[ინტერვიუ] გიორგი ხარაიშვილი: საკუთარ თავზე ჯერ კიდევ ბევრი მაქვს სამუშაო!.. საბურთალოში ვივარჯიშებ...

გიორგი ხარაიშვილი მძიმე სეზონის შემდეგ საქართველოში დაბრუნდა - საქართველოს ნაკრების ნახევარმცველმა დასრულებულ სეზონში "გიოტებორგი" მაისურით 28 მატჩი ჩაატარა, 7 გოლი გაიტანა და 8 საგოლე გადაცემა მიითვალა, ოთხჯერ მოხვდა ტურის სიმბოლურ ნაკრებში, ხოლო ფეხბურთის სტატისტიკის საერთაშორისო ვებგვერდმა "სოფასქორმა" შვედეთის ჩემპიონატის წლის სიმბოლურ ნაკრებში დაასახელა...

23 წლის ხარაიშვილი, რომელიც ვლადიმირ ვაისმა ეროვნულ ნაკრებში გამოიძახა, საკლუბო ფეხბურთისგან ერთი თვე დაისვენებს, თუმცა უვარჯიშებელი არ იქნება... ეს "ლელოსთან" თავად თქვა. მასთან ბევრ საინტერესო თემაზე ვისაუბრეთ - შვედურ ფეხბურთზე, წლის სიმბოლურ ნაკრებში მოხვედრაზე, ფიზიკურ მზადებაზე, ჩემპიონატების დონეთა სხვაობაზე, ნაკრებზე, შვედეთში ცხოვრებაზე...

მოკლედ, მართლა საინტერესო ინტერვიუ და ჯობია საქმეზე გადავიდეთ...

შვედეთმა ჩემი იმედები გაამართლა

- უპირველესად, გილოცავთ წლის სიმბოლურ ნაკრებში მოხვედრას. შვედეთში ასეთი აღიარება უკეთესი მომავლისკენ გადადგმული დიდი ნაბიჯია. სხვადასხვა ვერსიით, სიმბოლურ ნაკრებში ბევრჯერ მოხვდით. სულ რამდენ ტურში გამოგარჩიეს?

- სიმართლე გითხრათ, არ დამითვლია და ზუსტად არც ვიცი. პრესას ვეცნობოდი, მაგრამ ამის სტატისტიკა არ მაქვს... თუმცა, ყოველი ასეთი აღიარება სასიამოვნო ფაქტია და ძალიან მახარებს.

- წლის სიმბოლურ ნაკრებში მოხვედრა მოულოდნელი იყო?

- სასიამოვნოა, მაგრამ ეს ჩემთვის არაფერს არ წყვეტს - ასეც და ისეც საკუთარ თავზე მაინც ბევრი მაქვს სამუშაო.

- შვედეთში თქვენი წასვლა ბევრისთვის მოულოდნელი იყო, მაგრამ დრომ აჩვენა, რომ გამართლებული ნაბიჯი გადადგით. საქართველოს ჩემპიონატის შემდეგ იოლი სათამაშო არცერთი ევროპული ლიგა არ არის, მაგრამ გერმანიასა და ბელგიაში კიდევ უფრო რთული იქნებოდა...

- მეც ასე მგონია, შვედეთთან დაკავშირებული ჩემი იმედები გამართლდა. "გიოტებორგი" დიდი ისტორიის მქონე კლუბია და სკანდინავიაში ყველაზე მეტი ევროპული ტიტული აქვს მოპოვებული. ორჯერ უეფას თასის მფლობელი იყო. სახელი მაინც თავისას შვება. რაც მთავარია, ისეთი ჩემპიონატია, სადაც თამაში წამადგა. ფიზიკური მომზადება და სისწრაფეები სხვაგვარია და შესაგუებლად 2-3 თვე დამჭირდა.

- როგორც ვიცით, თავიდან კლიმატთან შეგუებაც გაგიჭირდათ...

- კი, ესეც იყო. ახლა პრობლემა აღარ მაქვს.

- შვედეთის ჩემპიონატში გუნდის გამოსვლას როგორ შეაფასებდით?

- საკმაოდ წარმატებული სტარტი გვქონდა. მაგრამ მერე რამდენიმე მოთამაშე წავიდა, ზოგი დაშავდა და ისე წარმატებით ვერ გამოვედით, როგორც გვსურდა.

- შვედეთში ფეხბურთი პოპულარულია?

