ევროპის ჩემპიონი მსოფლიოზეც წავა - ინტერვიუ გიორგი ასანიძესთან

ფოტოზე: გიორგი ასანიძე, ლაშა ტალახაძე და ირაკლი თურმანიძე

უკვე ვწერდით, რომ საქართველოს ათლეტებმა ალბანეთის ქალაქ დურესში ახალგაზრდა და 23-წლამდელ ძალოსანთა ევროპის ჩემპიონატზე სარეკორდო - 27 მედალი მოიპოვეს. ამ წარმატებაში დიდი წვლილი მიუძღვის ძალოსანთა ეროვნული ნაკრების მთავარ მწვრთნელს, ოლიმპიურ ჩემპიონ გიორგი ასანიძეს, რომელიც დურესში ახლდა სპორტსმენებს - თითოეულ მათგანს ფიცარნაგზე გასვლის წინ მოძღვრავდა და ამხნევებდა.

- ბედნიერი ვარ, რომ ჩვენმა ძალოსნებმა ასეთ შედეგებს მიაღწიეს, - გვითხრა მან. - თითოეულმა მათგანმა ღირსეულად იასპარეზა. ამ შეჯიბრებისთვის იანვრიდან ვემზადებოდით.

ძალოსნობის ეროვნული ფედერაციისა და სპორტის სამინისტროს ხელშეწყობით რამდენიმე საწვრთნელი შეკრება მოვაწყვეთ, მათ შორის - ბაზალეთსა და დუშეთში. ათლეტებს ვარჯიშისა და აქტიური დასვენების ყველა პირობა ჰქონდათ და მათაც მწვრთნელებს ამაგი სოლიდური მაჩვენებლებით დაუფასეს.

მინდა მადლობა ვუთხრა სპორტსმენებს, მწვრთნელებს, ფედერაციას, სპორტის სამინისტროს, მედიცინის მუშაკებსა და ყველა იმ ადამიანს, ვინც ამ გამარჯვებაში თავისი წვლილი შეიტანა. შარშან ეილათში მსგავს ტურნირში 23 მედალი მოვიხვეჭეთ, დურესში ეს მაჩვენებელი ოთხი ერთეულით გავზარდეთ. საკმაოდ მაღალი თამასაა, მაგრამ აქ გაჩერებას არ ვაპირებთ - სამომავლოდ რაოდენობრივ და ხარისხობრივ მაჩვენებლებს აუცილებლად გავაუმჯობესებთ.

- ვის გამოარჩევდით?
- ყველა ბოლომდე დაიხარჯა და საერთო წარმატებისთვის თავი არავის დაუზოგავს. ამდენად, ნაკრების თითოეული წევრი ქების ღირსია, თუმცა ცალკე მინდა აღვნიშნო ანასტასია გოტფრიდის გამარჯვება. იგი ქალებში ევროპის ჩემპიონია, ახალგაზრდებში მსოფლიოს მეორე პრიზიორი.შარშან ეილათში 20-წლამდელთა შორის სამი ოქროს მედალი დაიმსახურა. ალბანეთში მან ექვსიდან ხუთი ცდა გამოიყენა. აკვრაში მე-3 ცდაზე უარი ვთქვით - ჩემპიონობა განაღდებული ჰქონდა და ზედმეტ რისკს მოვერიდეთ, რადგან წინ მსოფლიოს ჩემპიონატი გველის.{loadmodule mod_tags_similar,ასევე დაგაინტერესებთ}

წლის ამ მნიშვნელოვან შეჯიბრებას 28 ნოემბრიდან 5 დეკემბრამდე ამერიკის შეერთებული შტატები უმასპინძლებს. ანასტასია 90 კილოში უპირობო ლიდერია და მჯერა, რომ მომავალ ტურნირშიც გვასახელებს.

- გოტფრიდის გარდა, ქართველთაგან მსოფლიოზე კიდევ ვინ იასპარეზებს?
- ორი მათგანის ვინაობა ცნობილია - მძიმე წონაში ოლიმპიური თამაშების, მსოფლიოს და ევროპის ჩემპიონი ლაშა ტალახაძე და რიოს ოლიმპიადის ბრინჯაოს პრიზიორი ირაკლი თურმანიძე.

არ არის გამორიცხული, მათ რიგებს კიდევ ერთი ათლეტი შეუერთდეს - ამას ოკეანის გაღმა გამგზავრებამდე დარჩენილ დღეებში ვარჯიშის პროცესი გვიჩვენებს. ჩვენი ჯილა - ლაშა ტალახაძე მზად არის ტიტულის შესანარჩუნებლად ნებისმიერი წონის დასაძლევად. ასპარეზობის დაწყებისთვის კონდიციებს აღიდგენს თურმანიძეც. წლის ბოლო აკორდისთვის დუშეთში მოვემზადებით.

- ბატონო გიორგი, დოპინგის გამოყენების გამო ამას წინათ ძალოსნობის საერთაშორისო ფედერაციამ რამდენიმე ქვეყანას ერთი წლით შეუჩერა უფლებამოსილება, თუმცა მათმა ათლეტებმა ანტალიაში მაინც მოსინჯეს ძალები და მედლებიც მოიხვეჭეს...
- აკრძალვა პირველი ნოემბრიდან შედის ძალაში და 2018 წლის მსოფლიოს ჩემპიონატამდე გაგრძელდება. ასე რომ, ეს ქვეყნები ამერიკის მსოფლიოს ჩემპიონატში ვეღარ იასპარეზებენ.

(იბეჭდება მცირე ცვლილებით)
ყოველდღიური სპორტული გაზეთი "ლელო"

2900
მკითხველის კომენტარები / 0 /
მსგავსი ამბები
რუბრიკის სხვა სიახლეები
;