ინტერვიუ. გია ცეცაძე: მზად ვარ, ყველა ჩემი პირადი შეხედულება გვერდით გადავდო, თუკი...

აქართველოს ახალგაზრდული ნაკრები იანვრის მეორე ნახევარში თურქულ შეკრებაზე წავა და აზერბაიჯანელ თანატოლებთან ამხანაგურ შეხვედრასაც გამართავს.

ახალგაზრდული ნაკრები ექსპერიმენტული შემადგენლობით კი ითამაშებს, მაგრამ მატჩი მაინც დიდი მნიშვნელობისაა - სწორედ ამ სპარინგში შედგება გია ცეცაძის დებიუტი.

გუშინ "ლელო" ცეცაძეს დაუკავშირდა და ინტერვიუ ჩაწერა...

ეროვნული ნაკრების ინტერესები ჩვენთვის უზენაესია

- რა თქმა უნდა, ძალიან მნიშვნელოვანია, რომ გვექნება შეკრება თურქეთში და აზერბაიჯანის ნაკრებთან ამხანაგურ მატჩს ჩავატარებთ. მოგეხსენებათ, ამ შეხვედრის თარიღი არ ემთხვევა უეფას მიერ დადგენილ კალენდარს.

ამდენად, დიდი მადლობა მინდა ვუთხრა ყველა ქართული და უცხოური კლუბის ხელმძღვანელობასა და სამწვრთნელო შტაბს, რომლებმაც ფეხბურთელები ნაკრებში გამოუშვეს...

წესით, ნაყოფიერი შეკრება უნდა გამოვიდეს. ოთხი დღით მივდივართ შეკრებაზე და ეს მინიმუმ ხუთ ვარჯიშს მაინც ნიშნავს. რაც შეეხება აზერბაიჯანის ნაკრებთან მატჩს, მართალია, არ ვართ ოპტიმალური შემადგენლობით, მაგრამ ყველაფერს გავაკეთებთ იმისთვის, რომ თამაშის ხარისხიც და შედეგიც იყოს დადებითი.

ბევრი ფეხბურთელი, რომელსაც შეუძლია ახალგაზრდულში თამაში, ეროვნული გუნდისთვისაა შეგულებული და ეს ძალიან გვახარებს. ჩვენთვის უზენაესია ეროვნული ნაკრების ინტერესები.

რაც შეეხება უშუალოდ მეტოქეს, აზერბაიჯანის ახალგაზრდულ ნაკრებს ვსწავლობთ, ვაანალიზებთ... ნორმალური გუნდია. დანარჩენს თამაში გამოაჩენს.

სანამ შანსი არის, ბრძოლას ყოველთვის  აქვს აზრი

- ამ ფორმაციის ნაკრებს "ექსპერიმენტული" ეთქმის. ბევრია შედარებით უმცროსი მოთამაშე. მიმდინარე შესარჩევ ციკლში წარმატების შანსი მცირეა. აქცენტს მომავალ შესარჩევზე ხომ არ გადაიტანთ?

- ასე არ ვიტყოდი. სანამ არსებობს თუნდაც თეორიული შანსი, რომ დავძლიოთ ეს ბარიერი, ჩვენგან კაპიტულაცია გამორიცხულია. თეორიული შანსიც შანსია. ბოლოსდაბოლოს, წინ არის 5 თამაში.

მე მესმის, რომ ეს იქნება ძალიან რთული, რთული კი არა ურთულესი, მაგრამ კიდევ ერთხელ ვამბობ - სანამ არის შანსი, ბრძოლას ყოველთვის აქვს აზრი! ჩვენ ყურადღება უნდა მივაქციოთ ფიზიოლოგიურ მომენტსაც.

18 წლის ასაკში ძნელია 3 წლით უფროსებთან თამაში. როცა ასაკი, შესაბამისად, ვთქვათ, 23 და 26 წელია, მაშინ აღარ არის ამხელა სიძნელე, მაგრამ შედარებით პატარა ასაკში არის ეს ფაქტორიც. ფეხბურთელი უნდა მომწიფდეს იმისთვის, რომ გადაჭრას კონკრეტული ამოცანები.

- რეალურად, როგორ თაობასთან გაქვთ საქმე?

- ეს თაობა არის ერთ-ერთი საუკეთესო. ამას გადაჭარბების გარეშე ვიტყვი. არაფრით არ არის ნაკლები იმაზე, რომელმაც თუნდაც ჩემი ხელმძღვანელობით ითამაშა ევროპის ჩემპიონატზე.

ახლა ეს პრობლემა აღარ არის

- რა ვუყოთ იმას, რომ კონკრეტულ ასაკში, სუბიექტური თუ ობიექტური მიზეზების გამო, ახალგაზრდა ქართველი ფეხბურთელი წყვეტს განვითარებას? ეს პრობლემა თქვენი ფორმაციის ნაკრებსაც შეეხო. მერე ისე მოხდა, რომ ეს ბიჭები ისევ თქვენ გამოიყვანეთ ჩიხიდან...

