ინტერვიუ გიორგი ცხოვრებაძესთან: თებერვლიდან ლიგაზეც და პირველ გუნდშიც... ფრანგები ფიზიკურად მამზადებენ, ცდილობენ, დიდ გუნდს შემაჩვიონ

საქართველოს ხელბურთელ ვაჟთა ნაკრები დეკემბრის მიწურულიდან მონდომებით ემზადება ევრო 2022-ის პირველი საკვალიფიკაციო რაუნდისთვის, რომელსაც 11-13 იანვარს მალტა უმასპინძლებს. მეორე ეტაპზე, ანუ პლეი ოფში ჯგუფის მხოლოდ გამარჯვებული გადის.

- ამიტომ ყველა შეხვედრა უნდა მოვიგოთ და პირველი ადგილი დავიკავოთ, - ამბობს საფრანგეთის „მონპელიეს“ ახალგაზრდული გუნდის შუამარბი, 17 წლის გიორგი ცხოვრებაძე, რომელიც 10 წლისა აღმოაჩინა ტიტე კალანდაძემ 161-ე საჯარო სკოლის ფიზკულტურის გაკვეთილზე. 2012 წლიდან თბილისის „პეგასის“ წევრი გახდა. ხუთი წლის განმავლობაში კალანდაძისა და გიორგი სახვაძის ხელმძღვანელობით  ვარჯიშობდა.

2015 წელს 14 წლისა 17-წლამდელთა ნაკრებში მიიწვიეს და თბილისში ევროპის ახალგაზრდობის ოლიმპიურ ფესტივალში უნდა ეთამაშა, მაგრამ საორგანიზაციო კომიტეტმა ასაკობრივი ცენზი არ დაარღვია. სამაგიეროდ, 2016 წელს ცხოვრებაძე უკვე საუკეთესო მარჯვენა შუამარბი გახდა 20-წლამდელთა ევროპის ჩემპიონატის  საკვალიფიკაციო ტურნირზე 5 წლით უფროსებს შორის! ამ ტურნირის მონაწილე გახლდათ საფრანგეთის 14-გზის ჩემპიონ „მონპელიეს“ ორ ხელბურთელი - კილიან ვილმინო და ჟულიენ ბოსი.

გიორგი ცხოვრებაძის კარიერაში მნიშვნელოვანი აღმოჩნდა 2017 წელი, როცა გეტებორგში 17-წლამდელთა ევროპის ჩემპიონატზე ორი ინდივიდუალური ჯილდო მოიპოვა - ბომბარდირი გახდა და საუკეთესო მარჯვენა შუამარბად აღიარეს. ამის შემდეგ ქართველი სპორტსმენის ხელში ჩაგდება ფრანგულ „სენ-რაფაელსა“ და ჩემპიონთა ლიგის მოქმედ ჩემპიონ მაკედონიის „ვარდარსაც“ სურდათ, მაგრამ ცხოვრებაძემ და მისმა მწვრთნელმა ტიტე კალანდაძემ „მონპელიე“ არჩიეს.

ჩემპიონთა ლიგის მომავალმა - 2018 წლის გამარჯვებულმა ახალგაზრდა ვარსკვლავთან კონტრაქტი გააფორმა. იმავე წლის ნოემბრის დასაწყისში გიორგი საფრანგეთში ჩავიდა, ჩემპიონთა ლიგაზე „მონპელიე“-“სპორტინგის“ მატჩს დაესწრო, მერე გუნდთან ერთად რამდენჯერმე ივარჯიშა, 2 დეკემბერს კი „ბუნიოლის“ წინააღმდეგ ითამაშა საფრანგეთის 18-წლამდელთა ჩემპიონატში.

მაშინ „მონპელიეს“ მწვრთნელსა და აკადემიის მთავარ კოორდინატორ ერიკ მათეს უთქვამს, ჭაბუკი ქართველი ხელბურთელი თვითნაბადი განძიაო: „ამ ამპლუის, მარჯვენა უკანახაზელის პოზიციაზე მოთამაშე, თანაც ასეთი კომპლექციისა და მონაცემების, იშვიათობაა... ცხოვრებაძე უბრალო ტალანტი არაა და კლუბშიც მოვიწვიეთ. ყველაფერი თუ კარგად იქნა, ვფიქრობ, მალე „მონპელიეს“ პროფესიულ გუნდშიც მოხვდება“.

