ინტერვიუ გიორგი ასანიძესთან: ოჯახი ლაშა ტალახაძისთვის დამატებითი მოტივაცია იყო

გასულ უქმეებზე თურქმენეთის დედაქალაქ აშხაბადში დამთავრებულ ძალოსანთა მსოფლიოს ჩემპიონატში წარმატებით იასპარეზეს ქართველმა ათლეტებმა, რომლებმაც სამი ოქროს, ორი ბრინჯაოს მედალი, უფროსებში შვიდი და ახალგაზრდებში ორი მსოფლიოს რეკორდი დაამყარეს.

მძლეთამძლე ლაშა ტალახაძე: შეუკვეთეთ, რამდენიც გინდათ, ავწევ! [VIDEO]

ჩემპიონატზე ქართველ სპორტსმენთა გამოსვლასა და სამომავლო გეგმებზე გვესაუბრება ნაკრების მთავარი მწვრთნელი, ოლიმპიური ჩემპიონი გიორგი ასანაიძე.

- ქართველმა ძალოსნებმა სხვადასხვა საერთაშორისო შეჯიბრებაზე წლეულს სამივე სინჯის 77 მედალი მოიპოვეს, - გვითხრა მან. - ეს იმის შედეგია, რომ ძალოსნობის ეროვნული ფედერაცია მიზანმიმართულად მუშაობს. მისი დახმარებითა და თანადგომით მთელი წლის განმავლობაში ყველა ტურნირისთვის მონდომებით ვემზადებოდით. უპირველესი ორიენტირი, ცხადაია, მსოფლიოს ჩემპიონატი იყო, როგორც წლის უმთავრესი ასპარეზობა.

ნაკრების წევრები საწვრთნელ შეკრებებთან ერთად რამდენიმე პირველობაში გამოვცადეთ. ბოლო გენერალური რეპეტიცია ეროვნული ჩემპიონატი იყო, სადაც სპორტსმენებმა შესაძლებლობათა მაქსიმუმი გამოავლინეს, განსაკუთრებით ლაშა ტალახაძემ გამოიჩინა თავი, რომელმაც ძალოსნობის ისტორიას ძველ წონაში მსოფლიოზე მაღალი საქართველოს რეკორდები დაუტოვა. ამიტომაც გვეიმედებოდა ოლიმპიური ჩემპიონი, რომ აშხაბადში ტიტულს შეინარჩუნებდა. ასეც მოხდა, თანაც როგორი ფურორით - სამი ოქროს მედალი დაიმსახურა და მსოფლიოს შვიდი რეკორდი დაამყარა.

სერიოზული ტრავმის შემდეგ დაუბრუნდა სარბიელს ნაკრების კაპიტანი, ოლიმპიური პრიზიორი ირაკლი თურმანიძე. აშხაბადში მან ატაცში ბრინჯაოს მედალი მოიპოვა, მაგრამ აკვრაში ვეღარ გავიდა ფიცარნაგზე, რადგან ფეხის ტრავმა გაუმიზეზდა. შესაძლო იყო, მაინც ეცადა ბედი, მაგრამ არ გავრისკეთ, რადგან გაისად ბათუმში ევროპის ჩემპიონატი გვაქვს და ირაკლიმ იქაც უნდა თქვას თავისი სიტყვა.

ძალიან გამახარა ახალგაზრდა რეზი დავითაძის წარმატებამ - ორჭიდში მას ბრინჯაო ერგო. 20 წლის ყმაწვილისთვის ეს შესანიშნავი შედეგია, მით უმეტეს, რომ თანატოლებში მან ჯერ მსოფლიოს, შემდეგ კი ევროპის ჩემპიონატი მოიგო, თან ამ შეჯიბრებებში 4 ოქრო და 2 ვერცხლი (ორივე-აკვრაში) მოინაგრა.

აღსანიშნავია ისიც, რომ გუნდის დანარჩენმა ახალგაზრდა წევრებმა ერთი მეხუთე, ორი მეშვიდე და ერთიც მერვე ადგილი დაიკავეს. ალბათ, უკეთესიც შეიძლებოდა, მაგრამ, თუ გავითვალისწინებთ იმას, რომ ნაკრებში თაობათა ცვლის პროცესი მიმდინარეობს, აშხაბადში ნაჩვენები შედეგებით კმაყოფილი ვარ. ამიტომ, უპირველესად, სპორტსმენებს, მწვრთნელებს, ჩვენს ფედერაციას, ასევე, სპორტის სამინისტროს, ეროვნულ ოლიმპიურ კომიტეტს, სპონსორებს, ჟურნალისტებს მინდა ვუთხრა მადლობა თანადგომისთვის, განსაკუთრებით კი ქომაგებს, რომელთა მხარდაჭერა მთელი წლის განმავლობაში არ მოგვკლებია.