- საბედნიეროდ, დღეს ეს პრობლემა აღარ არსებობს. მე ვერ ვიტყვი, რომ იმ თაობის დროს იყო რამე სხვა მიზეზი. იყო მხოლოდ ის, რომ არ იყო ნდობა ფეხბურთელების მიმართ ქართული კლუბებისგან.

ზოგიერთი საერთოდ არ ათამაშეს, ზოგიერთი გუნდში არ მიიღეს... 16 წლის ასაკში ფეხბურთელს ვერ აჰკიდებ დიდ პასუხისმგებლობას შედეგზე, მაგრამ 18-19 წლის ფეხბურთელი ბავშვი აღარ არის.

გამოცდილ მოთამაშესთან ერთად მას შეუძლია შექმნას თამაშის საერთო სურათი. რაც შეეხება კონკრეტულ შემთხვევას, "სამტრედიას" მენეჯმენტმა ბოლომდე გამომიცხადა ნდობა. ფეხბურთელებმაც გაამართლეს. ანუ, გამოიყენეს შანსი.

დღეს ამ ბიჭების 70 პროცენტი ევროპაშია წასული სათამაშოდ. ეს მათ შეძლეს სულ რაღაც წელიწად-ნახევრის განმავლობაში. დღეს ქართულ ფეხბურთში მე ვეღარ ვხედავ ამ პრობლემას. დღეს ახალგაზრდა ფეხბურთელებს აქვთ მეტი ნდობა და ეს ძალიან მახარებს. ეს მათი განვითარებისთვის მნიშვნელოვანი წინაპირობაა.

დაცვით ფეხბურთს არ ვითამაშებთ

- გია ცეცაძე შემტევ ფეხბურთთან ასოცირდება. როგორ ითამაშებს მისი ხელმძღვანელობით საქართველოს ახალგაზრდული ნაკრები?

- დღევანდელ ფეხბურთში აღარავინ თამაშობს ისე, რომ მხოლოდ შეტევას აქცევდეს ყურადღებას. მე ერთი რამ შემიძლია ვთქვა: საქართველოს ახალგაზრდული ნაკრები ჩემი ხელმძღვანელობით არ ითამაშებს დაცვით ფეხბურთს.

ყრუ დაცვაში არ ჩავჯდებით არც ერთ მოწინააღმდეგესთან. მე, უბრალოდ, არ ვიცი ასეთი ფეხბურთი. ვეცდებით, თავად ვუკარნახოთ ჩვენს მოწინააღმდეგეს თამაშის სცენარი. გასათვალისწინებელია მეტოქის ფაქტორიც.

- ალბათ, აკვირდებით საზღვარგარეთ მოთამაშე ქართველებს, რომელთაც ამ ეტაპზე არ აქვთ ქართული პასპორტი...

- საქართველოს ფეხბურთის ფედერაციის დახმარებით მოვიძიე ინფორმაშია ამ ფეხბურთელებზე და ვაკვირდები მათ, მიდის მუშაობა. ძირითადად საუბარია პოსტსაბჭოთა ქვეყნებზე - რუსეთზე, უკრაინაზე...

არიან ევროპაშიც. ფაქტია, 21-წლამდელთა ნაკრები არის პროფესიული ფეხბურთის შემადგენელი ნაწილი და ჩვენ დიდი დაკვირვება გვმართებს. ნაკრებში თვალდახუჭული ვერ მოვიყვანთ ფეხბურთელს მხოლოდ იმის გამო, რომ ის თამაშობს საზღვარგარეთ.

მეორე მომენტია ის, რომ ფეხბურთელს უნდა ჰქონდეს ნაკრებში თამაშის დიდი სურვილი. ჩემთვის და ჩვენთვის საბედნიეროდ, არიან ჩვენთან ასეთი ფეხბურთელები. ბევრნი არიან და ეს მახარებს.

აქ არის ღმერთი, ქვეყანა და ხალხი. ეს არის ყველას უდიდესი პასუხისმგებლობა და მოტივაცია. ჩემთვის პატრიოტულ მომენტს ძალიან დიდი მნიშვნელობა აქვს.

ხშირად მესმის აზრი, რომ ჩვენ არ გვყავს ფეხბურთელები. როცა ვინმე მეკითხება, საწინააღმდეგოს ვპასუხობ. მჯერა, შევძლებთ ისეთი გუნდის შექმნას, სადაც იქნება დიდი კონკურენცია ყველა პოზიციაზე.

- დაბოლოს, როგორ წარმოგიდგენიათ თქვენი მუშაობა ეროვნულ ნაკრებთან მიმართებაში? ვთქვათ, ხომ არ არის მოსალოდნელი, რომ იმავე სქემით ითამაშოთ, როგორითაც თამაშობს ქვეყნის პირველი გუნდი?

- ვლადიმირ ვაისი ჩამოვა და მასთან აუცილებლად მექნება კონსულტაცია. ეროვნული ნაკრები არის უპირველესი და როცა საქმე მას ეხება, მზად ვარ, ყველა ჩემი პირადი შეხედულება გვერდით გადავდო.

ყოველდღიური სპორტული გაზეთი "ლელო"
2868
მკითხველის კომენტარები / 0 /
მსგავსი ამბები
რუბრიკის სხვა სიახლეები
;