- ორი წელიწადია, „მონპელიეს“ მეორე გუნდში ვთამაშობ, - გვითხრა გიორგიმ. - ოფიციალურად არასრულწლოვანი ვარ. თვრამეტისა 19 თებერვალს გავხდები, ამიტომ ძირითად გუნდში როგორც ჩემპიონთა ლიგაზე, ასევე, საფრანგეთის ჩემპიონატში, თასსა და ლიგის თასზე თამაშის უფლება უკვე მექნება. არ ვჩქარობ. ფიზიკურად ვიწრთობი, სკოლა დავამთავრე. უკვე მარტო ვცხოვრობ, პირველი წელი მიმღებ ოჯახში ვიყავი. ფრანგულად უკვე ვლაპარაკობ და ყველაფერი მესმის. ვთამაშობ მეორე გუნდში, რომელიც გამოდის საფრანგეთის ნაციონალდივიზიონში. ჩემთან არიან ძმები მენგონებიც, რომლებიც შარშან თბილისში ევროპის ჩემპიონატზე იტალიის ნაკრების ლიდერები იყვნენ. ცენტრში დგას სიმონე მენგონი, მარცხენა შუამარბად - მისი ტყუპისცალი მარკო. მე მარჯვენა შუამარბი ვარ. 

ხანდახან ჟულიენ ბოსიც ჩვენს გუნდშია. დეკემბერში საწვრთნელი ტურნირი გვქონდა ნიმის, ტულუზის და უნიონის წინააღმდეგ, შესაბამისად, 12, 14 და 17 გოლი გავიტანე. ასე რომ, ველოდები, როდის დამაყენებენ მთავარ გუნდში.

- „მონპელიემ“ ჩემპიონთა ლიგის განაცხადში შეგიყვანა. ასე რომ, ძირითადში მალევე უნდა ველოდოთ შენს გამოჩენას...

- შესაძლოა, ეს წელსაც იყოს. თუმცა ფრანგები არ ჩქარობენ. როგორც გითხარით, ფიზიკურად მამზადებენ, ცდილობენ, დიდ გუნდს შემაჩვიონ, მათთან ვვარჯიშობ და ამხანაგურ  მატჩებშიც მითამაშია. ახალი სეზონიდან უფროსებთან რომ ვიქნები, უკვე გადაწყვეტილია.

- ფრანგებთან რამდენწლიანი კონტრაქტი გაკავშირებს?

- ხუთწლიანი, 2+3. ორი სეზონი ახალგაზრდა მოთამაშის ხელშეკრულება მქონდა, ივნისში უკვე პროფესიულ კონტრაქტს მოვაწერ ხელს. კაცების გუნდში თამაშის არ მეშინია - ფიზიკურადაც მზად ვარ, ფსიქოლოგიურადაც და გამოცდილებაც მაქვს - შარშან ლიტვაში უკვე ვითამაშე საქართველოს ნაკრებში და პრობლემა არ მქონია.

-ეროვნულ გუნდში ჯერ კიდევ 15 წლისამ მოსინჯე ძალები...

-დიახ, 2016 წლის დეკემბერში  ისრაელთან ამხანაგური მატჩებისთვის მიმიწვიეს. ოფიციალური დებიუტი კი შარშან იანვარში მოფლიოს ჩემპიონატის საკვალიფიკაციო ტურნირში მქონდა, სადაც პირველივე მატჩში ლატვიასთან ძირითადი მარჯვენა შუამარბი ვიყავი და 7 გოლი გავიტანე. ვეცდები, მალტაში უკეთ ვითამაშო. კარგი გუნდი გვყავს, ახალგაზრდული, მაგრამ ძალიან პერსპექტიული. ტურნირში გასამარჯვებლად არაფერს დავიშურებთ. 

ყოველდღიური სპორტული გაზეთი "ლელო"
386
მკითხველის კომენტარები / 0 /
მსგავსი ამბები
რუბრიკის სხვა სიახლეები
;