- აკრაში მესამე ცდის წინ წონის შეკვეთისას ლაშამ თქვა, ყველა წონის ასაწევად მზად ვარო, თქვენ კი 257-ზე შეჩერდით, არადა, ეროვნულ ჩემპიონატში 264 კილო ჰქონდა დაძლეული.

- ყველა შეჯიბრებას მე ვხელმძღვანელობ და როგორც საჭიროდ მივიჩნევ ტაქტიკურად, ისეთ წონას ვუკვეთავ, თანაც ისე, რომ სპორტსმენმა ასპარეზობის ჟინი და სილამაზე არ დაკარგოს. ასე იყო აშხაბადშიც. მართალია, ლაშას 264 კილო დაძლეული ჰქონდა და მისი პოტენციალის პატრონი უფრო დიდ წონაზეც არის მიმსვლელი, მაგრამ ყველაფერს თავისი დრო და მნიშვნელობა აქვს. რადგანაც წლეულს საერთაშორისო ფედერაციამ წონები შეცვალა და ახალი სტანდარტები დააწესა, თურქმენეთის დედაქალაქში დროისა და სიტუაციის შესაფერისად რეალური და ობიექტური გადაწყვეტილება მივიღეთ. ვფიქრობ, რომ მსოფლიოს ჩემპიონატი ტალახაძის მიერ დაძლეულმა 257-მა კილოგრამმა და შვიდმა რეკორდმაც დაამშვენა, რასაც გულშემატკივრები მქუხარე ოვაციით შეხვდნენ.

- და მაინც, მეტოქეებისთვის უფრო დიდი სიურპრიზი ბათუმის ევროპის ჩემპიონატისთვის ხომ არ შემოინახეთ?

- გამორიცხული არაფერია. თქვენც იცით, რომ ბუნებით აზარტული პიროვნება ვარ, არ მინდა, შეჯიბრებას სილამაზე დავუკარგო, მაგრამ ზოგჯერ პრაგმატულობასაც ვუწევ ანგარიშს. რაც შეეხება ბათუმურ ბატალიებს, სიურპრიზებს წინასწარ ამოცანად არ ვისახავთ - ყველაფერი იმაზეა დამოკიდებული, კონკრეტული შეჯიბრებისთვის როგორ იქნება სპორტსმენი მომზადებული.

- ლაშას კიდევ ერთხელ ვულოცავთ დაოჯახებას. როგორ ფიქრობთ, დაქორწინებამ რამდენად შეუწყო ხელი მსოფლიოს ჩემპიონატზე მის წარმატებულ გამოსვლას?

- ყველას დიდი მადლობა, ვინც მისი ბედნიერება გაიზიარა. ცხადია, ოლიმპიური თამაშების გამარჯვებულს, მსოფლიოს და ევროპის სამ-სამგზის ჩემპიონს გააზრებული აქვს ოჯახის შექმნის პასუხისმგებლობა, თანაც ეს ლაშასთვის დამატებითი მოტივაცია გახდა კვარცხლბეკის უმაღლეს საფეხურზე ასასვლელად. დარწმუნებული ვარ, მომავალშიც ასე იქნება.

- ანასტასია გოტფრიდი ძალიან დააკლდა ჩვენს გუნდს აშხაბადში...

- გეთანხმებით. რომ არა ტრავმა, ის მსოფლიოს ჩემპიონის ტიტულს შეინარჩუნებდა. მომავალი წლიდან ისევ შემოგვიერთდება და სხვა ათლეტებთან ერთად 2020 წლის ტოკიოს ოლიმპიური თამაშების ლიცენზიისთვის იბრძოლებს.

- ზემოთ ბათუმში გასამართავი ევროპის ჩემპიონატი ვახსენეთ...

- დიახ, საერთაშორისო ფედერაციებმა ეს უკვე მერამდენედ გვანდეს მნიშვნელოვანი შეჯიბრების მასპინძლობა, რაც ქართველი ძალოსნებისა და, უპირველესად, ჩვენი ფედერაციის პრეზიდენტ კახი კახიაშვილის საერთაშორისო ავტორიტეტზე მიუთითებს.

ინფრასტრუქტურისა და ორგანიზაციის მხრივ აშხაბადის მსოფლიოს ჩემპიონატი შესანიშნავად ჩატარდა. შევეცდებით, სტუმრებს ბათუმიც დავამახსოვროთ. საამისოდ ადგილობრივი ხელისუფლების, ქვეყნის მთავრობის აქტიური მხარდაჭერა გვაქვს. შეჯიბრება აჭარის დედაქალაქის ოლიმპიურ სასახლეში გაიმართება, სადაც ამას წინათ მსოფლიოს საჭადრაკო ოლიმპიადა ჩატარდა. დეკემბრიდან ახალი სეზონისთვის მზადებას დავიწყებთ და გულშემატკივრების გასახარებლად 2019 წელსაც არაფერს დავიშურებთ.

ყოველდღიური სპორტული გაზეთი "ლელო"
1114
მკითხველის კომენტარები / 0 /
მსგავსი ამბები
რუბრიკის სხვა სიახლეები
;