[ინტერვიუ] გიორგი მაკარიძე: გადავიტანთ ამ სირთულეებს და... იმედი მაქვს, ზაფხულში უფრო ძლიერ გუნდში გადავალ!..

საქართველოს ეროვნული ნაკრებისა და პორტუგალიური "სეტუბალის" მეკარე გიორგი მაკარიძე სტატისტიკით ერთ-ერთი საუკეთესოა ევროპელ გოლკიპერებს შორის. ფეხბურთი ვერაფრით იქნება მხოლოდ სტატისტიკა. ჩვენ თვალს ვადევნებდით მაკარიძის თამაშს პორტუგალიის ძლიერ ჩემპიონატში და ის შეიძლება მხოლოდ ერთი სიტყვით დახასიათდეს: ბრწყინვალე!

განსაკუთრებით უნდა გამოვარჩიოთ მატჩი პორტუგალიური ფეხბურთის გრანდ "ბენფიკასთან", რომელშიც 28 წლის მეკარემ მართლაც დიდებულად ითამაშა და პორტუგალიურ მედიას დიდი დითირამბები დასტყუა. გუშინ "ლელო" მაკარიძეს შეეხმიანა და ინტერვიუ ჩამოართვა:

- გიორგი, პორტუგალიაში ხართ?

- კი, პორტუგალიაში ვრჩები მას შემდეგ, რაც თამაშები შეწყდა. საქართველოში დაბრუნება ახლა გამორიცხულია, აქ ვარ და ველოდები ჩემპიონატის განახლებას. აქ იმედი აქვთ, რომ მოხერხდება სეზონის ჩამთავრება. ყველა მოლოდინის რეჟიმშია. ასე ვარ მეც...

- დროს ძირითადად შინ ატარებთ?

- სახლში ვარ ძირითადად, იშვიათად თუ გავალ ქუჩაში პროდუქტების შესაძენად ან სასეირნოდ. აქ არ არის აკრძალვები, არავინ გაჩერებს ქუჩაში გასულს, მაგრამ რა აზრი აქვს - რომც გახვიდე, პრაქტიკულად არავინ არის ქუჩაში, ყველა სახლშია. მეც მაქსიმალურად ვიცავ და ვითვალისწინებ რეკომენდაციებს.

- და რითი გაგყავთ დრო?

- ვვარჯიშობ და ყველაფერს ვაკეთებ იმისთვის, რომ ფიზიკური ფორმა შევინარჩუნო. ვკითხულობ, ძველ მატჩებს ვიხსენებ... კალათბურთის დიდი გულშემატკივარი ვარ და აქაც სიამოვნებით ვადევნებ თვალს ძველ თამაშებს...

- პორტუგალიაში რა მდგომარეობაა კორონავირუსის მხრივ?

- ამ ბოლო დროს უფრო შეინიშნება დაძაბულობა. დაინფიცირებულების რაოდენობამ მოიმატა. ზოგადად, ყველა ცდილობს, რეკომენდაციები მაქსიმალურად გაითვალისწინოს.

- ფსიქოლოგიურად არ არის რთული?

- რა თქმა უნდა, ძალიან რთულია. უბრალოდ, ახლა მთავარია, ეს ვირუსი დავამარცხოთ... სხვა გზა არ არის, უნდა გავუძლოთ სირთულეებს.

- პორტუგალიაში რომელიმე ფეხბურთელს ხომ არ აქვს კორონავირუსი?

- არა, ყოველ შემთხვევაში, რაც მე ვიცი, ამის თაობაზე ჯერ არ გავრცელებულა ინფორმაცია...

- ფაქტია, რომ შესანიშნავი სეზონი გაქვთ. უკვე არაერთი დასამახსოვრებელი მატჩი ჩაატარეთ. მათ შორის იყო ბრწყინვალე მატჩი "ბენფიკასთან"... არის შანსი, რომ ზაფხულში უფრო ძლიერ გუნდში გიხილოთ?

- ყოველ ზაფხულს ვგეგმავ უფრო ძლიერ კლუბში გადასვლას... სულ არის ვარიანტები, მაგრამ ამ დრომდე არაფერი გამოდის. იმედი მაქვს, ამ ზაფხულს მაინც შევძლებ უფრო ძლიერ გუნდში გადასვლას, თუმცა მთავარია, ჯერ სეზონი განახლდეს და დავუბრუნდეთ ნორმალურ საფეხბურთო ცხოვრებას. რაც შეეხება ამ სეზონს, მართლაც მქონდა კარგი მატჩები, მაგრამ არ ვკმაყოფილდები მიღწეულით. მინდა, პროგრესი გავაგრძელო.

- ბელარუსთან მარტში უნდა გვეთამაშა, მაგრამ ივნისში გადაგვიტანეს, ყოველ შემთხვევაში, ასე ჩაწერა უეფამ კორექტირებულ კალენდარში. თქვენი აზრით, კარგია ეს თუ ცუდი საქართველოს ნაკრებისთვის?

- კარგი ის არის, რომ ქართველი გულშემატკივარი ჩვენთან ერთად იქნება. ახლა მიჭირს თქმა, როგორ ფორმაში ვიქნებით ივნისისთვის, თუ კიდევ არ შეიცვალა თარიღი. თითოეული ჩვენგანი გრძნობს ამ დიდ პასუხისმგებლობას და მაქსიმუმს აკეთებს, მაგრამ ეს პაუზა მაინც იმოქმედებს ყველა ფეხბურთელის კონდიციაზე და არ აქვს მნიშვნელობა, ქართველი იქნება, თუ უცხოელი...

- ...და ამ დროს ბელარუსის ჩემპიონატი არ ჩერდება...

- წავიკითხე, როგორ აშუქებს ყველა წამყვანი მედიასაშუალება ამ ჩემპიონატს. ის კი არა, მეც ვუყურებ... არ მიმაჩნია გამართლებულად ახლა თამაში. მთელი მსოფლიო ანგარიშს უწევს დღევანდელ რეალობას...

- რას ფიქრობთ ბელარუსის ნაკრებზე?

- როგორც გითხარით, ვუყურე ბელარუსის ჩემპიონატის რამდენიმე მატჩს. დამაინტერესა, მათი ნაკრების ძირითადი ბირთვი ხომ შიდა ჩემპიონატში თამაშობს... დღეს ყველა მეტოქეს სჭირდება დაფასება. ჩვენც ბოლომდე უნდა დავაფასოთ ჩვენი მომავალი მოწინააღმდეგე, მაგრამ მიმაჩნია, რომ ჩვენ ბელარუსზე ძლიერი ნაკრები გვყავს...

552
მკითხველის კომენტარები / 0 /
მსგავსი ამბები
რუბრიკის სხვა სიახლეები
;