ინტერვიუ. გიორგი მჭედლიშვილი: ეს ჩემთვის ცოტა დაუჯერებელი და მოულოდნელი ამბავი იყო...

საქართველოს ფეხბურთის ფედერაციის წლის შემაჯამებელ ღონისძიებაზე (GFF AWARDS 2017), ეროვნული ლიგის გამორჩეული წარმომადგენლებიც გამოავლინეს და სეზონის სიმბოლური ნაკრებიც დაასახელეს.

11 საუკეთესო მოთამაშეს შორის "სამტრედიას" მარჯვენა მცველი გიორგი მჭედლიშვილიც მოხვდა. მანამდე, 25 წლის მოთამაშემ საკუთარი გვარი "ლელოს" წლის სიმბოლურ გუნდშიც ამოიკითხა.

მჭედლიშვილმა მართლაც მშვენიერი სეზონი ჩაატარა, თავი კარგი და საიმედო თამაშებით, ასევე, რამდენიმე ლამაზი გოლითაც დაგვამახსოვრა. წლის ბოლოს კი მჭედლიშვილს კონკრეტული წინადადებები გამოუჩნდა

და როგორც შევიტყვეთ, პირველი ქართველი ფეხბურთელია, რომლის ტრანსფერითაც საქართველოში "ინსტატის" პროგრამის დანერგვის შემდეგ დაინტერესდნენ.

"ლელომ" გიორგი მჭედლიშვილს ინტერვიუ ჩამოართვა, რადგან მისი სამომავლო გეგმებით დავინტერესდით. ეროვნული ლიგის საუკეთესო მარჯვენა მცველმა გაგვიმხილა, რომ მალე ახალ კლუბში ჩაირიცხება...

- ცნობილი გახდა, "სამტრედიასთან" ახალი კონტრაქტი არ გაგიფორმებიათ. საერთაშორისო სააგენტოებმა კი თბილისის "ლოკომოტივის" ფეხბურთელად გამოგაცხადეს.

- დეკემბრის ბოლოს თავისუფალი აგენტი გავხდი და "ლოკომოტივში" გადასვლა ნამდვილად შემომთავაზეს. მაგრამ ტყუილია, თითქოს, ამ კლუბში უკვე გადავედი. "ლოკომოტივში" ნამდვილად არ ვითამაშებ.

- მათი პირობები მიუღებელი იყო?

- პირობებზე არ არის ლაპარაკი და ისე არ გაიგოთ, თითქოს, "ლოკომოტივს" რამეს ვუწუნებ. პირიქით, მადლობელი ვარ, ჩემით რომ დაინტერესდნენ. საერთოდ, ყველა დაინტერესებულ ქართულ გუნდზე იმავეს ვიტყვი. უბრალოდ, აქ დარჩენა არ მსურდა.

- რომელი გუნდები გიწვევდნენ?

- შემოთავაზება იყო ქუთაისის "ტორპედოდან" და "რუსთავიდანაც". მაგრამ უცხოეთში თამაში მსურდა და ამიტომ სამივე წინადადებაზე უარი ვთქვი. სხვათა შორის, არასწორი ინფორმაცია იყო, თითქოს, "სამტრედიამ" ხელშეკრულების გახანგრძლივება არ შემომთავაზა.

ამაზეც იყო ლაპარაკი და უცხოეთიდან ვარიანტი რომ არ გამოჩენილიყო, "სამტრედიაში" დავრჩებოდი.

- უცხოეთში ასეთი რეალური წინადადება გაქვთ?

- კონკრეტული ვარიანტია და დიდი ალბათობით, კონტრაქტის გასაფორმებლად მალე გავემგზავრები.

- თუ საიდუმლო არაა, რომელ გუნდზეა ლაპარაკი?

- ხორვატიიდან, ქალაქ ველიკა გორიცას კლუბ "გორიცადან" დამიკავშირდნენ და კონტრაქტი შემომთავაზეს.

- რა ვადიან ხელშეკრულებაზეა ლაპარაკი?

- ოფციონის წესით, 1+1 შემომთავაზეს, ანუ პირობები ერთი წლის შემდეგ რომ გადაიხედება.

- ხორვატიაში როდის მიემგზავრებით?

- სავარაუდოდ, შემდეგ კვირას.

- "გორიცა" პირველი ლიგის გუნდი არ არის?

- დიახ, ასეა. მაგრამ სატურნირო ცხრილში მეორე ადგილზეა.

- და მაინც, პირველი ლიგის გუნდში რა პერსპექტივა დაინახეთ?

