორიტია შვეიცარიაც. ძალიან მაღალი დონის მოთამაშეები ჰყავთ. რომ დასჭირდეთ, კილიან მბაპესაც დაიმატებენ.

- ჩვენი კონკურენტები რომელი ნაკრებები არიან?

- შვეიცარია და სლოვაკეთი. აზერბაიჯანმა ჩვენს ერთ-ერთ კონკურენტს, სლოვაკეთს მოუგო, რომელიც შევისწავლეთ და უდავოდ კარგი გუნდია. ამისთვის, აზერბაიჯანელების მთავარ მწვრთნელს ბაქოში მატჩის შემდეგ მადლობა გადავუხადე.

- მეტოქეთა შესწავლაში "ვაისკაუტი" გეხმარებათ?

- რა თქმა უნდა! ძალიან კარგი პროგრამაა და ბევრ საჭირო ინფორმაციას ვიღებთ. წილისყრის შემდეგ სულ მეტოქეთა შესწავლაში ვართ.

- 11 ოქტომბერს შვეიცარიას ვესტუმრებით, ეროვნული ნაკრები კი მეორე დღეს ირლანდიას უმასპინძლებს. შესაძლოა, რომ ვლადიმირ ვაისმა დავითაშვილი და კვარაცხელია ახალგაზრდულში დაგითმოთ?

- ვაისთან ურთიერთობა ძალიან მიადვილდება, რადგან გახსნილი ადამიანია, ყველა ნაკრების ინტერესს ითვალისწინებს. ახლა კარგად რომ დაფიქრდეთ, არველაძემ ჩვენთან რატომ ითამაშა? მაგრამ სუბორდინაცია უნდა დავიცვათ. უმთავრესი ეროვნული ნაკრების ინტერესია და თუ ვინმემ ტრავმა მიიღო და ფეხბურთელი ეროვნულ გუნდს დასჭირდება, ჩვენთან როგორ გამოუშვებს? ამიტომ, მისი გადაწყვეტილების მიხედვით ვიმოქმედებთ. საერთოდ, ნაკრებებს შორის ძალიან კარგი კავშირი და ურთიერთობებია.

- ახლა საპირისპირო მიმართულების შეკითხვასაც დაგისვამთ. არაბიძემ ინდივიდუალისტობით ბავშვური გატაცება მოიშორა და საწყისი ორი შეხვედრა ძალიან კარგად ჩაატარა. ეს თქვენთან ლაპარაკის შედეგია თუ პორტუგალიის შემდეგ შეცვლილია?

- საერთოდ, არაბიძე ახალგაზრდულ ნაკრებში გუნდურად თამაშობს. შეგიძლიათ მისი სტატისტიკა ნახოთ და დარწმუნდებით, რომ ის სასარგებლოა. თუმცა, თავად იცის, რომ ბევრი აქვს დასახვეწი და კიდევ უფრო მეტი პროგრესი სჭირდება, რომ უდავოდ დიდი პოტენციალი სრულად გამოავლინოს.

- ბევრი თვლის, რომ გიორგი არაბიძე და ნიკა ნინუა ეროვნულ ნაკრებშიც იმსახურებენ შანსს...

- ეს ისე იქნება, როგორც ვაისი გადაწყვეტს. მაგრამ პირადად ჩემი აზრია - ახლა არავინ უნდა ჩათვალოს, რომ ჩამოყალიბებული ფეხბურთელია. მათ, ისევე, როგორც არველაძეს, მალის, ლოჩოშვილს, ბუღრიძეს, კობოურს და გუნდის თითოეულ წევრს, გაზრდა და წინსვლა სჭიდრებათ.

ისინი ჩვენი ეროვნული გუნდის მომავალი ფეხბურთელები არიან და ამ დონეს არ უნდა დაკმაყოფილდნენ... საერთოდ, ჩემი თხოვნა იქნებოდა ყველასთან - გულშემატკივრებთან და ჟურნალისტებთანაც, უფრო მეტად კი მათთან, ვისაც ფეხბურთთან ახლო შეხება არ აქვს - ნუ ვიჩქარებთ მსგავსი მოთხოვნების წამოყენებას. თუ საჭირო იქნება, ვაისი მათ გამოიძახებს, საკუთარი თავისა და საქართველოს მტერი არ არის. ჯერ უნდა გაიზარდონ, ირლანდიასთან, შვეიცარიასა და დანიასთან ლიდერობა რომ იკისრონ. საამისოდ, ისინი მზად იქნებიან ხვალ და ამ მიზნით უნდა იშრომონ.

ასაკიც ხელს უწყობთ, რომ წინ წავიდნენ და უკეთესი მომავლის იმედი ჰქონდეთ. საჩქარო არაფერია და თემის აჟიტირებით ვერაფერს მოვიგებთ, პირიქით, სიჩქარით საქმე უფრო გაფუჭდება.

ყოველდღიური სპორტული გაზეთი "ლელო"
2226
მკითხველის კომენტარები / 0 /
მსგავსი ამბები
რუბრიკის სხვა სიახლეები
;