- ხალხი ფეხბურთით ცხოვრობს. შემოდგომის ბოლოსკენაც კი, როცა სიცივეები დგება, ფანები სტადიონზე მოდიან და ბევრჯერ დამინახავს - წელზემოთ გახდილებიც კი ქომაგობენ გუნდებს. ფეხბურთი ძალიან უყვართ.

- შვედეთი ისეთი ქვეყანაა, შეჩვევა არ სჭირდება...

- მეორე წელია იქ ვცხოვრობ და მალევე შევეჩვიე. დალაგებული და მშვიდი ქვეყანაა. გუნდის ბაზიდან ძალიან ახლოს ვცხოვრობ...

ევროპულ გათამაშებაში წარმატებებს ვერ აღწევენ

- ალსვენსკანის (შვედეთის მთავარი ლიგა - ავტ) დადებით და უარყოფ მხარეებზე რას იტყვით? რა დონის ჩემპიონატია?

- უმაღლესი პროფესიონალები არიან. ბევრს მიაჩნია, რომ შვედური ფეხბურთი მხოლოდ ფიზიკურ მომზადებაზეა დამყარებული. მე ასე არ ვთვლი. რა თქმა უნდა, ათლეტურ ფეხბურთს თამაშობენ, მაგრამ ისეთი გუნდებიც არიან, საკმაოდ აზრიან და შემტევ ფეხბურთს რომ ანიჭებენ უპირატესობას. ერთი ეგ არის, ევროთასებზე წარმატებებს ვერ აღწევენ.

- ...არადა, შვედებს წარმატების მისაღწევად ყველაფერი აქვთ - მდიდარი ტრადიციები, მშვენიერი ინფრასტრუქტურა, ძლიერი ეკონომიკა, ბევრი ძლიერი კომპანია... მაგრამ ჩემპიონთა და ევროპალიგის იშვიათი მონაწილეები არიან...

- როგორც ვხედავ, 4-5 ისეთი კლუბია, აშკარად ბევრად მეტი რომ შეუძლია, მაგრამ... რატომღაც წინ ვერ მიდიან.

- ეს კლუბების ფინანსური პოლიტიკა ხომ არ არის - გაზარდონ ფეხბურთელები და მერე სარფიანად გაყიდონ?

- ეს ზუსტად არ ვიცი, მაგრამ ფაქტია - შვედეთიდან კარგ ჩემპიონატებში ბევრი ახალგაზრდა მიდის. სხვათა შორის, ბავშვობის ასაკში მიდის ბევრი. არადა, მათ შეუძლიათ ჩემპიონთა ლიგაში გუნდი ყოველ წელს გაიყვანონ, რადგან ბევრი მაღალი დონის მოთამაშე ჰყავთ.

- "გიოტებორგი" შვედეთის ყველაზე პოპულარული კლუბია, მაგრამ 2007 წლის შემდეგ ჩემპიონი ვერ ხდება. ძველი სახელის დაბრუნება არ სურთ თუ მათაც ლიდერების მსგავსი ეკონომიკური პოლიტიკა აქვთ?

- დაახლოებით ასეა. ფეხბურთელების შენარჩუნებას არ ცდილობენ. ცდილობენ, აკადემიის მოთამაშე დაიმატონ, გაზარდონ და მერე გაუშვან. ფინანსურად ძლიერი კლუბიც არ არის. ამიტომ, უცხოეთში ბევრი მიდის.

- ზოგადად, შვედური კლუბების სავარჯიშო პირობებზე რას იტყვით?

- ძალიან მაგარი ბაზები, სავარჯიშო მოედნები და სტადიონებია. ასევეა "გიოტებორგის" ბაზა, მოედნები ტყეშია, ძალიან მაგარი ბუნება და ჰაერია, ოღონდ, იქ საცხოვრებელი კორპუსი არ არის.

გიოტებორგში წინსვლას ვგრძნობ

- "გიოტებორგში" თამაშის პერიოდში წინსვლას თუ გრძნობთ?

- იმავეს ვაკეთებ, რასაც საქართველოში ვაკეთებდი, ოღონდ, ბევრად მაღალ ტემპში - ეს არის უკეთესობა. საქართველოს ჩემპიონატში ძალიან დაბალი ტემპიც არ არის, მაგრამ იქ უფრო მაღალი სისწრაფეებია და ფეხბურთელებიც ფიზიკურადაც უკეთ მომზადებული არიან. საერთო დონეზე გავლენას ეს ორი ფაქტორი ახდენს.

- თქვით, რომ საკუთარ თავზე ბევრი გაქვთ სამუშაო. რა ნაკლის გამოსწორება გსურთ?

