ინტერვიუ. გია ცეცაძე: არ გვაქვს ფეხბურთელების პრობლემა, არ არის ინდივიდების დეფიციტი...

საქართველოს ახალგაზრდული ნაკრები თურქული შეკრებიდან დაბრუნდა. გია ცეცაძის გუნდი იქ აზერბაიჯანელ თანატოლებს დაუპირისპირდა და 1:1 ითამაშა.

აქ შედეგზე მეტად მნიშვნელოვანი იყო ის, რომ ახალმა მწვრთნელმა ფეხბურთელების შესაძლებლობები შეამოწმა. თურქეთიდან დაბრუნების შემდეგ "ლელო" გია ცეცაძეს გაესაუბრა:

- ძალიან ნაყოფიერი შეკრება გამოვიდა, - ამბობს ახალგაზრდული ნაკრების თავკაცი, - ფეხბურთელები ბოლომდე ასრულებდნენ ჩვენს მითითებებს. გადაჭარბების გარეშე შემიძლია ვთქვა, რომ მათ გაითავისეს ის მოთხოვნები, რომელსაც ჩვენ მათ წინაშე ვაყენებთ.

არ დაგვავიწყდეს, რომ არაერთი მოთამაშე სულაც პირველად იყო გამოძახებული ახალგაზრდულ ნაკრებში.

- რას იტყვით აზერბაიჯანის ნაკრებთან შეხვედრაზე?

- ძალიან სასარგებლო თამაში იყო, ისევე, როგორც ვარჯიშები. ჩვენ გვინდოდა, საქმეში გვენახა ეს ფეხბურთელები. მთავარი იყო, მათ გაეგოთ ის სტრატეგია, რომლითაც ვაპირებთ თამაშს.

რაც მოხერხდა სამი დღის განმავლობაში, ეს იყო. მომავალშიც ვიმუშავებთ ამ კუთხით. კი ბატონო, აზერბაიჯანთან ფრე, შეიძლება, არ იყოს მისაღები შედეგი, მაგრამ ამ ეტაპზე მთავარი ამოცანა ის იყო, რაზეც უკვე გესაუბრეთ. ისიც შემიძლია ვთქვა, რომ ორივე გუნდმა კარგად ითამაშა.

- რას იტყვით იმ ლეგიონერებზე, რომლებიც თურქეთში გამოსცადეთ?

- კმაყოფილი ვარ როგორც მათი, ისე ზოგადად ყველა ფეხბურთელის გარჯით. მინდა გარკვევით ვთქვა - ჩვენ არ გვაქვს ფეხბურთელების პრობლემა, არ არის ინდივიდების დეფიციტი, უბრალოდ, ჩვენზეა დამოკიდებული, როგორ მოვაქცევთ მათ გუნდურ ყალიბში. ჩვენს ლეგიონერებს სხვადასხვა ქვეყნის უმაღლეს ლიგაში აქვთ სათამაშო პრაქტიკა.

- თუ არის ისეთი ლეგიონერი, რომელიც მომავალში შეიძლება გამოჩნდეს ახალგაზრდულ ნაკრებში, თუნდაც არაქართულპასპორტიანი?

- მთავარი არ არის ჩემი ან თქვენი სურვილი, მასაც უნდა უნდოდეს თამაში ნაკრებში. ვეძებთ, ვმუშაობთ და ამ მხრივ თქვენი, მედიის იმედიც გვაქვს.

- დაბოლოს, ორი შესარჩევი მატჩი გვიახლოვდება...

- ვმუშაობთ მოწინააღმდეგეების შესწავლაზე. როგორც დანიასთან, ისე ფარერებთან ჩვენი მიზანი მოგებაა, დანარჩენს კი უშუალოდ მინდორზე ვნახავთ.

ყოველდღიური სპორტული გაზეთი "ლელო"
2219
მკითხველის კომენტარები / 0 /
მსგავსი ამბები
რუბრიკის სხვა სიახლეები
;