- ის, რომ ამბიციური გუნდია, ხორვატიის მთავარ ლიგაში გადასვლის რეალური შანსი აქვს და უმაღლესში გადასვლისთვის იბრძვის. სხვათა შორის, პირველ ადგილზე ზაგრების "დინამოს" დუბლშემადგენლობაა, რომელსაც გადასვლის უფლება არ გააჩნია.

ასე რომ, ფაქტობრივად, ლიდერ გუნდში გადავდივარ. საქართველოს შემდეგ კი დამკვიდრება ყველგან ჭირს და მირჩევნია, თამაში ამ დონის გუნდიდან დავიწყო.

მეორეც, ამ პერიოდში ხორვატულ ფეხბურთს შევეჩვევი, იმედია, ძირითად შემადგენლობაში ვითამაშებ და მერე სხვა გუნდებიც დაინტერესდებიან. საერთოდ, უცხოეთში მინდოდა ძალები მომესინჯა, რადგან 25 წლის ვარ, ფორმის პიკში ვარ და უცხოეთში წასასვლელად ახლა საუკეთესო ასაკი მაქვს.

- საერთოდ, ხორვატების ყურადღება როგორ მიიქციეთ?

- ეს ჩემთვის ცოტა დაუჯერებელი და მოულოდნელი ამბავი იყო.

- რატომ?

- ხორვატი მენეჯერი დამიკავშირდა და მითხრა, რომ ჩემი მონაცემები "ინსტატის" პროგრამაში ნახა - 2017 წელს ეროვნულ ლიგაში რომ დანერგეს, იმ პროგრამაზეა ლაპარაკი.

მოკლედ, ამის შემდეგ დაინტერესდა და პირდაპირ დამიკავშირდა. ბრმად არ მივენდე, გადავამოწმე და აღმოჩნდა, რომ კარგი მენეჯერია. მერე გიორგი ილურიძესაც ველაპარაკე და მითხრა, რომ "გორიცა" კარგი გუნდია და თავს თუ გამოავლენ, აგენტები დაგეხვევიანო.

ველიკა გორიცა ხორვატიის დედაქალაქიდან 15 კილომეტრშია, როგორც მცხეთა - თბილისთან. დედაქალაქის ახლოს კი მეტი მენეჯერი დადის, მით უფრო, პირველი ლიგის ლიდერის თამაშებზე. ყველაფერს თავი რომ დავანებოთ, ხორვატია საფეხბურთო ქვეყანაა.

კარგად იცით, რა დონეზეც არის და ევროპელები იქაურ ჩემპიონატს დიდ ყურადღებას აქცევენ. იქ პატარა რომ ამოძრავდე, ევროპის რომელიმე ლიგაში ამოყოფ თავს - აბა, უარი რატომ უნდა მეთქვა?

- საერთოდ, გასულ სეზონში თქვენ მიმართ ინტერესი ნამდვილად გაიზარდა...

- ჩემთვის წარმატებული და ნაყოფიერი სეზონი იყო. წლის ორ სიმბოლურ ნაკრებში მოვხვდი - "ლელოს" და ფეხბურთის ფედერაციის ვერსიაში. ეს მეამაყება და დიდ სტიმულს მაძლევს, რომ კარიერულ წინსვლას მოვახერხებ, "გორიცას" კი ტრამპლინად გამოვიყენებ.

მთავარი მიზანი მაინც ნაკრებში მოხვედრაა - რა დასამალია და, ამის იმედად მივემგზავრები. საქართველოში კარგად თამაში ნაკრებში მოსახვედრად საკმარისი არაა და იქნებ, ხორვატიაში გამოსვლით მაინც დავამტკიცო, რომ ამის უნარი და პოტენციალი აქვს.

ყოველდღიური სპორტული გაზეთი "ლელო"
5088
მკითხველის კომენტარები / 1 /
დალი
0
საქართველოში საფეხბურთო მატჩების ტრანსლირება არ ხდება, ამიტომ მე პირადად არ ვიცნობ ამ ახალგაზრდას! თუმცა რსდგან მიიპყრო სპეტიალისტების ყურადღება, ალბათ ღირსიც იყო! მე დადებითად ვაფასებ მის გადაწყვეტილებას და ამბიციურობას, მომავლის განჭვრეტის უნარს! უფალი ფარავდეს და ნიჭიერი და მონდომებული რომაა, ეს უკვე ცხადია! წარმატებები, გამარჯვებები და აღმასვლა, თავის საფეხბურთო კარიერაში!!!
მსგავსი ამბები
რუბრიკის სხვა სიახლეები
;