[ინტერვიუ] გიორგი ჩოჩიშვილი: მომატყუეს! ვიღაცას ჩემი კარიერის დანგრევა უნდა...

გორის ,,დილას“ მიმდინარე სეზონში ორი ძლიერი გოლკიპერი ჰყავს – ლუკა გუგეშაშვილი და გიორგი ჩოჩიშვილი. ორივე ახალგაზრდაა, სხვადასხვა ასაკობრივ ნაკრებში თამაშის გამოცდილება აქვთ და ორივეს არაერთ კარგ გუნდში უთამაშია, როგორც საქართველოში, ისე მის ფარგლებს გარეთ.

ამ ვითარებაში ცხადია, არჩევანის გაკეთება ძნელია, თუმცა მთელი სეზონია ,,დილას“ კარს გუგეშაშვილი იცავს. ჩოჩიშვილი კი სათადარიგო სკამზე ზის. მას მხოლოდ ერთხელ, საქართველოს თასზე მოუწია თამაშმა.

ჩოჩიშვილი ამით ძალიან უკმაყოფილოა და ამბობს, რომ მოატყუეს.

- სეზონის დაწყების წინ, ვისაუბრეთ მთავარ მწვრთნელს გიორგი ნემსაძესთან და ვუთხარით, რომ თუ სათამაშო დრო არ მომეცემოდა, სხვა გუნდში იჯარით გადასვლის რეალური ვარიანტი იყო და არ დავებრკოლებინეთ. მწვრთნელმა ცალსახად გვიპასუხა, რომ თამაშის საშუალება აუცილებლად მომეცემოდა, მას ვჭირდებოდი და მეც აღარსად წავსულვარ.

მიუხედავად ამისა, სამწუხაროდ აგერ უკვე რამდენიმე თვეა, ერთი მატჩიც არ მითამაშია. მხოლოდ ერთხელ, თასზე დამაყენეს ძირითადში. უთამაშებლობიდან გამომდინარე, ახალგაზრდულ ნაკრებშიც აღარ გამომიძახეს, ეს კი ძალიან დიდი დარტყმაა ჩემთვის.

სამწუხაროდ, ვიღაცას ჩემი კარიერის დანგრევა და ზრდისთვის ხელის შეშლა უნდა. მე ამას არ შევეგუები. ყველა მათგანს, ვისაც ჩემი პოტენციალის არ სჯერა, აუცილებლად დავუმტკიცებ საკუთარ შესაძლებლობებს.

- გიორგი, ამ ყოველვეს შესახებ გუნდის ხელმძღვანელობასთან არ გისაუბრია?

- ჩემი მოსმენა არავის უნდა და არც ჩემი პრობელმა აინტერესებთ. რომ დავეყენებინე რომელიმე თამაშში და ვერ მეთამაშა კარგად, კიდევ გასაგებია, მაგრამ შანსიც არ მომცემია.

მოგეხსენებათ, მითამაშია ყველა ასაკობრივ ნაკრებში, უცხოეთის ჩემპიონატებში, შარშან ლიგა 2–ის საუკეთესო მეკარედ დამასახელეს - 10 მატჩი გოლი არ მქონდა გაშვებული. მერე გორის ,,დილაში“ გადმოვედი და  არც ჩემი მშობლიური ქალაქის გუნდში მიასპარეზია ურიგოდ. არაერთხელ, ტურის სიმბოლურ გუნდშიც მოვხვდი. ყველაფერი კარგად მიდიოდა, მაგრამ სამწუხაროდ, დღეს აი, ამ პრობლემებზე მიწევს საუბარი.

აშკარაა, რომ მომატყუეს!

21024
მკითხველის კომენტარები / 2 /
კეთილისმსურველი
0
ჩემო მეგობარო, არ ვიცი რატომ გგონია რომ მოგატყუეს, იქნებ ვარჯიშებზეც მასე ფიქრობ და ეს ყველაფერი შესაბამისად შენ განწყობაში აისახება, რის გამოც თავს კარგად ვერ ავლენ. ზოგადად მეკარის პოზიცია ისეთია, თუ ერთმა თამაში არ ჩააგდო, მეორეს შანსი ნაკლებად ეძლევა. მეკარის როტაცია, ანუ ხან ერთის დაყენება და ხან მეორესი, არ არის მართებული. ამიტომ ჯობია მონდომებით განაგრძო ვარჯიში და დარწმუნებული ვარ შანსი აუცილებლად მოგეცემა. ნეტა მართლა დაამტკიცებდე რომ ერთ-ერთი საუკეთესო ხარ. სამწუხაროდ უცხოეთში სელფების კარგად გადაღება რომ შეგიძლია მხოლოდ ეს დაამტკიცე.
3
0
ასე არ შეიძლება!
მსგავსი ამბები
რუბრიკის სხვა სიახლეები
;