- რა თქმა უნდა, სამუშაო ბევრი მაქვს. რაც შეეხება ნაკლს, ბევრ კომპონენტში მაქვს გამოსასწორებელი, მათ შორის, თავით თამაში და კიდევ ბევრი რამ.

- მაგრამ თქვენი მაგალითი აჩვენებს, რომ სხვა დატვირთვებზე და ტემპზე გადართვა შეუძლებელი არ არის...

- რა თქმა უნდა, არ არის შეუძლებელი. დროთა განმავლობაში ამ ყველაფერს ეჩვევი და ხვდები, რომ განსაკუთრებული არაფერია.

- კონკრეტულად რა კუთხით მოუმატეთ?

- ვგრძნობ, რომ ბევრად მომატებული მაქვს "ფიზიკაში", გამძლეობაში, კუნთოვანი მასაც გაზრდილია...

- ასეთი რა "ჯადო" ვარჯიშებია, ჩვენ რომ არ ვიცით და ევროპაში ლამის ყველამ რომ აითვისა საქართველოს გარდა?

- თავად ვარჯიშებია დატვირთული და სათამაშო ვითარებასთანაა მიახლოებული - ტემპიც, ორთაბრძოლებიც... ამის შემდეგ თამაში აღარ ჭირს.

- "გიოტებორგში" ამპლუის შეცვლას როგორ შეეგუეთ?

- უპრობლემოდ. შვედეთში ჩასულს მწვრთნელმა პოზიცია შემიცვალა და ნახევარმცველი თავდამსხმელად დამაყენა. ეს თავიდან უცნაურად მომეჩვენა, მაგრამ ახლა ძალიან მომწონს და თავს კომფორტულად ვგრძნობ.

- ჩემპიონატის წლის სიმბოლურ ნაკრებში დასახელება წინსვლის წინაპირობა შეიძლება გახდეს. ევროპის უკეთესი ლიგის გუნდები თუ დაინტერესდნენ თქვენით?

- ინტერესი არის, მაგრამ რა დონეზე და რამდენად სერიოზული, ამაზე აგენტთან ჯერ არ მილაპარაკია და ახლა ვერაფერს გეტყვით, თანაც გუნდთან კონტრაქტი 2021 წლამდე მაკავშირებს.

- საქართველოდან წასვლისას თქვენი სატრანსფერო ფასი 650 ათასი ევრო იყო, ახლა 1,1 მილიონი ევროა. ამასაც არ აქცევთ ყურადღებას?

- არა, რატომ? საინტერესო და სასიხარულო ფაქტია, რომ უკეთ გაფასებენ. გამოდის, უმატებ და წინ მიდიხარ.

საბურთალოში ვივარჯიშებ...

- ნაკრებში გოლი გაიტანეთ. ასე ნებისმიერი მოთამაშე უფრო თავდაჯერებული გახდება...

- თავიდან ცოტა დაძაბული ვიყავი, მაგრამ მიმაჩნია, რომ ნორმალურად ვითამაშე და გოლიც ძალიან სასიხარულო იყო.

- თუმცა იმ თამაშში კინაღამ სერიოზული ტრავმა მიიღეთ. მერე იყო გიბრალტარელი ფეხბურთელის მიმართვა. მან მომხდარი ძალიან განიცადა...

- ეს იყო შემთხვევითი შეჯახება და საბედნიეროდ გართულებებს გადავურჩი. ხელი ყბაში მომხვდა.

- ვლადიმირ ვაისმა ისევ მიგიწვიათ ნაკრებში. მანამდე სად ივარჯიშებთ?

- "საბურთალოს" დავუკავშირდი და ვარჯიში ვთხოვე. თბილისში ორიოდე დღე დავისვენებ, მერე კი ინდივიდუალური პროგრამით ვივარჯიშებ, რომელიც კლუბიდან გამომატანეს. სანამ ნაკრები შეიკრიბება, "საბურთრალოსთან" ერთად ვიქნები.

- თამაშს რომელ ჩემპიონატში ისურვებდით?

- ასეთი ლიგა ბევრია: გერმანია, ჰოლანდია... ბავშვობიდან ჩემპიონთა ლიგაში თამაშზე ვოცნებობ... არ ვიცი, ჩემი კარიერა როგორ წარიმართება, მაგრამ ფეხბურთელი ვარ და უკეთეს ჩემპიონატში თამაში მინდა. რაც შეეხება საოცნებო კლუბს, ჩემი ყველაზე დიდი ოცნება "ბაიერნში" მოხვედრაა...

1063
მკითხველის კომენტარები / 0 /
მსგავსი ამბები
რუბრიკის სხვა სიახლეები
;